Inkomoko y’umuhate wa Nambayisa, umuforomo(...)

Kwamamaza

agakiza

Inkomoko y’umuhate wa Nambayisa, umuforomo umaze imyaka 20 yita ku ndembe


Yanditswe na: Ubwanditsi     2020-09-20 03:34:57


Inkomoko y’umuhate wa Nambayisa, umuforomo umaze imyaka 20 yita ku ndembe

Shadrack Nambayisa yakuze ashaka kuzaba umuganga mu buvuzi rusange, gusa ubwo yigaga mu mashuri yisumbuye, yaje kwisanga mu ishuri ry’ubuforomo.

Urukundo rwo kwita ku barwayi nk’umuforomo rwakuze ubwo yari ari kwimenyereza uwo mwuga, bitewe n’inkomere nyinshi yagendaga abona zikeneye kwitabwaho mu buryo bwihariye.

Mu kiganiro yagiranye na Rwanda Today, Nambayisa w’imyaka 53 yavuze ko kuri ubu akora mu bitaro byitiriwe umwami Faisal aho ari umuyobozi w’abaforomo mu ishami ry’indembe.

Yagize ati “Natangiye gukora kuri King Faisal mu 2007 nk’umuforomo ushinzwe ibyo gutera ikinya ku barwayi bagiye kubagwa. Hagati ya 2009 na 2012, natangiye kwiga muri KHI (Kigali Health Institute) mu bijyanye no kwita ku barwayi barembye cyane.”

Nambayisa, umubyeyi w’abana batatu yavuze ko nyuma yaje gukomereza icyiciro cya kabiri cya Kaminuza muri Kaminuza ya KwaZulu Natal, akomereza icyiciro cya gatatu muri Kaminuza y’u Rwanda ishami ry’Ubuvuzi, aho yakurikiranye ibijyanye no kwita ku barwayi barembye no kumenya niba ubuvuzi bahabwa buri kubafasha cyangwa butabafasha (Critical Care and Trauma Nursing).

Ati “Ni igihe uba ukurikirana imbere mu ntekerezo z’umurwayi, ukareba niba ari koroherwa cyangwa atoroherwa ndetse no kumenya niba umurwayi afata imiti yose agenewe uko bikwiriye.”

Nambayisa yavuze ko yakuze yifuza kuzaba umuganga, nyuma yo kubona uburyo batabara ubuzima bwa benshi barembye.

Ati “Hari abatekereza ko ubuforomo ari ubw’abagore gusa ariko siko biri kuko iyo ukunda ibyo ukora, nta na kimwe cyaguhagarika. Nakuze nshaka gufasha abarwayi mu buryo bwose nshoboye.”

Ishusho itazamuva mu mutwe, ngo ni iy’umwana wamupfiriye mu maso arwaye iseru mu ishuri rimwe yigishagamo, bitewe n’umuganga wamurangaranye, ntamwiteho.

Ati “Umwana yari arwaye iseru afite ibibazo byo guhumeka kubera umuganga utaramwitayeho, afata umubyeyi amwohereza kugura imiti aho kwihutira kuvura umwana.”

Nambayisa avuga ko umunsi we utangira saa moya za mu gitondo ukarangira saa moya z’ijoro. Ataha amaze gusuzuma uko abarwayi bose ari kwitaho muri iyo minsi bameze.

Yavuze ko ingorane akenshi bahura nazo ari uko ubuforomo bwihariye bwo kwita ku ndembe bukorwamo n’abantu bake, ku buryo umuforomo aba afite abarwayi benshi bo kwitaho.

Kubera ubwo buke kandi, bituma hari n’izindi nshingano mu buvuzi agenda ahabwa zigamije gusigasira amagara y’abarwayi.

Shadrack Nambayisa yavuze ko urukundo rwe rw’ubuvuzi rwavuye mu buryo abaganga batabara ubuzima bw’indembe

Source: Igihe

[email protected]

Ibitekerezo (0)

Tanga igitekerezo

Amategeko n'amabwiriza arakurikizwa

Haba hari icyemezo ufashe nyuma y'ubu butumwa ?