Ese bibiliya ivuga iki ku bijyanye no(...)

Kwamamaza

agakiza

Ese bibiliya ivuga iki ku bijyanye no guhigura umuhigo?


Yanditswe na: Ubwanditsi     2019-12-05 06:19:46


Ese bibiliya ivuga iki ku bijyanye no guhigura umuhigo?

Umuhigo ni isezerano umuntu aba yagiranye n’Imana akiyemeza ko azakora icyo yiyemeje. Bibiliya itwereka cyane cyane mu gitabo cy’Abalewi hatwereka ko umuhigo wabaga ari igitambo. Ubwoko bwa Isiraheli bwagiye bwakunze kwica indahiro bagiranye n’Imana ariko ntibyabaguye amahoro.

Inkuru ya Yefuta igaragaza guhiga umuhigo ukawuhigura nta kintu na kimwe urebyeho. Ubwo yari ayoboye Abislaheli mu rugamba rwo kurwanya Abamoni, Yefuta yahize umuhigo abwira Imana ko nibana nabo ku rugamba bagatabarukana insinzi, ikizasohoka bwa mbere mu rugo rwe azagitambira Imana. Yagize umugisha atabarukana insinzi icyaje gusohoka bwa mbere ni umukobwa we ariko Yefuta yahise yibuka isezerano rye n’Imana nuko aramutamba.

Yesu yigishije ku bijyanye n’umuhigo agira ati: ntimwumvise ko abakera babwiwe ngo: “ntukarahire ibinyoma, ahubwo uzakorere umwami Imana ibyo wayirahiriye.”ariko jyeweho ndababwira kutarahira rwose, naho ryaba ijuru kuko ariryo ntebe y’Imana, cyangwa isi kuko ari yo ntebe y’ibirenge byayo. Ahubwo ijambo ryanyu ribe yee, oya, ibirenze ibyo bituruka ku mubi. Matayo 5: 33-37

Aya magambo Yesu yayabwiye abantu kugirango yibutse abanyamadini ndetse n’abayobozi ko bakwiye kurinda no guhigura imihigo baba barahize mu izina ry’Imana ubwo bahabwaga inshingano zo kuyobora ubwoko bw’Imana. Aha si abayobozi b’amadini gusa ahubwo n’ab’inzego izo arizo zose zaba iza Leta cyangwa iz’abikorera bose baba bagomba gushyira mu bikorwa ibyo bemereye imbere y’Imana.

Byongeye kandi Zaburi ya 15:4 itugaragariza ko umuntu wese iyo ava akagera agomba kuzirikana indahiro yarahiye haba mu byiza cyangwa mu bibi. “Mu maso ye umunyagisuzuguriro arahinyurwa, ariko abatinya uwiteka arabubaha icyo yarahiriye n’iyo cyamugirira nabi ntiyivuguruza.” (Zaburi 15: 4)

Mu by’ukuri Yesu ntabwo yarwanyaga amasezerano cyangwa imihigo abantu bagirana hagati yabo, ahubwo yashakaga kwibutsa abantu ko batagomba kurahira indahiro zidahwitse urugero: ndarahiye kandi mbishyizeho umutima kandi nizeye gupfa mu gihe bibaye ngombwa, ndakabura mama n’izindi ndahiro nyinshi. Gusa we yabasabaga kuzirikana no gushyira mu bikorwa ibyo biyemeje.

Muri macye ingamba nyakuri ni uko umuntu akwiye kugira amakenga mbere yo kurahira cyangwa guhiga umuhigo akabanza akareba niba koko bitazamuteranya na bagenzi be cyangwa n’Imana. Nk’uko umubwiriza yavuze ko guhiga umuhigo ntuwuhigure birutwa no kutawuhiga, dusabe Imana idushoboze kubahiriza ibyo twiyemeje.

Source: www.gotquestions.org

Ibitekerezo (0)

Tanga igitekerezo

Amategeko n'amabwiriza arakurikizwa

Haba hari icyemezo ufashe nyuma y'ubu butumwa ?