Ni irihe jwi ukwiye kuvuga igihe uruhijwe(...)

Kwamamaza

agakiza

Ni irihe jwi ukwiye kuvuga igihe uruhijwe n’umusaraba wawe?


Yanditswe na: Ubwanditsi     2020-11-06 06:33:40


Ni irihe jwi ukwiye kuvuga igihe uruhijwe n’umusaraba wawe?

Nuko isaha zibaye nk’esheshatu, haza ubwirakabiri mu gihugu cyose kugeza ku isaa cyenda, izuba ntiryava, umwenda ukingiriza Ahera cyane h’urusengero utabukamo kabiri. Yesu avuga ijwi rirenga ati “Data, mu maboko yawe ni ho nshyize ubugingo bwanjye.” Amaze kuvuga atyo umwuka urahera. Luka 23: 44-46

Mu maboko y’Imana niho washyira ubugingo bwawe ukizera umutekano, mu maboko y’Imana niho washyira ubugingo bwawe ukizera ko ejo hazaza ariho heza, mu maboko y’Imana niho washyira ubugingo bwawe ukizera ko izaburinda neza. Warirwaniriye ukora ibishoboka ariko hasigaye ko ubwira Imana ngo ‘ Mu maboko yawe niho nshyize ubugingo bwanjye’.

Turimo kwiga inyigisho zijyanye n’amwe mu majwi akomeye(adasanzwe) yagiye agaragara mu isezerano rishya, aho twabonye ijwi ry’urangururira mu butayu, ijwi rya Yohana Umubatiza ( ijwi ryo kwihana), Twabonye nanone ijwi ryahamirije Yesu avuye muri Yolodani Umwuka amuzaho afite ishusho nk’iy’inuma, Imana ikavuga ngo ‘Nguyu umwana wanjye nkunda kandi nkamwishimira (ijwi ritangira umuntu ubuhamya).”

Twabonye kandi ijwi ryo ku musozi wo kurabagirana, aho Imana igera igaha umuntu ubwiza. Twagarutse no ku ijwi rya 4, ijwi ribeshaho( ijwi ritanga Ubugingo). Ijwi ryakurikiyeho ni iryo ‘kurwana intambara’(ijwi umuntu ashobora kuvuga igihe arwana intambara)

Nkuko tubigezwaho na Pasiteri Habyarimana Desire, mu kiganiro ‘Ubutumwa bukiza’ gitambuka kuri Agakiza Tv, by’umwihariko mu rukurikirane rw’ibiganiro bizibanda kuri amwe mu majwi akomeye (adasanzwe) yabayeho mu isezerano rishya, tugiye noneho kugaruka ku ijwi rya 6, ‘ijwi ryo kuvuga igihe umuntu aruhijwe n’umusaraba wawe’.

“Data, mu maboko yawe ni ho nshyize ubugingo bwanjye”

Iri ni ijwi ryabayeho rikomeye ryabayeho ku musara, mwibuke ko Yesu yari yababaye mu buryo bukomeye. Yafashwe ari ku wa kane nimugoroba, arara akubitwa ijoro ryose, bamujyana mu nkiko nyinshi: Yagiye kwa Ana, yagiye kwa Pilato, bamujyana kwa Herode, bamugarura kwa Pilato, izi nkiko zose yazigiyemo ijoro rimwe, yarababaye pe! Yagiye no mu rukiko rwa kiyuda.

Yesu ubwo yajyaga kubambwa yahuye n’abagore baramuririra, ababwira ko badakwiye kumuririra ahubwo ko ‘bikorera imisaraba yabo bakamukurikira. Byasobanuraga iki? , byavugaga ko Yesu we yari arangije kubambwa ariko ko twe dusabwa kuzakomeza kubamba ingeso zacu za kamere ku musaraba. Bivuze ko kubambwa kwacu ni ukwa buri munsi.

Gukizwa ni ugutsindishirizwa, gukizwa ni ubuntu ariko uruhare rwacu ni ukubamba ingeso za kamere ku musaraba. Mu byaha niho twavukiye, twaremanywe gukiranirwa guhinduka ni urugendo. Kugira wa mutima wari muri Kristo Yesu bifata igihe uko ugenda uhinduka Imana igenda ibana nawe, kandi guhinduka birashoboka.

Dufite abahamya bo guhinduka , ibikigutsinda hari abandi babitsinze, hari abantu bakize inyota y’inzoga , hari abantu bakize irari ry’ubusambanyi. Hari abantu bababariye n’abatabasabye imbabazi, hari abantu bakunda n’abatabakunda, hari abantu bagwa neza kandi barahoze ari abanyamujinya n’abanyamahane.

Yesu adusaba kwikorera imisraba yacu

Imana ishobora kuguhindura bigashoboka, ibyo bikigutsinda hari abandi babitsinze. Nugera n’imbere y’Imana ntabwo uzasobanura impamvu yo gutsindwa: Ntabwo uzavuga ngo ‘Umugabo wanjye niwe wananije’ kandi hari abandi bshoboye kwihanganira abagabo babo. Ntabwo uzavuga ngo ‘Umugore wanjye yari mubi’, hari abandi babanye n’abagore babi barihangana. Imbaraga zafashije abo nizo ukwiriye kugira ngo nawe ubashe kurwana intambara nziza yo kwizerwa kugira ngo ubashe gutsinda muri iyi ntambara.

Yesu ari ku musaraba yaravuze ngo‘ Mu maboko yawe niho nshyize ubugingo bwanjye’. Ryari ijwi rikomeye kandi Imana yaramwumvise, ikibigaragaza ni uko ataheze mu mva yazutse. Ukwiye kuba umunyakuri ukabwiza Imana ukuri, erega Imana ikwitaho!, Imana izi ibyo ukeneye mu buzima bwawe bwa buri munsi izi buri kimwe cyose ukeneye.

Imwe mu ntambara ikomeye ni ukubamba ingeso za kamere ku musaraba, waragerageje ugeze igihe uvuga ngo ‘byarananiye’, warirwaniriye, ibyo byakunaniye bibwire Imana. Shyira ubugingo bwawe mu maboko y’imana. Mu maboko y’imana niho ukwiye gushyira ejo hawe hazaza, niho ukwiye gushyira ibikuremerera, niho ukwiye gushyira ibikunanije hanyuma ukizera ko Imana izagufasha kurangiza umugambi yakuremeye kubamo ku isi neza, ukazayivamo wararwanye intambara nziza.

Umva inyigisho yose: Impamvu ukwiriye gushira ubugingo bwawe mu maboko y’Imana

Source: Agakiza Tv

[email protected]

Ibitekerezo (0)

Tanga igitekerezo

Amategeko n'amabwiriza arakurikizwa

Haba hari icyemezo ufashe nyuma y'ubu butumwa ?