Israel Mbonyi agiye kuririmba mu iserukiramuco

Kwamamaza

agakiza

Israel Mbonyi agiye kuririmba mu iserukiramuco rya Iwacu Muzika Festival


Yanditswe na: Ubwanditsi     2020-09-22 03:14:53


Israel Mbonyi agiye kuririmba mu iserukiramuco rya Iwacu Muzika Festival

Umuhanzi ukora umuziki wo kuramya no guhimbaza Imana, Israel Mbonyi agiye kuba uwa kabiri mu bahanzi baramya ndetse bagahimbaza Imana baririmbye mu iserukiramuco rya Iwacu Muzika Festival.

Kuva iri serukiramuco ryatangira umwaka ushize nta wundi muhanzi w’umuramyi wari warigeze arigaragaramo. Kuri iyi nshuro ya kabiri batekerejweho, ndetse Patient Bizimana ni we wabimburiye abandi mu bakora umuziki uhimbaza Imana.

Igitaramo cyo ku wa Gatandatu tariki 26 Nzeri 2020, Israel Mbonyi azagihuriramo n’abahanzi bahatanye muri ArtRwanda-Ubuhanzi bafite impano zidasanzwe mu gushushanya, imideli, ubuvanganzo n’ibindi.

Azaririmbira ku rubyiniro rumwe na Bukuru uherutse gusohora amashusho y’indirimbo yise ‘Indamu’. Ni mu gihe Diana Hirwa azagaragaza impano ye mu gushushyanya.

Iki gitaramo kizaca kuri Televiziyo y’u Rwanda (RTV), guhera saa mbili n’iminota 45’ kugeza saa yine z’ijoro no ku mbuga nkoranyambaga nka Facebook, Twitter, Facebook na Youtube.
Mbonyi ni uwa kabiri mu baramyi ugiye kwitabira iri serukiramuco

Israel Mbonyi agiye kuririmba muri Iwacu Muzika Festival mu gihe amaze iminsi ateguza abafana be n’abakunzi b’umuziki muri rusange, indirimbo ye nshya yise “Urwandiko”.

Agiye kuririmba muri Iwacu Muzika Festival abisikana n’umuramyi Patient Bizimana wabaye umuramyi wa mbere waririmbye muri iri serukiramuco, mu gitaramo yakoze ku wa 25 Nyakanga 2020.

Israel Mbonyi ukunzwe mu ndirimbo zitandukanye yaherukaga gukorera igitaramo kuri internet, ku wa 20 Kamena 2020, yategujemo Album ye nshya.

Afite indirimbo zijyana abantu mu mwuka nka ‘Karame’ imaze kurebwa n’abarenga miliyoni eshatu, ‘Nzaririmba’ yarebwe n’abasatira miliyoni ebyiri, ‘Nkwiye kurara iwawe’, ‘Hari ubuzima’, ‘Number One’, ‘Ku marembo y’Ijuru’ n’izindi.
Israel Mbonyi yizeza abamukurikira ko bazungukira byinshi muri iki gitaramo

Iwacu Muzika Festival 2020 iri kuba ku nshuro ya kabiri yateguwe na East African Promoters ku bufatanye na Banki ya Kigali (BK), ArtRwanda-Ubuhanzi, Minisiteri y’Urubyiruko n’Umuco, Tembera u Rwanda, Intare Conference Arena na Ralc.

Mu 2019 Iwacu Muzika Festival yazengurutse intara zose z’igihugu, abahanzi b’intoranywa basusurutsa abakunzi babo, gusa kuri iyi nshuro iri kubera kuri Televiziyo y’u Rwanda kubera icyorezo cya Covid-19 kibasiye Isi muri iki gihe. Ifite intego igira iti "Susurukira MuRugo".

Source: inyarwanda.com
[email protected]

Ibitekerezo (0)

Tanga igitekerezo

Amategeko n'amabwiriza arakurikizwa

Haba hari icyemezo ufashe nyuma y'ubu butumwa ?