Nabwirwa n’iki ko ndi umuturage w’ijuru?

Kwamamaza

agakiza

Nabwirwa n’iki ko ndi umuturage w’ijuru?


Yanditswe na: Ubwanditsi     2020-08-06 11:15:43


Nabwirwa n’iki ko ndi umuturage w’ijuru?

Mu rwandiko intumwa Pawulo yandikiye itorero ry’Abafilipi 3:20-21, Hagira ati” Naho twebweho iwacu ni mu ijuru, niho dutegereje Umukiza ko azava ariwe Mwami Yesu Kristo, uzahindura uyu mubiri wo gucishwa bugufi kwacu akawushushanya n’umubiri w’ubwiza bwe, kuko afite imbaraga zo kumubashisha kwihindura byose”. Abakristo muri rusange dutegereje kuzajya mu ijuru nk’uko Pawulo yabihamije, gusa iyi ni ingingo iri mu rwego ruhanitse kubera ko niyo ubajije bamwe mubakijijwe ko bazajya mu ijuru, si benshi bakwitangira ubwo buhamya usanga hari ababishidikanyaho. Muri iyi nyigisho yateguwe na Pasiteri Habyariman Desire, Turasobanukirwa uko ubuzima bw’umuntu utegereje kujya mu ijuru bugomba kuba bumeze.

Umuntu uzajya mu ijuru agomba kuba afitanye isano naryo

Abakristo bakwiriye kuba mu buzima bwejejwe niba koko biteguye kuzajya mu ijuru. Kuba umuntu yizera akakira Yesu nk’umwami n’umukiza w’ubugingo bwe ni ibintu byiza kuko niryo banze ry’urugendo rugana mu ijuru, bigereranywa nko kwiyandikisha ko uzajya mu ijuru. Ariko ntibikwiye kugarukira aho gusa ahubwo umukristo agomba kwitoza kubaho ubuzima bwo kwigana Kristo bidasabye ko hari umucunga, cyangwa umugenzura ahubwo agafata iyambere akabyibwiriza. Hari ikintu kibabaje kigaragara hirya no hino cyo kuba abantu batarahindukiye kuba abakristo, ahubwo ari ukwinjira mu madini n’amatorero aho usanga bishoboka ko umuntu yahawe inshingano, akora imirimo mu nzu y’Imana ariko atarigeze avuka ubwakabiri. Ni ingenzi cyane kumenya ko hagati yo kuva mu mubyaha no kuba waba umuragwa w’ijuru harimo urugendo rwo guhinduka mu mikorere, mu myifatire no mu mutima . Icyakora mu buryo bworoshye ni uko umuntu wese aba azi ibiri imbere mu mutima we, aba azi imbuto yerera abandi uko zimeze, aba azi neza ko impanda ivuze yayumva cyangwa ko atayumva.

Umuntu uzajya mu ijuru agomba kuba yaravutse ubwa kabiri

Hari ibintu abakristo bakwiriye gutandukanya: Impano ,inshingano, umuhamagaro, kubatizwa, kuba umunyetorero( Membre) byose bitandukanye no kuba umuntu yaravutse ubwa kabiri. Iyo umuntu ari mu buzima bwejejwe nicyo kimenyetso cyo kuvuka ubwakabiri, bikagaragazwa nuko yiyambuye umuntu wa kera mbere yuko ahura na Kristo. Biratangaje cyane kandi bikanababza kuba hari abantu bubakira kubo baribo aho kwita ku gakiza k’imbere mu mutima no kuba mu buzima bwo kwezwa. Umunsi impanda izavuga ntabwo Kristo azareba ko umuntu yari umushumba, yari umuhanuzi mwiza, yatunganyaga imirimo y’itorero neza, yaririmbaga neza n’ibindi byinshi , ahubwo Yesu azahamagara uwagize umutima wejejwe.

Abantu bakwiye no gusobanukirwa ko imimirimo bakora mu Isi atariyo izabahesha kuba mu bwami bw’Imana, icyakora imirimo bakoze izabaherekeza ntabwo ariyo izabanza kurebwa ku mwanya w’imbere. Iyi ngingo abantu basabwa kuyumvana uburemere kuko muby’ukuri niba Imana itarigeze yihanganira ubwoko bawayo (Abisilaheri) ubwo yabatsemberaga mu butayu, Dutekereza ko izabasha kwihanganira abanyangeso mbi babaga mu nzu yayo? Umuntu kugiti cye yari akwiye kuzirikana ku iherezo rye, agaharanira guhinduka akavuka ubwa kabiri. Ibi ntibireba uwinjiye mu gakiza vuba, ntibireba ukiri muto , ntibireba ukora imirimo yoroheje mu nzu y’Imana ahubwo birareba buri wese aho ava akagera wamaze kwakira Yesu nk’umwami n’Umukiza w’ubugingo bwe, kabone yewe naho yaba ari uyoboye abandi, agomba kwezwa kubera ko urubanza ruzahera mubo imbere.

Umuntu uzajya mu ijuru agomba kuba afite amahoro yo mu mutima

Kugira amahoro yo mu mutima ntabwo bisobanuye ko umuntu afite ibyo akeneye byose cyangwa ibisaga, cyangwa se abayeho neza nk’uko benshi babimaranira, ahubwo bisonuye kugira umutima unyuzwe. Impamvu y’ibi ni uko n’abatunze byinshi bishobora kubabuza ubwami bw’ijuru cyangwa bigahungabanya ubusabane bwabo bari bafitanye n’Imana. Mu rwandiko rwambere intumwa Pawulo yandikiye Timoteyo (1 Timoteyo 6:6-10) ,Yahuguye abakristo ko iyo umuntu yubashye Imana afite umutima unyuzwe bitanga inyungu nyinshi bitewe n’uko mugihe umuntu yazaga mu Isi ntacyo yazanye kandi ntan’icyo azayivanamo ubwo azaba avuye mu mubiri. Umukristo rero ubasha kubona iby’ibanze mu buzima bwe akwiye kunyurwa nabyo kandi akabikora anubaha Imana.

Umuntu uzajya mu ijuru agomba kuba afite Umwuka Wera

Uwanditse indirimbo ya 107 mu gitabo cy’indirimbo z’agakiza, iyo ndirimbo yayihaye umutwe w’ikibazo kigira kiti” Twemezwa n’iki ko tuzagera mu ijuru?. Uyu muririmbyi ntiyahejeje abantu mukugumya bibaza icyababera ikimenyetso ko bazajya mu ijuru , ahubwo yashyizeho igisubizo ababwira ko ari Umwuka w’Ihoraho Imana Data. Ninayo mpamvu yakomeje ashishikariza abantu gushaka uwo mwuka wera kubera ko ari we utanga ibyiringiro ndetse no kurwanirira abakristo mu rugendo rwose bazanyuramo mu isi bajya mu ijuru. Hari ikintu kibabaje mu bakristo benshi muri iki gihe kuko bameze nk’abashyitsi kuby’umwuka wera nyamara umumaro w’umwuka wera ari ingenzi mu buzima bwabo.

Umwuka wera niwe waje gutegura itorero kandi ninawe uzarijyana mu ijuru , niwe utwigisha gusenga, Umwuka wera ninawe utunihira iminiho. None niba umuntu adafite umwuka wera, yagakwiye kwibwira ko azajya mu ijuru? Birababaje ko muri iyi minsi hari aho ugera abantu bakuzura umwuka wera abakristo benshi bagasa nk’abikanga, cyangwa batazi ibyo bintu ibyo aribyo. Bihangayikishije Imana cyane kuko abakristo batakiriye umuyobozi wabo wari ukwiriye kubarinda no kuberekera mu murimo w’Imana. Yego habaho abigisha beza, abashumba beza, abaririmbyi beza, abahanuzi beza, ariko iyo ibyo byose bikorwa nta mwuka wera ubirimo, ntamusaruro bitanga ku Mana. Birasba ko umuntu atakwishuka ko afite itike yo kuzaba mu ijuru, ahubwo agaca bugufi agashaka mu maso h’Imana akayinginga ikamuha umwuka Wera kuko ari uburenganzira bw’umukristo wese wakiriye agakiza.

Umuntu uzajya mu ijuru agomba kuba yamamaza Ubwami bw’Imana

Imirimo yose ikorwa n’uwamaze kwakira Yesu nk’umwami n’umukiza w’ubugingo bwe, Yagombye kuba ishingiye ku kwamamaza ubwami bw’Imana(Ubutumwa bwiza). Ubwo Yesu yari hafi gusubira mu Ijuru yahaye Imana raporo y’uko akazi kagenze ubwo yari mu Isi, kandi yagaragazaga ko yakoze umurimo we neza. Yesu icyo gihe yanabwiye Se wamutumye ariwe Mana ko n’abo yamutumyeho yabamenyesheje ibyo bagombaga kumenya, akanabakorera ibyo yasabwaga kubakorera. Ikindi Yesu nawe yanavuze ko abasigiye inshingano nk’uko Imana yabitegetse, yewe yanageretseho kubasabira mugihe bazaba basigaye muguhirimbanira gukora imirimo yabo mu isi, (Yohana 17: 1-26).

Hari ijambo Yesu yavuze rikomeye muri iki gice ku murongo wa 18, aho yagize Ati “Uko wantumye mu isi, nanjye niko nabatumye mu Isi”. Dushingiye kuri aya magambo ari muri raporo Yesu yahaye Imana, tukanagaruka kuri uyu murongo wa 18, biragaragara ko umuntu witegura kuba umuturage w’Ijuru yagakwiye kuba arimo kwamamaza ubutumwa bwiza mu buzima bwe bwa buri munsi no mubyo akora byose. Reka twibukiranye ko intama ibyara indi ntama idashobora kubyara ihene cyangwa irindi tungo, kandi iyo intama igize ibyago byo kutabyara yitwa ingumba. Ninako rero bibera umukristo utabasha kugira abo azana mu bwami bw’Imana. Niba koko umukristo yaragiriwe ubuntu n’Imana akarokorwa, yagombye no kurokora abandi bari mubyaha, bari mu mwijima wirimbukiro.

Twari dukwiye kuzavuga nka Pawulo washoje imirimo ye mu isi, yewe akanihamiriza ubwo yari agiye kuva mu mubiri aho yagiraga ati” Kuko njyeweho maze kumera nk’ibisukwa ku gicaniro, igihe cyo kugenda kwanjye gisohoye” ( 2Timoteyo 4:5-8). Umuntu witegura kujya mu ijuru rero yagakwiye kugira raporo nziza azamurika ku Mana agahirimbanira kugira abo azana kuri Kristo. Ikindi aha twavuga kigendanye n’imirimo, ni uko ibyo twakoze byose bizapimwa kandi ibyo twakoranye urukundo nibyo bizagira agaciro imbere y’Imana.

Inyigisho irambuye wayisanga hano:

[email protected]

Ibitekerezo (0)

Tanga igitekerezo

Amategeko n'amabwiriza arakurikizwa

Haba hari icyemezo ufashe nyuma y'ubu butumwa ?