"KUKI NGERAGEZWA?", "KUBERA IKI MPURA(...)

Kwamamaza

agakiza

"KUKI NGERAGEZWA?", "KUBERA IKI MPURA N`INGORANE?"


Yanditswe na: Ubwanditsi     2020-04-14 15:03:39


Abantu benshi bakunze kwibaza ibi bibazo “Kiki, Kubera iki?”, iyo bahuye n’ingorane kuko bibwira ko iyo wizera Imana uba utandukanye n’ibigeragezo. Ese iyo myumvire ivahe? Ese Imana idusezeranya ubuzima buzira ibibazo?

Inyigisho nkizo zirakunzwe cyane, zivuga ko iyo uri umukiranutsi utongera guhura n’ibibazo n`ingorane kandi ko satani uba umutsinze, ukaba utandukanye nawe burundu. Ku ruhande rumwe nibyo! Ariko ku rundi ruhande nagirango nkubwire ko gukizwa, (kuba umukiranutsi) ari igikorwa cyo gutangiza urugamba hagati yawe n’umwanzi ariwe satani. Iyo ni intambara iri hagati y`ikiza n`ikibi, hagati y`umucyo n`umwijima(Yohana 1:5), hagati ukuri n`ikinyoma. Iyo utizera Imana, ntabwo satani yakugerageza kuko nubundi uba uri uwe, uba umukorera, icyo yagukorera gusa nukuguha ibihembo kandi Satani nta bihembo bizima agira, uretse urupfu kuko niwo mugabane we(Yohana 10.10).

Hahirwa umuntu wihanganira ibimugerageza, kuko namara kwemerwa azahabwa ikamba ry`ubugingo, iryo Imana yasezeranije abayikunda (Yakobo 1:12). Muyandi magambo umukristo utageragezwa ntabwo ashobora kwemerwa, kuko na Aburahamu, Sekuruza wo kwizera nawe yabanje kugeragezwa, kugeza ubwo yasabwe gutamba umwana we rukumbi yari yarabyaye mu busaza bwe. “Kwizera ni ko kwatumye Aburahamu atamba Isaka, ubwo yageragezwaga. Kandi dore uwasezeranijwe ibyasezeranijwe yari agiye gutamba umwana we w’ikinege, uwo yabwiwe ibye ngo “Kuri Isaka ni ho urubyaro ruzakwitirirwa.” Kuko yibwiye yuko Imana ibasha ndetse kuzura n’abapfuye, ni cyo cyatumye amugarurirwa nk’uzutse. (Abaheburayo 11:17-18)

Ibigeragezo ni kimwe mu bikoresho Imana yifashisha ngo Imenye ko kwizera kwacu gushikamye. Erega nubundi ubutwari si amagambo gusa ahubwo ni ibikorwa. Gukiranuka ntibizanwa no kwitwa umukiranutsi gusa. Oya. Nkuko izahabu igeragerezwa mu muriro ni nako umukiranutsi acishwa mu ruganda. Nonese hari umuntu wakwirata ubutwari bw’urugamba atarwanye? Bene ubwo butwari buzwi muri filime cyangwa mw`ikinamico gusa kuko byombi byifashisha amakuru n`amashuro nkabyankuru.

Kubizera ibigeragezo , bishobora kuba ishuri ry’Imana. Nkuko umwalimu ashobora gutanga ibizamini kugirango amenye urwego abanyeshuri be bamenyeho ibyo yabigishije!! Uko niko kwizera kwacu gukwiye kugeragezwa; kwihangana kwacu kugomba kugeragezwa kugirango kugaragare ko gushyitse (Yakobo 1:3-4).

Iyo urimo kugeragezwa uba uri mu mwanya mwiza wo kugaragariza Imana ko washikamye mubyo wizeye! Ntabwo ari umwanya wo kwivovotera Imana no kwibaza ngo:"kuki ibi bimbayeho?" kuki ntafite ibyo kurya, kuki banyirukanye mu nzu, kuki banyirukanye ku kazi?", kuki ntafite amafaranga y`ishuri, kuki? Kuki? Kubera iki?

Ndagirango nkubwire ko: nkuko buri mwarimu agenzura cyane ndetse akita ku banyeshuri be mu bihe byo kubaha ibizamini, arinako Imana itwitaho cyane kurusha kindi igihe cyose, kugirango irebe uko twitwara, muri ibyo bihe by`amage tuba twinjiyemo nkana, ku mpamvu zayo z`ubumana. Ndagirango mbabwire ko aha ariho Imana izamurira abantu bayo ikabashyira mu kindi cyiciro nkuko Aburahamu amaze kugaragaza kwizera kwe, yahawe izina ryo kwitwa Sekuruza w`abizera!

Urugero rwiza twese tuzi nuko Mwalimu nawe yimurira umunyeshuri we akamushyira mu kindi cyiciro cyangwa mu wundi mwaka igihe bigaragaye ko amasomo yigishijwe yayamenye. Igihe turi mu bigeragezo kandi nanone nicyo gihe Imana iba yitegura kuza kudutabara. Pawulo abivuga neza muri aya magambo:“Nta kigeragezo kibasha kubageraho kitari urusange mu bantu, kandi Imana ni iyo kwizerwa kuko itazabakundira kugeragezwa ibiruta ibyo mushobora, ahubwo hamwe n’ikibagerageza izabacira akanzu, kugira ngo mubone uko mubasha,kucyihanganira.”(1Abakorinto10:13)

Yakobo mwene Isaka wa Aburahamu, amaze kugirana ikibazo na mwene se Esawu, yagiriwe Inama na Nyina Rebeka, yo guhungira kwa nyirarume. Yasabwaga kunyura mu butayu kandi ari wenyine. Ushobora kwibaza uko byamugendekeye. Izo nkuru turazisanga mu gitabo cy`itangiriro 28:11-12: “Agera ahantu araharara buracya, kuko izuba ryari rirenze. Yenda ibuye mu mabuye y’aho araryisegura, aryamaho arasinzira.

Ararota, abona urwego rushinzwe hasi rukageza umutwe mu ijuru, abamarayika b’Imana baruzamukiraho bakarumanukiraho.”

Mu mateka ya Yakobo, ntiyari yarigeze abona inzozi nkizo, kugeza ubwo yageze mu bibazo bikomeye byo kugenda urugendo rurerure wenyine, mu butayu, mu gicuku cya ninjoro. Urwo rwari urugendo rugoye ubuzima bwe kuko yari yarakuriye imbere ya Se na Nyina. Ubuzima bwo guhangayika ntiyari abuzi kuko umuryango we wamumenyerega ibyo akeneye. Icyo yashoboraga gukora cyonyine ari nacyo yakoze, yafashe ibuye ryari hafi ye, arangije araryisegura, maze arasinzira. Ubundi ibibazo bituma nyirabyo adasinzira, keretse uwiseguye ibuye.

Iryo buye Dawidi yigeze kurivugaho muri Zaburi 118:22; Yesu nawe ubwe yabisubiyemo, igihe yinjiraga mu rusengero, icyo gihe ngo abatambyi bakuru n`abakuru bubwo bwoko(bw`Abayuda) baza aho ari yigisha, baramubaza bati “ Ufite butware ki bugutera gukora ibyo? Ni nde wabuguhaye?(Matayo 21:23); amaze kubacira imigani arababaza ati “ Ntimwari mwasoma mu byanditswe ngo ‘Ibuye abubatsi banze, niryo ryahindutse irikomeza imfuruka! Yungamo ati Ibyo byavuye k’ Uwiteka, kandi ni ibitangaza mu maso yacu (Matayo.21:42).

Mu bihe by`amage, mu bihe bigoye, igihe udashobora kureba aho ujya naho uva, kuko izuba ryakurengeyeho. Uri ahantu ha wenyine aho abanyarwanda bita ngo ‘aho umwana arira Nyina ntiyumve’. Aho ni ahantu udashobora kujya imbere cyangwa ngo usubire inyuma kuko icyamurikiraga urugendo rwawe kiba kitagihari. Uziyibutse ikintu kimwe gusa; uzibuke Yesu wawe ariwe buye, maze umwisegure, umwishingikirizeho, umwizere, wongere umwiringire. Nubikora uzabona urwego rurerure ruguhuza n`ijuru (Yohana 1:51: Ni ukuri ni Ukuri, ndababwira yuko muzabona ijuru rikingutse, abamarayika b`Imana bazamuka bavuye ku Mwana w`umuntu, bakamumanukiraho).

Ese uri mu butayu bwa wenyine? Ese uri wenyine? Ese uri mu bihe by`amage? Humura, iki nicyo gihe imana igiye kukwiyereka! Ese izuba ryarenze mu buzima bwawe? Urasa nutazi aho uva naho ujya? Uwo wari wiringiye yagutengushye? Ibyo wari wiringiye byose byanze gukora? Igisubiza nta kindi. Isegure ibuye, iryo buye niryo Kristo. Yesu aragukunda, agufitiye imbabazi ndetse n`umutima y`urukundo.

Murenzi Eric Tamba

Ibitekerezo (0)

Tanga igitekerezo

Amategeko n'amabwiriza arakurikizwa

Haba hari icyemezo ufashe nyuma y'ubu butumwa ?