Urushako, hamwe mu hakomeje kugaragara(...)

Kwamamaza

agakiza

Urushako, hamwe mu hakomeje kugaragara agahinda gakabije


Yanditswe na: Ubwanditsi     2020-01-28 04:52:32


Urushako, hamwe mu hakomeje kugaragara agahinda gakabije

Ubundi abantu babiri (umusore n’inkumi) baramenyana, bakarambagizanya, bagakundana bakanashakana. Akenshi mu gihe cy’irambagiza no gukundana, buri wese akora uko ashoboye kugira ngo akore ibyanezeza mugenzi we, akenshi hakabaho no kureka bimwe mu bimushimisha azi ko bishobora kubangamira mugenzi we kugira ngo bahamye urukundo rwabo rubageza ku kubana.

Muri icyo gihe kandi, buri umwe akora iyo bwabaga yitwararika ku ngeso zimwe na zimwe cyangwa kamere yiyiziho kugira ngo abashe kwemeza umukunzi no kumutsindira cyane ko mu gihe cyo kurambagizanya abakundana baba batamarana igihe kinini kuko baba babonana umwe ataha iwe n’undi ari uko.

Iyo shusho, uko yamwiyeretse, amagambo meza yamubwiraga, kwa kwitwararika kose yamugaragarije ni ko kugenda kukaba mu mutwe w’umukunzi we, akumva nibamara no kubana bazakomeza babeho gutyo ndetse ko ahubwo bizagenda neza kurushaho. Hari n’ingeso umwe aba abona kuri mugenzi we akumva azamuhindura baramaze kubana (kuko hari abajya kujya mu rugo batekereza gutya) kandi burya umuntu nta wamuhindura, uretse Yesu wenyine ni we ubasha guhindura umuntu.

Reka rero bagere mu rugo, buri wese yumve ko wa muntu wo mu gihe cyo kurambagizanya ari we bagiye kubana nyamara hagiye kuza we nyir’izina. Twibuke ko ba bantu barambagizanya, nta masaha menshi bamarana; ubwo rero bagiye mu rugo rwabo bagiye kujya bamarana amasaha menshi ari na ho buri wese abaho nkawe, ntabeho nka wa wundi ukitwararika agira ngo bamwemere. Ingeso na kamere zitagaragaye cya gihe ni bwo zihishurwa kuko byarashobokaga ko iyo azigaragaza icyo gihe wa mugenzi we atari bumwemere bitewe n’amahame we yumva yifuza yagenga uwo bazabana.

Akenshi iyo abantu bakirambagizanya, buri wese yita ku byiza bya mugenzi we ari na yo mpamvu duhisha ibibi noneho nyuma yo kubana bagatungurwa, umuntu akumva wa mugenzi we yaramubeshye, akumva aramuhemukiye amarangamutima agatangira gukomereka (kwangirika). Icyo gihe akenshi ibyiza bye ntibiba bikigaragara ahubwo umuntu aba asigaye atinda ku bibi hakazamo no gutangira kwicuza ati ahari narihuse kumwemerera kubana na we cyangwa si we wari ukwiriye n’ibindi bisa bityo.

Icyo gihe, guhemukirwa ni iki?

Ni igihe hatubahirijwe ibyo abantu basezeranye/bemeranyijwe cyangwa kwitega byinshi kuri mugenzi wawe. Bijya bibaho ko umugore/umugabo arema umugabo/umugore mu bitekerezo akamushushanya uko amwifuza bamaze kubana hakiyongeraho uko yamwiyeretse bakirambagizanya akumva rwose bizaba ari mahwi. Nyamara ikibazo na we hari ibyo yamukingaga kugira ngo abashe kumwegukana nyuma yo kubana akumva yaramubeshye akumva arahemukiwe.

Ikindi gihe ni uko umugore/umugabo ashobora kumva uwo bagiye kubana azamubera byose cyane cyane ibyo atabashije kubona mu bwana (ku bagize ibyabo byo kuba imfubyi ari bato, kugira ababyeyi ba terera iyo/batagira icyo bitaho cyangwa badafata/batuzuza inshingano ku bana babo, abahohotewe n’ababyeyi…) akumva ubwo aje ku mugabo/mugore abonye uburuhukiro, akumva azasiba ibirarane afite.

Hari ubwo uba usaba umuntu icyo na we adafite, hari ubwo uba umufata nk’ufite ubushobozi/imbaraga zidasanzwe (superpower) kandi ahubwo na we hari ibirarane afite utazi cyangwa hari nk’ikosa wumva adashobora kuba yakora ku bw’icyizere umufitiye.

Hari ubwo umutegerezaho urukundo rwinshi kuko utarubonye mu buto bwawe kandi na we nta rwo yigeze. Hari ubwo umushakaho uburuhukiro kandi na we arushye kukurusha, hari ubwo umwitegaho byinshi birenze ubushobozi bwe kuko na we atabibashije bigatuma utekereza ko hari ibyo yakagukoreye adakora ku bushake cyangwa se yirengagiza nyamara na we nta byo ashoboye rwose cyangwa akagira intege nke za muntu agakora ikosa mugenzi we atatekerezaga ko yakora bikamuhungabanya bikomeye cyane nko kumuca inyuma, gufata ibyemezo atamubwiye, kumuhohotera, kumuhoza ku nkeke, gusesagura amafaranga n’ibindi.

Agahinda gakabije kaza ryari?

Iyo bya bintu wari witeze kubona ku muntu cyangwa yagusezeranyije ugezeyo ntubibone ndetse ukabona ibyo utakekaga ko wabona ku mukunzi wawe, ukabibana, bikakuzura, ukabibika bigenda byiyongeranya ndetse ugatekereza ibibi kurusha ibyo ubona, ukabyibikamo… icyo gihe bitsikamira amarangamutima bikayakomeretsa bikomeye, bityo bigatangira kugira ingaruka zitandukanye ku mubiri w’umuntu kuko bishobora kwishakira aho bisohokera.

Kuri bamwe bakarwara igifu, imitsi, umuvuduko w’amaraso, diyabete, umutima, umwijima, imitsi yo mu mutwe igaturika n’ibindi. Aho rero bigendana n’ubwihebe, kwiheza, kudashaka kugera aho abandi bari, kugira ibitekerezo bitajya bibona ibintu mu buryo bwiza (pensées negatives), kumva ko gupfa bikurutira kubaho n’ibindi.

Umuntu yakora iki kugira ngo yirinde cyangwa akire agahinda gakabije?

Hari ibintu umuntu yakora kugira ngo yirinde ndetse n’uwari utangiye kugerwaho n’iyo ndwara akaba yayigobotora:

- Hari ukumva ko umuntu mubana ari umuntu igihe icyo ari cyo cyose ashobora gukosa;

- Kubwira Imana ukayisukira umutima wawe wose ndetse ukayibwira nk’ubwira inshuti ye yo mu z’imbere. Ukayibwira ukuntu ubabaye, uko wahemukiwe, ukayiganyira byose kandi irumva cyane. Igikomeye ni ukuyisaba imbaraga zo kubasha gukomeza kubaho mu gihe utegereje ko imuhindura kuko ari yo yonyine ibifitiye ububasha no gutekereza ibyiza kuko n’ubwo wababara ukagera aho wumva wakwisabira gupfa, uracyafite umurimo mugari wo gukora ku isi, mu mugambi w’Imana uri uwo gukora iby’ubutwari;

- Gutegura ikiganiro n’uwo mwashakanye mukaganira ku byo utishimira kuri we (aha bisaba kumenya uburyo uvugamo ikibazo cyawe. Banza usenge usabe Imana amagambo meza yo kubivugamo bitazarangira uvuze ijambo utasubiramo cyangwa bikaguhindukirira ukaba ari wowe uba umunyamafuti ku bwo kwihagararaho k’ugaragarizwa ikibazo cyangwa kwikura mu isoni).

Ibyiza mwaganirira ahatari mu rugo ariko kandi ahantu hatuje kugira ngo mwisanzure kandi mutekereze neza. Aha ikiganiro gitangizwa no kumushimira no gushimagiza ibyo akora neza, ibyiza umuziho ukabimubwira kandi ukabimushimira hanyuma muri ya magambo meza ukamubwira ibitagushimisha/ibikubangamira akora hanyuma ukamuha na we umwanya wo kukubwira ibyo agushimira n’ibyo akugaya, mugafatira hamwe umwanzuro w’ibigiye gukosoka kandi n’ibidakosotse kuko uba wasenze Imana wayisabye imbaraga ukabaho nk’ibidahari utegereje igihe cy’Imana ngo ibihindure;

- Gushaka umuntu w’umwizerwa (n’ubwo bigoye kumubona muri iki gihe, aha biragusaba ubushishozi mu gushaka uwo muntu) ukamuganiriza, akajya akuzirikana, akagusengera, akakuvugisha kenshi akubaza amakuru n’ibindi.

- Ishyirireho igihe gihoraho cyangwa gihora kigaruka cyo kuruhuka kikanaguhuza ku buryo bya bitekerezo bibi ubirwanya.

Aha kuruhuka kuri ukwinshi: kora ikintu kigushimisha kimwe ukora ukunze wumva kikuruhura mu mutwe. Hari abakunda indabo ushobora kuzivomerera niba uzifite mu rugo, ushobora kujya ahantu ziri ukazitegereza, hari abakunda gukora ibintu by’amaboko nko kudoda cyangwa kuboha, hari abakunda amatungo ushobora kuyagaburira, kuyitaho…

Hari abakunda kuba basohokera ahantu hari ibintu bitandukanye wajyayo ugiye nko kuharya ibyo ukunda, hari abakunda igikoni ushobora gutegura ibiryo ukunda kurusha ibindi, hari abakunda kuba bari kumwe n’inshuti baseka, mwapanga mukajya ahantu mugaseka, ushobora kumarana igihe n’abo ukunda (nko gukina n’abana mu gihe bahari) cyangwa kubasohokana, hari abakunda filime, indirimbo, imyitozo ngororamubiri.

Hari ikindi kintu cyiza numvise umuganga yagiriye inama umuntu numva ndagikunze, ngo mu gihe wumva unaniwe cyangwa ubabaye ushaka wa muntu wisangaho w’umwizerwa muba muziranye kuri byinshi, mukamarana nk’igihe runaka bitewe n’icyo mufite (umunsi wose cyangwa amasaha runaka) muganira ibintu bitarimo inyurabwenge nyinshi, mukaba mwakora urugendo rw’amaguru ahantu harehare mugenda museka ubusa, mugakina nk’amakarita mutabara uwatsinze, mugakora nk’ikintu mwashaka mukagishwanyuza mukagitangira… ibyo na byo biraruhura kandi neza kuko hari ubwo umuntu ashobora kuryama afite amarangamutima akomeretse cyangwa umunaniro mwinshi akaba yasinzira ntakanguke nyamara kubona akanya ko kwihuza no kwiyibagiza ibimugoye ari byo byari kumufasha kurushaho.

Icyo kwitondera: Mbere yo kugira ikintu ukora banza utekereze cyane mu gihe ufata icyemezo cyangwa ushaka kugira ijambo uvuga kuko akenshi ikintu ukoze ubabaye nyuma ushobora gusanga iyo ugitekerezaho cyane atari cyo wari buhitemo gukora.

Hari abababara bakajya guhaha (shopping) ushobora kwisanga wangije amafaranga ku bintu utari ukeneye cyangwa ukabitangaho menshi bidasanzwe bigura. Ushobora no kwisanga uhutaza abo mu rugo (abana, imiryango, uwo mwashakanye, abashyitsi, abakozi…) kubera kugira umutima ukomeretse, ni yo mpamvu igikuru ari ugusaba Imana ikakuyobora mu byo ukora byose, ukayigisha inama kuri buri kimwe ugiye gukora kugira ngo udakora ibidakwiriye.

Ibitekerezo (0)

Tanga igitekerezo

Amategeko n'amabwiriza arakurikizwa

Haba hari icyemezo ufashe nyuma y'ubu butumwa ?