Uko Nzaramba wari “Manager” wa The Ben na(...)

Kwamamaza

agakiza

Uko Nzaramba wari “Manager” wa The Ben na Kitoko yabaye umuvugabutumwa


Yanditswe na: Ubwanditsi     2020-07-09 04:06:57


Uko Nzaramba wari “Manager” wa The Ben na Kitoko yabaye umuvugabutumwa

Nzaramba Olivier wigeze kugira akabyiniro gakomeye muri Kigali,ni umwe mu bahanzi b’indirimbo zihimbaza Imana ubimazemo imyaka itandatu. Afite imyaka 45, arubatse afite umugore ariko nta mwana baragira.

Impano yo kuririmba mu muryango we si we wenyine uyifite kuko hari mushiki we uririmba. Nzaramba afite indirimbo 11 zirimo "Humura" aheruka gushyira hanze.
Uyu mugabo kuva mu 2009 atuye mu Bwongereza kubera ko ariho umufasha we yari atuye basezerana kubana akaramata.

Nzaramba aherutse gushyira hanze indirimbo yise ‘Humura’ irimo ubutumwa bugamije guhumuriza abihebye. Aganira n’ikinyamakuru IGIHE yatangaje ko igitekerezo cyo kuyikora cyaje mbere ya Coronavirus ariko iki cyorezo cyamara kugariza Isi akabona aricyo gihe cyiza cyo kuyishyira hanze.

Ati “Nabonaga umuntu wihebye kandi burya umuntu ashobora kwiheba mu buryo butandukanye, nayiririmbye nshaka guhumuriza abantu. Coronavirus iri mu bintu byatumye nshaka kuyishyira hanze ariko yari yarakozwe mbere.”

Uyu mugabo w’imyaka 45 iyo yivuga yigaragaza nk’umuntu wabaye cyane mu bihe bitandukanye n’iby’agakiza arimo uyu munsi.

Ati “Nabanje kuba mu myidagaduro y’indirimbo zisanzwe, nagize akabari ka mbere mu 2002 aho bitaga mu “Gicopain”, benshi bari banzi nka Olivier Nigga hanyuma nza kugira akabyiniro kitwaga Black & White kategurirwagamo ibitaramo. Rero mu 2010 naje gufata umwanzuro wo kwinjira mu by’agakiza.”

Arongera ati “Kugira ngo nkizwe sinavuga ko hari impamvu runaka yabiteye ahubwo nkeka ko buri muntu wese agira igihe cye kuko nibuka ko natangiye kugira umuhate mu by’Imana mu 2009 ubwo nageraga mu Bwongereza aho mba ubu.”

“Nahoraga ndeba imiterere myiza y’utubyiniro twa hariya numva hari igihe nzahagatangiza nkatwika (nk’uko ab’ubu babivuga) ariko birangira niyeguriye Imana. Umugore wanjye yanjyanye ahantu yasengeraga ngenda muherekeje bihita bituma nkizwa mu buryo ntateguye.”

Avuga ko we wa kera atarakizwa na we w’ubu nyuma yo kwakira agakiza ari ibintu byuzuzanya cyane mu buzima abamo, iyo abisobanuye avuga ko ari ‘ubuhamya’.
Ngo kugira ngo aririmbe byaturutse ku kuba n’ubundi ari ibintu yari asanzwe yiyumvamo ariko atabikora cyane.

Ati “Ndibuka mu gihe hajyaga habaho ibitaramo by’urubyiruko najyaga mfasha abahanzi mu kuririmba, nkayobora ibitaramo. Ninjiye mu kuririmba rero biturutse kuri couple twari tuziranye yimutse ikava mu Mujyi yari irimo ijya mu wundi, ndibuka ko najyaga nkora utuntu duto two kuririmba.”

Mbere yo kwiyegurira Imana yigeze kuba Manager wa The Ben na Kitoko

Avuga ko kubera kuba mu ruganda rw’imyidagaduro yagiye aba inshuti cyane z’abari barurimo mu gihe cye, ndetse hari n’abo yagiye areberera inyungu mu muziki (Music Management) barimo The Ben na Kitoko.Ati “Umuntu wa mbere natangiriyeho mba manager w’abahanzi yari Kitoko, ariko we ntabwo byari byo neza ahubwo twakoranaga nk’abavandimwe, icyo gihe yari ari i Nyanza ndamubwira nti noneho ngwino muri Kigali. Tuganira byinshi bijyanye n’uburyo yazamuka.”

“The Ben we byabaye ari nk’impanuka. Yarambwiye ati nta kuntu wamfasha? Ni uko byatangiye, icyo gihe yari amaze gutandukana na Tom Close atangiye kwikorana nk’umuhanzi ku giti cye. Aba bahanzi bose turavugana, nka The Ben duherukana ku bunani ubwo yakoreraga igitaramo mu Bufaransa, Kitoko we kubera ko aba mu Bwongereza turavugana cyane, benshi mu bahanzi turi abavandimwe.”

Video y’indirimbo "Hummura" ya Nzaramba Olivier wayisanga hano:

Source: IGIHE.COM

[email protected]

Ibitekerezo (0)

Tanga igitekerezo

Amategeko n'amabwiriza arakurikizwa

Haba hari icyemezo ufashe nyuma y'ubu butumwa ?