Advertisements

agakiza

Advertisements

agakiza

Ibintu by’ibanze ushobora kwirinda bikagufasha(...)

Kwamamaza

agakiza

Ibintu by’ibanze ushobora kwirinda bikagufasha kugira ubuzima buzira umuze(Igice cya I).

byanditswe na: Ubwanditsi     2019-05-13 09:09:12

agakiza

Muri iyi nyandiko tugiye kubagezaho bimwe mu by’ibanze ushobora guhindura ubuzima bwa buri munsi mu mibereho yawe, bikagufasha kwikingira indwara zimwe na zimwe, bityo ukabaho ubuzima budahorana umuze mu mubiri.

Mu buzima bwa buri munsi, hariho ibintu tudakora, tutitaho, kandi uko kutabyitaho, ntitubikore, usanga kenshi aribyo bidushyira mu kaga ko kurwara indwara zitandukanye, tukazirwara aritwe dusa nkaho tuzikururiye, kandi byari byoroshye ko twazirinda, akaba ariyo mpamvu twifuje gufasha abadukurikira , tubagezaho iby’ibanze umuntu ashobora kwirinda mu rwego rwo guca ukubiri n’ uburwayi butandukanye.

Muri ibyo twavugamo ibi bikurikira:

Kutaboneza imirire: Kurya ni igikorwa k’ingenzi mu buzima bw’umuntu, kuva avutse, kugeza apfuye, ibyo umuntu arya biri mu byibanze bigena ishusho y’ubuzima bw’umubiri we, haba uko ugaragara, uko uhangana n’indwara, n’ibindi. Ni byiza rero kwita ku mafunguro ufata cyane ku bushobozi ubwaribwo bwose, bishoboka kuboneza imirire no kurya indyo yuzuye.
Indyo yuzuye ukwiye kwibuka ko iba igizwe n’amatsinda agera kuri atandatu(6), ibinyabisukari, ibyubaka umubiri, ibinyamavuta cyangwa se ibinure, vitamine zitandukanye, imyunyungugu, ndetse n’amazi.ibi byose birashoboka ko wabifata kuri buri funguro ryawe, kandi bigendanye n’ubushobozi bwawe.Aha icyo ugomba kuzirikana n’ingano y’ibyo urya cyane cyane ukitondera ku ngano y’ibinyamavuta ndetse n’ibinyabisukari, bikaba aribyo bike ku isahane yawe, hanyuma imbuto n’imboga ukaba arizo ugira nyinshi, kuko arizo dusangamo ziriya vitamine ndetse n’imyunyungugu, ukwiye kwibuka kwita ku bwiza(Quality), bw’amafunguro ufata, ukibanda ku kurya ibimera ugabanya ibitunganirizwa mu nganda, ndetse n’ibikomoka ku matungo, ukabifata ku kigero cyo hasi cyane, nibyiza kandi guhinduranya amafunguro ufata, kuko bigufasha kutagira intungamubiri umubiri ukena dore ko ari nabyo biba imbarutso yo kurwara indwara nyinshi zitandukanye, ziterwa n’imirire mibi.

Kongera umunyu mubisi mu biryo: ni amakosa akomeye cyane, kandi kuyirinda birashoboka, kuko umunyu mwinshi ndetse mubisi, bigira ingaruka nyinshi cyane mu mubiri by’umwihariko ku buzima bw’umutima ndetse n’ubwimijyana n’imigarura, si ibi gusa kuko uko urya umunyu mu bisi, cyangwa se mwinshi, byongera n’ibyago byo kurwara uburwayi butandukanye muribwo twavugamo nka stroke ndetse na kanseri zitandukanye cyane cyane kanseri y’igifu.

Kudakora imyitozo ngororangingo.Imyitozo ngororangingo ni uburyo bwiza bwo gufasha umuntu kugira amagara mazima, by’umwihariko mu kongerera imbaraga z’ubwirinzi kamere, zo guhangana n’indwara ziwuzahaza ndetse n’ubwandu butandukanye, aha twabibutsa ko udakwiye gusuzugura ingano y’imyitozo uko yaba ingana kose, nubwo yaba ari agahe gato igira ingaruka nziza ku buzima, siporo rero ni urukingo rw’indwara nyinshi zitandukanye, ni byiza kwitoza kubaho ubuzima ukora imyitozo ngorora ngingo kuko bizagufasha guca ukubiri n’uburwayi butandukanye

Kuryama utogeje amenyo nyuma yo kurya: mu kanwa habamo uruhurirane rwa bagiteri, virusi ndetse n’imiyege, ibi binyabuzima byose, biba ari bito cyane, kuburyo kubibonesha amaso bidashoboka, byose bikaba bibarizwa mu muryango wa mikorobe. Izi mikorobe zose ntabwo ariko ari mbi ku buzima bw’ikiremwamuntu, muri izo harimo izifasha urwungano ngogozi kuba rwagira ubuzima bwiza ndetse zikabasha no gukora neza, izindi rero ari nazo mbi, zangiza ishinya, zangiza amenyo akaba yatakaza ubwiza bwayo, kuva amaraso mu kanywa cyane cyane mu gihe uri kuyakorera isuku, mu rwego rwo kugabanya ibi byago rero ni byiza kwibuka koza amenyo mbere yo kuryama, kuko iyo utayogeje bifasha izi bagiteri mbi kororoka bitewe n’ibiryo biba byasigaye mu kanywa cyane cyane mu gihe wariye ibiryo biryohereye, ndetse n’ibirimo amavuta menshi.

Kutanywa amazi: Ubushakashatsi bugaragaza ko amazi ari umuti ukomeye uvura indwara nyinshi ziterwa ahanini n’ibibazo binyuranye bituma mu mubiri amazi aba make, zimwe muri izo twavugamo: umuvuduko ukabije w’amaraso, igifu, kanseri, diyabete y’ubwoko bwa kabiri, asima, indwara zo mu bwonko no mu rutirigongo, iz’uruhu, impyiko,... izi zose n’izindi tutarondoye, zishobora guterwa no kutanywa amazi ahagije.

Ikigero cy’amazi umuntu akwiye kunywa, gihindagurika bitewe n’umuntu, hagendewe ku gitsina(gender),imyaka, ikigero, ubuzima bwe uko buhagaze n’ibindi, ni byiza ko uyoborwa na muganga akakugira inama ku bijyanye n’ingano y’amazi ukwiye kujya unywa. Ikindi cyo kwitaho ni uko ari byiza, kunywa amazi mu gihe nta kindi gikorwa kiguhugije urimo, kugira ngo abashe kugera mu bice byose akenewemo mu buryo bworoshye.

Kuraza telefone itajimije hafi yawe : ibi bigira ingaruka zikomeye ku buzima.Mu bihugu byinshi ngo umubare w’abantu bakuze baryamana terefoni zaka uri ku kigereranyo cya 50%, naho ku rubyiruko ho bigera kuri 75%, iyi mibare ikaba ari myinshi ugereranyije n’ingaruka bigira ku buzima; nk’uko tubikesha Top Santé.fr.

Uretse ubu burwayi kandi, ngo kugira terefoni ifunguye hafi igihe uryamye ntibituma usinzira neza kuko uhora witeguye kwitaba cyangwa gukora ibindi byatumye uyiyegereza, nabyo bikagabanya amahirwe yo kuruhuka k’ubwonko.

Abahanga mu by’ubuzima bavuga ko kugira terefoni icanye hafi yawe igihe uryamye ari bibi kuko bifite ingaruka nyinshi zirimo na kanseri yo mu bwonko.

Kuryama wegereye terefoni itazimije bituma imiyoboro y’amashanyarazi adakaze ijyana amajwi inyura mu bwonko ikabwangiza. Ngo kuba ubwonko buba buruhuka butarimo gukora bisanzwe, bituma iyangirika ryabwo ryihuta kurusha kuvugira kuri terefoni mu bihe bisanzwe. Ibi kandi ngo birushaho kugira ingaruka cyane cyane ku bana bato.

Inkuru yo mu kinyamakuru Daily Mail yo ivuga ko abantu 8 ku 10 bakoresha terefoni muri ubwo buryo bubabangamira. Abahanga bakaba bavuga ko umuntu ukeneye kwirinda akwiye gufunga terefoni ye mu masaha 2 cyangwa 3 mbere y’uko aryama kugira ngo asinzire neza nta kimubangamiye.

Bakomeza bavuga ko kubera imiterere y’urumuri rwa terefoni cyane cyane urufite ibara ririmo ubururu, iyo umuntu akangutse akarubona rutuma atongera kwisubiza ibitotsi vuba, bigatuma arara amajoro.

Ubushakashatsi bwakozwe mu mwaka wa 2008, bwagaragaje ko umuntu ugiye kuryama yakoresheje terefoni byibura mu minota 30 mbere yo kuryama, bimusaba byibura iminota iri hagati ya 6 na 8 ngo abone ibitotsi ugereranyije n’igihe yari kubibonera.

Ibi tuvuze ndetse n’ibindi byinshi tutabashije kurondora, ni byiza kubyitaho, kugira ngo ubashe kugira ubuzima bwiza, kwirinda biruta kwivuza.
Ntuzacikwe n’igice cya II.

[email protected]

Ibitekerezo( )

Tanga igitekerezo

HABA HARI ICYEMEZO UFASHE NYUMA Y'UBU BUTUMWA ?