Kuki ari ngombwa gutanga ubuhamya?

Kwamamaza

agakiza

Kuki ari ngombwa gutanga ubuhamya?


Yanditswe na: Ubwanditsi     2020-03-25 08:45:49


Kuki ari ngombwa gutanga ubuhamya?

Ubuhamya ni uburyo abizera basangizanya ubuzima banyuzemo cyangwa se ibyo Imana yabakoreye. Ubuhamya ni ingenzi kuko bufite akamaro ko kwigisha, bukomeza abari bacitse intege ndetse butera abantu gufata icyemezo cyo gukizwa bakakira Yesu nk’umwami n’umukiza.

Bibiliya itwibutsa ko ururimi arirwo rwica kandi rukaba arirwo rukiza ndetse ko abarukunda bazatungwa n’icyo ruzana (Imigani 18:21) ururimi rw’abakiranutsi rurakiza, ni byiza gutanga ubuhamya bwawe utitaye kuwo uriwe, ku byo wakoze kuko ubuhamya bugira umumaro wo gukiza ababwumva.

Mu gihe duhamije gukomera kw’Imana mu buzima bwacu,icyo gihe amagambo yacu azana ubuzima kuri buri wese uyumvise. “nabo bamuneshesheje amaraso y’umwana w’intama n’ijambo ryo guhamya kwabo” (Ibyahishuwe 12:11) tugomba gukoresha amagambo yacu tugafasha abatwumva tugatsinda gushidikanya n’ubwoba binyuze mu kumva aho twavuye.

Mu by’ukuri hari inyungu nyinshi mu gusangiza abandi ubuhamya bwawe kuko bikugirira umumaro ubwawe ndetse n’abakumva. Iyo twibukiranyije ibyo Imana yadukoreye, uko yabanye natwe, yadufashije.

Gusangizanya ubuhamya byubaka ukwizera kwacu bityo tukarushaho kugirira Imana icyizere ko naho byaba bikomeye tuzatabarwa nk’abo twumvise banyuze mu bihe bibi Imana ikabagirira neza.

Gusangizanya ubuhamya biradukomeza tukareka gucika intege kuko iyo wumvise umuntu wari ufite ibibazo bikomeye bigakemuka, wumva ko ibyawe byoroshye imbere y’Imana.

Byongeye kandi gusangizanya ubuhamya bitwibutsa ibintu byose Imana yadukoreye hatabuze mo na kimwe bityo tukarushaho kugirira Imana icyizere ndetse no gutambutsa ishimwe ryayo n’abatarakizwa bakayimenya.

Gutanga ubuhamya bikiza ubuzima bwa benshi kuko hari abantu baba bagendera mu ngeso mbi hanyuma bakumva ubuhamya bw’umuntu wakijijwe n’aho Imana yamukuye bagahita nabo bafata icyemezo cyo gukizwa.

Ku bw’ibyo nta mpamvu yo guhinyura ubushobozi bwo gusangiza abandi ibyo Imana yagukoreye binyuze mu buhamya kuko mu buhamya habaho guhumuriza imitima yihebye iguye umwuma kandi amagambo yawe yatuura ubuzima kuribo mu cyimbo cy’urupfu.

Ubuhamya bukiza abantu haba mu buryo bw’umubiri ndetse n’uburyo bw’umwuka. Mu gihe ugihumeka ukwiye gutanga ubuhamya.

Muri macye ubuhamya ni ingenzi ku bakristo kuko iyo dusangizanya ibyo twanyuzemo, bikomeza kwizera kwa benshi ndetse n’abakristo bashya bakagira umuhate wo gukomera ku murimo w’Imana bitewe n’uko babona Imana ibereye maso umurimo wayo.

Source: www.theodysseyonline.com , www.christianreporters.com

Ibitekerezo (0)

Tanga igitekerezo

Amategeko n'amabwiriza arakurikizwa

Haba hari icyemezo ufashe nyuma y'ubu butumwa ?