Ubuhamya bwa Pamela wabaye indaya akiri muto(...)

Kwamamaza

agakiza

Ubuhamya bwa Pamela wabaye indaya akiri muto cyanee, Imana ikamuha agakiza biturutse ku nda yaratwite


Yanditswe na: Ubwanditsi     2020-05-21 09:33:02


Ubuhamya bwa Pamela wabaye indaya akiri muto cyanee, Imana ikamuha agakiza biturutse ku nda yaratwite

Nitwa Mugwaneza Nzahoyankuye Pamela , Imana ihindura ubuzima. Hari ibintu ijya icurika igacurikura ibindi bizima. Imana yakoze ibikomeye yankuye mu buraya , inkura ku rumogi,inkura ku kumasura ndirimbira abasinzi mukabari , Imana impindurira amateka, ingira neza nanjye ubu ndi umwana w’Imana. Ubu ndi umukozi wayo. Nari mutoya ariko satani iyo ashaka gukoresha abantu ntabwo areba imyaka, kandi iyo Imana ishaka guhindurira umuntu amateka ntabwo ireba imyaka, icyo iba yarakuvuzeho iragikora kandi ikagisohoza amahoro.

Mu byaha nahuriyemo n’imvune nyinshi cyanee , kujya mu kabari narakubiswe,nararwanye , nicaraga mu kabari bugacya, mu byaha nahuriyemo n’ibikomere byinshi cyanee. Nubwo byambayeho ariko Imana yaranzigamye kuko yariziko uyu munsi nzaba ndimo mvuga gukomera kwayo. Gusa Imana ibabarira ibyaha ariko ingaruka zabyo zihoraho, gusa ndashima Imana ko ntangaruka nyinshi nahuye nazo ariko izo nahuye nazo nzazivuga nsenye satani. Ndashima Imana ko navuye mu buraya nta sida ndwaye hamwe n’izindi ndwara zandurira mu busambanyi .

Navutse mama asengera muri ADEPR, papa ari umugaturika mvukira ahitwaga Kimicanga. Umwana unkurikira yarapfuye yishwe na Sida, ndibuka 2001 nibwo nigaga muwa mbere mfite imyaka 8, ababyeyi banjye bapfiriye mu mwaka umwe ubuzima burancaga, ndacanganyukirwa . Imiryango iradutererana, iyo nararaga hano ejo narahavaga. Twabaye muri ubwo buzima nkarara aho mbonye, naje guhura n’abantu burubyiruko bari mu kigare kibi , babasinzi b’indaya. Nanjye byarangiye ngiye muri icyo kigare. Barambwiye ngo nize banyereke ahantu hari akazi (Uburaya) Nuko byatangiye mba indaya mbi cyanee nkuraho.

Bibiliya iravugango , Imana niyo se w’impfubyi, ikaba umugabo w’abapfakazi . Ubupfubyi bwanteye ibikomere. Gusa iyo wemereye Imana, ugaca bugufiya, Imana ikugirira imbabazi. Igihe cyarageze urumogi rwo mu Rwanda rumbana rukeya nkajya njya no muri congo kurushaka yo, iyo nageraga muri congo nakoraga uburaga nkajya no kubyinira mu kabari. Njya mbwira abantu ngo satani nawe agira imbaraga yari yarampaye igikundiro cyo gukundwa n’abagabo kandi bubatse , bambaye impeta. Hari igihe najyaga nicara umutima ukambwira ngo hari igihe ubu buzima uzabuvamo. Njya mbwira abantu ngo ikintu cya mbere kizagushinja ni umutimanama.

Icyo gihe nagiraga amahane nkarwana , na karitsiye nabagamo baranyirukanaga, iyo abayobozi banyirukanaga nababwiragako batanyirukanye mu Rwanda, najyaga nambara ubusa wandeba ngahita ngukubita, Icyo gihe nari mfite imbaraga za satani. Umutima wambwiragako hari igihe nzava muri ubwo buzima. Igihe cyarageze ntwita umwana utagira se, ntangira gukurira mu bikomere. Hari igihe naryamanaga n’abantu ntibakoreshe agakingirizo kubera gusinda, nagiye kwipimisha incuro zirenga icumi ngasanga ndi muzima, najyaga mbwira Imana ngo nindinda nzayishima, kuko numvaga nshobora kuzicwa na Sida kuko iwacu ariyo yabishe, nkabona izaba karande. Nagize igikomere cyo gutwita umwana utagira se. Natangiye guca bugufi ariko nkanywa urumogi rwinshi kugirango niyibagize ibibazo , icyo gihe abavandimwe bambazaga uwanteye inda ariko nkababeshya , sinagiraga uwo ntura ibibazo.

Igihe kimwe tuvuye mu kabari ndikumwe n’indi ndaya umupasitaeri yaduciyeho aduha lifuti , aratubwirango Imana yambwiyengo nce hano mbatware. Aratubwirango muri mwebwe harimo umuntu utwite kandi ntabwo abizi ariko nayikuramo azapfana nayo kuko iyo nda yaje mu mugambi w’Imana. Imana yaciye kuri uwo mwana ishaka guhindurira nyina amateka , arongera aravugango umwe muri mwebwe azajya avoma bihita, azajya araya abone amafaranga menshi ariko nibucya ayabure. Icyo gihe twatangiye kwitana bamwana, ntangira kubwira iyo ndaya yindi ngo niwe, nawe ati ninjye.

Narasamye Imana impishako nasamye, abantu bakazajya babimbwira. Nagiye kwipimisha nsanga ndi muzima nubwo umwana atagiraga se. Igihe cyarageze nza guhura n’umusore w’umukanishi nawe unywa urumogi na za waragi. Ndibuka najyaga mvugango nimpfa bazampambane primus y’amapine ikonjen’urumogi. Najyendana intore ku matwi. Uwo musore naramuterese musabako twabana. Birangira tubanye, aho yaratuye habaga umumama w’umurokore akajya andarika ngo nzagende dusengane. Mubwirako ngiye mu rusengero rwabo rwashya.

Igihe cyarageze Pamela atwite agira ubwoba bwinshi ko azapfa arikubyara, byagezeho asaba wa mumama ko nibajyana gusenga azamugurira primus kandi akazajya abikora buri uko bajyanye gusenga. Wa mumama w’umutaranyi yarabimwemereye, akazajya amugurira primus buri uko bajyanye gusenga. Igihe cyarageze Pamela yumva ijwi ry’Imana imubwirako izamugira neza niyihana agakizwa. Pamela yarakijijwe ubu ni umukozi w’Imana abyaye gatatu aracyabana na wa mugabo yitereteye. Kubera uburebure bw’ubuhamya nshuti bakunzi ba www.agakiza.org mwihangane turabaha video mwumve ubuhamya bwose. Mwumve intambara yahuye nazo nyuma yo gukizwa , mwumve n’ibindi bigeragezo yahuye nabyo amaze gushaka , mwumve uko yihanganye , mwumve aho Imana igejeje ikora ku buzima bwe. Mwumve nuko ubuzima bwe bwahindutse neza.

UBUHAMYA BWA PAMELA WABAYE INDAYA AKIRI MUTO, NYUMA IMANA IKAMUHA AGAKIZA

Ibitekerezo (0)

Tanga igitekerezo

Amategeko n'amabwiriza arakurikizwa

Haba hari icyemezo ufashe nyuma y'ubu butumwa ?