Ese Imana yita ku marira yacu?

Kwamamaza

agakiza

Ese Imana yita ku marira yacu?


Yanditswe na: Ubwanditsi     2020-09-02 09:07:03


Ese Imana yita ku marira yacu?

Kuva mu binyejana byashize, Abakristo bise iyi si "ikibaya cy’amarira" rimwe na rimwe, turarira bitewe n’uko umubabaro w’ubuzima wahindutse karande, ikindi gihe turarira iyo amakuba atunguranye yikubise ku buzima bwacu ashaka kuburoha ubuzima bwacu mu rwobo, amarira ntazabura kubaho mu isi ariko igishimishije ni uko Imana yita ku marira yacu.

Ku bantu nk’abo bababaye kandi barira, hari ubutumwa Bibiliya ibaha aho ivuga ko kurira ari ibintu bisanzwe muri iyi si yuzuye amakuba ariko ivuga yeruye ko Imana yita ku marira kandi ifitiye impuhwe abarira.

Imana ireba amarira yacu
"Mbese ibishwi bibiri ntibigura ikuta rimwe? ariko nta na kimwe kigwa hasi ngo gipfe so atabizi" (Matayo 10:29)

Igihe Hagari yazamuye ijwi rye mu butayu bwa Berisheba, Imana yaramwumvise (Itangiriro 21:17). Igihe Hana yariraga cyane mu rusengero rw’Uwiteka, Imana yarabibonye kandi irabyibuka(1 Samweli 1:10, 17). Igihe Dawidi yarambirwaga akinuba, Imana ntiyigeze irambirwa kumutega amatwi (Zaburi 6: 6-9).

Nk’uko Imana yabwiye Umwami Hezekiya, niko yabwira buri mwana wayo iti: "Numvise isengesho ryawe; Nabonye amarira yawe ”(2 Abami 20: 5).

Imana yita ku marira yacu
Benshi muri twe twumva dufite ipfunwe ry’amarira yacu, cyane cyane iyo abandi bayabonye. Mu muco usanga ahenshi bitemewe kurira aho usanga umuntu aje akakubwira ati: "Ihanagure amarira vuba na bwangu ".

Ku Mana ntabwo ariko bimeze kuko ihorana impuhwe za kibyeyi ziyihatira kwiyegereza imitima imenetse no gupfuka inguma z’imibabaro yabo (Zaburi 147: 3). Imana yavuze iti: "Hahirwa mwebwe murira ubu" (Luka 6:21) Imana ntizagutenguha ngo yirengagize kwita ku marira uririra muri iyi si yangiritse.

Igihe Yesu yasangaga igikundi cy’abantu mu mugi wa Nain barimo kwitegereza umupfakazi waririraga umwana we, Yesu yamugiriye impuhwe (Luka 7:13) nyuma yaho igihe Mariya yaririraga ku birebge bya Yesu amubwira urupfu rwa musaza we Lazaro, ubwo Yesu yageraga ku gituro yararize (Yohana 11:35) n’ubwo Yesu yari afite ubushobozi bwo kumuzura, ntiyamubujije kurira.

Kuko Yesu adukunda kandi azi uburyo ibibazo byacu bitubabaza, ntahita aca inzira za bugufi ngo ahite akemura ibibazo byacu, ahubwo abanza kwifatnya natwe mu kababaro byaba ngombwa akarirana natwe hanyuma akaza kudusubiza.

Amarira yacu azahinduka ibyishimo
Amasaha make mbere yuko Yesu agambanirwa, ageragezwa, akubitwa, abambwa ku musaraba,yabwiye abigishwa be ati: "Ni ukuri, ni ukuri, ndababwira yuko muzarira kandi mukaboroga, ariko isi izishima. Muzababara, ariko umubabaro wanyu uzahinduka umunezero ”(Yohana 16:20). Agahinda no kwishongora bizahunga. Amarira azakama. Agahinda kazashira niko byagenze kubigishwa ba Yesu, Kandi ni ko bimeze kuri buri mwana w’Imana.

Kwizera ko Imana izahindura amarira yacu ibyishimo ntabwo bivuze ko tutakibabazwa. Ariko bivuze ko tugomba kumunambaho mu mibabaro yacu kandi twige kuririra Imana aho gutuka izina ryayo.

Muri macye, mu isi nta mahoro yuzuye twahabonera kuko ni ikibaya cy’amarira ariko icyo dusabwa ni ukwizera ko Imana yita ku marira yacu kandi ikagira icyo ikora ku bituriza bityo rero tujye twibuka kuyibwira ibituriza kandi twe kugira ubwoba kuko arakunda ndetse afasha ababaye.

Source: www.desiringgod.org

[email protected]

Ibitekerezo (0)

Tanga igitekerezo

Amategeko n'amabwiriza arakurikizwa

Haba hari icyemezo ufashe nyuma y'ubu butumwa ?