Si ku bw’amaboko cyangwa imbaraga zawe ahubwo(...)

Kwamamaza

agakiza

Si ku bw’amaboko cyangwa imbaraga zawe ahubwo ni ku bw’Umwuka w’Uwiteka


byanditswe na: Ubwanditsi     2016-06-18 10:12:06


agakiza

Zakariya 4: 6-7 Aransubiza ati “Ijambo Uwiteka atumye kuri Zerubabeli ngiri ati ‘Si ku bw’amaboko kandi si ku bw’imbaraga, ahubwo ni ku bw’Umwuka wanjye.’ Ni ko Uwiteka Nyiringabo avuga “Wa musozi munini we, wiyita iki? Imbere ya Zerubabeli uzaba ikibaya….

Tugendeye ku bitabo bitandukanye nk’icy’umuhanuzi Hagayi na Ezira, Zerubabeli yari mwene Sheyalutiyeli, akaba yari umwe mu bayoboye abayuda, avugwaho byinshi ariko cyane cyane avugwa kuba yaragize ishyaka rikomeye mu iyubakwa ry’inzu y’Imana yari yarasenywe na Nebukadinezali Umukaludaya umwami w’i Babuloni (Ezira 5:12), nyuma y’ingoma zitandukanye uyu murimo wo gusana urusengero uhagaritswe we na Yosuwa w’umutambyi n’abo bafatanyaga ntibacike integer, batangiye kurusana kugeza ku ngoma ya Dariyo aho iyi nzu yubatswe byemewe ikarangira.

Zerubabeli Yahawe n’Imana isezerano rikomeye, rigira riti “Si ku bw’amaboko kandi si ku bw’imbaraga, ahubwo ni ku bw’Umwuka wanjye” Zekariya 4:6, Intege nke za Zerubabeli imbere y’Imana ntizari ikibazo, kuko Imana yashyize muri we umwuka wayo, Imana imaze kubona ishyaka afite ryo kuyikorera na bagenzi be yarabanezerewe, ikomeza ibabwira amagambo y’ibyiringiro iti : Ariko rero komera Zerubabeli we, ni ko Uwiteka avuga, kandi nawe ukomere Yosuwa mwene Yosadaki umutambyi mukuru, mukomere namwe bantu mwese bo mu gihugu, kandi mukore kuko ndi kumwe namwe, ni ko Uwiteka Nyiringabo avuga, nk’uko isezerano nasezeranye namwe riri mu gihe mwavaga muri Egiputa, Umwuka wanjye akaba ari muri mwe, ntimutinye.’(Hag 2:4)

Uyu munsi ibihagaritse imitima y’abana b’Imana ni byinshi ariko ndababwira ngo mukomere, gukurwaho kwabyo si kubw’imbaraga zanyu ahubwo ni kubw’imbaraga z’umwuka w’Imana uri muri mwe, kuva muvuye muri egiputa y’ibyaha hari imbaraga z’umwuka wera Imana yashyize muri mwe, izi zibasha kuvuguruza imigambi ya Satani. Nk’uko itara ryaka ritazima ryuzuye amavuta y’ibiti by’umwimerere atarakozwe n’amaboko y’abantu, niko imbaraga z’Imana ishobora byose zibasha gukorera muriwe cyangwa mu maso yanyu ibirenze ibyo mwibwira, ntizitangirwa kandi ntizihagarikwa n’ikintu icyo aricyo cyose.

Ese ubundi uri inde wo kwirata imbaraga zawe, ndetse nta n’icyo washobora atari Imana igushoboje, Imisozi iri imbere yawe nibyo koko irarumbaraye ndetse kubwawe urabona utazi iherezo, ariko humura Yesu ni muzima kandi aracyakora imirimo, erega byose bishobokera Uwizeye, “ Mbese mvuge kindi ki? Igihe cyandenga mvuze ibya Gideyoni n’ibya Baraki, n’ibya Samusoni n’ibya Yefuta, n’ibya Dawidi n’ibya Samweli, n’iby’abahanuzi -1 Abami 2.11; 1 Sam 1.1-25.1, baheshejwe no kwizera, gutsinda abami, no gukora ibyo gukiranuka no guhabwa ibyasezeranijwe, no kuziba iminwa y’intare, no kuzimya umuriro ugurumana cyane, no gukira ubugi bw’inkota no gukurwa mu ntege nke bagahabwa imbaraga nyinshi, no kuba intwari mu ntambara no kunesha ingabo z’abanyamahanga” (Abaheb11: 32-34)

Hagarara mu kwizera uhangare imisozi ikuri imbere, kubw’imbaraga z’ishobora byose irahinduka ibibaya…Zerubaberi yarwanye urwe nyamara nawe nanjye ntitworohewe, “Wa musozi munini we, wiyita iki? Ese ugira ngo ibyagereranwa n’imisozi ku buzima bwacu si byinshi ? Ariko Twishingikirije ku ijambo rwavuzwe n’ishobora byose ko izaturengera, kura amaso kubyo wari wishingikirije ho utumbire Yesu, we banze ryo kwizerwa, we cyambu kiduhuza n’Imana, urabona imbaraga z’Imana, nta kiyinanira, wicibwa integer n’uwo uriwe, icyo ukora, umuryango uvukamo cyangwa uburemere bw’ibiguhagaze imber, Si ku bw’amaboko yawe , si kubw’imbaraga zawe ahubwo ni ku bw’Umwuka Uwiteka”. Murakoze mbifurije kurengerwa n’Imana ishobora byose .Ernest RUTAGUNGIRA

Ibitekerezo( 9 9 9 9 9 9 9 9 9 )

IGENA ZIHINJISHI ESTHER

31-05-2012    03:33

Imana ishimwe cyane!Nibyiza kandi koko birashimishije kuba mufata umwanya wogushaka inyigisho nziza nk’izi zituma abantu bagize amahirwe yo kuzisoma bagira ubumenyi kubyo kubana n’Imana by’ukuri atari amarangamutima.Ubundi rero bibaye bishobotse byaba byiza ubu butumwa bugeze kuri benshi bashoboka kuko muri iyi minsi ubuyobe buragwiriye.IMANA ibahe umugisha natwe turi kumwe muri uyu murongo turabashyigikiye.Dufatanye kubaka ubwami bwa KRISTO TUZABIGORORERWA.

TURATSINZE NIYO EMMY

31-08-2012    05:42

Abakristu bakwiye kwigishwa ko ubuhanuzi butasohoye mugihe bwahanuriwemo, ntibuba bukomoka k’Uwiteka.Kandi ntibwakagombye guteranya uwahanuye n’Uwahanuriwe,kuko
abari munsi y’ijuru bose,bashobora kugerwaho n’imyambi y’UMWANZI.

Adda

27-04-2017    08:33

Yego Dona habwa umugisha.

KAYISHEMA

4-12-2017    06:23

Gusa ino nkuru ije yarikenewe cyanee Imana iguhe umugisha cyaneee kuko waragenzuye ibi bintu biri hose aho usanga ibinru birigufata intera cyaneee usanga abantu bari mu bipindi gusa gusa ntakwihana ibyaha byabaye urudaca. Imana y’amahoro iduhe ku mwuka wayo ugenzura ibyiyoberanya

Nsabimana.Emile

28-12-2017    23:39

Turabashimiye kubwo kutubwiriza ubutumwa bwiza Imana ibahe umugisha.icyo na bwira abantu.nukodukwiye kunvira Ijambo ry’Imana.bityo imigisha na masezerano Imana yatugeneye bikatugeraho kuko iyo twunviye nibwotuba turi mumugambi w’Imana . amen

Vincent

11-01-2018    13:39

mbashimiye kubwikicyigishomutugejejeho imana ibahe umugisha utagabanije.

NKUNDABAZA Daniel

17-01-2018    00:11

Njya nsoma ubutumwa mutanga nkumva nibwiza muzabona ingororano nimutagwa isari.

######

6-02-2018    04:04

Imana ibahe umugisha mukomereze aho,gusa ndashska kumenya byimbitse imikorere ya anti-kristu muri iki gihe

Adda

23-02-2018    02:09

Murakoze kubwiyo nkuru. nimukenera ubusobanuro bw’iyo nyenyeri muri Bible murabusanga muri Matayo 2:9 no mu byahishuwe 22:16.
Mu byahishuwe Yesu aravuga ati: Ni jye Gishyitsi cya Dawidi n’umwuzukuruza we, Ni jye Nyenyeri yaka yo mu ruturuturu. usahtse wahuza Dawidi n’inyenyeri usanga Yesu nawe yyari azi amateka y’icyo kirango. kandi ikigaragara nuko Yitirirwa Dawidi ariko isobanura Kristo.

Tanga igitekerezo

HABA HARI ICYEMEZO UFASHE NYUMA Y'UBU BUTUMWA ?