Kubabarira

Kwamamaza

agakiza

Ndifuza kubagezaho mu ncamake uko narokotse Jenocide yakorewe Abatutsi. Mu w’1994 ubwo Jenocide yakorwaga ku mugaragaro nari mfite imyaka 18, ndi umukobwa w’ inkumi wiga mu mashuli yisumbuye. Icyo gihe nasengeraga mu idini Gatolika, ndi Umukarisimatike. Nize mu ishuri ry’Ababikira ryari ku Kibuye ho mu ntara y’Uburengerazuba, mpabonera uburere bwiza bwangiriye umumaro mu buzima kugeza uyu munsi.

Nakundaga gusenga cyane, ariko bimwe by’ idini bisanzwe n’ubwo muri jye harimo gukunda Imana. Mu w’1994 Imana yarandinze mu buryo bukomeye cyane, kuko aho nahungiraga hose napfaga kuhashingura ikirenge bagahita baza kwica Abatutsi. Abo twabaga twihishe hamwe bafataga ibihe byo gusenga cyane ngo Imana iturinde, jyewe nkabyanga nkababwira ko Imana yadukuyeho amaboko nta mpamvu yo gusenga.

Twari dufite umwana w’umurokore mu muryango twanganaga mu myaka, tukumva ko yasaze kuko yagiye mu barokore ari akiri muto nta cyo abuze. Mu bamusererezaga cyane nari ndimo. Muri Jenocide naramubwiraga nti “Senga wowe, jyewe nzazamuka ku ijipo yawe tujye mu ijuru.” Imana imuhe iruhuko ridashira kuko yaratashye muri ibyo bihe. Icyo gihe jyewe n’iyo nageragezaga gufata Bibiliya ngo nsome sinayumvaga, kuko nk’uko tubizi mu idini Gatolika tutatozwaga gusoma ibyanditwe byera. Ubwo rero kuko nari no mu gihe cya adolescence nahitaga nigira mu ndirimbo za Salomo ni zo numvaga cyane. Ibaze nawe indirimbo za Salomo muri Jenocide! Yesu azi byinshi kandi adufitiye amabanga menshi.

Muri Jenocide nageze aho mba nk’icyihebe, kuko byageze ubwo ntazi niba ari jyewe jyenyine usigaye cyangwa hari abandi. Gusa benshi bo mu muryango wanjye bari barangije kubica tukiri kumwe. Naje kwisanga i Gitarama ahantu ntazi, mu bantu ntazi nkajya njya kwitanga kuri bariyeri ngo banyice ariko ntibanyice nkongera nkasubira aho navuye gutyo gutyo… Ibaze nawe bariyeri y’i Kabgayi uko yari imeze!

Nyamara hari imirambo myinshi ‘ babaga bamaze kwica. Nta wankubise, nta n’uwampohoteye. Ndashima Imana yabikoze. Aha ni hamwe ijambo ry’Imana ritubwira ngo “Nunyura mu muriro ntuzashya kandi n’ibirimi byawo ntibizagufata” Yesaya 43:2. Igihe cyarageze umuntu andangira umurozikazi, njya kumushaka ngo angurishe uburozi arabunyima. Iyo mbyibajije n’ubu birandenga kandi sinasenganga rwose nari naranze Imana. Nyuma naje gushaka kwiyahura mu bundi buryo, uwo mugambi na wo Imana iwuburizamo.

Imana ni Urukundo! Yandinze ndi umunyabyaha, ndi Sawuli utoteza abarokore nkanabaseka. Ihabwe icyubahiro. Ijambo ry’Imana riratubwira ngo ituzi tutari twaba insoro mu nda za ba mama. Ni ko biri, kuko kuba yarandinze si uko narushaga abandi kwihisha cyangwa gukiranuka, ahubwo nari umunyabyaha wo kubabarirwa ni uko kImana yari ifite umugambi ku buzima bwanjye. Hari icyo yandemeye, ntaranavuka nari mu mugambi wayo. Aha ntimunyumve nabi ngo wenda muvuge muti se abandi bagiye bo ntibari mu mugambi w’Imana cyangwa ntiyabakundaga? Ni byo rwose, ariko umuririmbyi yararirimbye ati iminsi yo kubaho kwanjye Imana iyifite mu biganza. Bariya bagiye bari beza, bari intwari, bari inyangamugayo, bari bejejwe kandi Imana yarabakiriye.

Njya mbona abacu bagiye nk’uko Sitefano yagiye. Mu byakozwe n’intumwa 7:55 haravuga ngo “Ariko Sitefano yuzuye Umwuka Wera ararama, atumbira mu ijuru abona ubwiza bw’Imana na Yesu ahagaze iburyo bw’Imana, aravuga ati ‘Dore mbonye ijuru rikingutse, n’Umwana w’umuntu ahagaze iburyo bw’ Imana.’” Abamuteraga amabuye bari mu mubiri, ariko we yari mu mwuka ku buryo Imana yamurinze ububabare. Naho jyewe iyo nza gupfa mba nararimbutse, kandi umugambi w’Imana wari uko nyikorera nkazanabona ubugingo.

Njya nibaza ko wa mwana wo mu muryango wanjye witahiye yansengeye amasengesho menshi akaba ari yo yandinze, kuko yabonaga ndi uwo kubabarirwa. Imana iba irinda ijambo ryayo kugira ngo irisohoze. Ijambo ryayo riravuga ngo nidukizwa n’imiryango yacu izakizwa, ndagira ngo nkubwire ko nyuma ye ari jyewe ukijijwe mu muryango wacu. Mu by’ukuri mbona ko yigendeye nka Eliya akansigira umwitero we.

Ubwo rero Jenocide yaje kurangira ndarokoka, nsubira iwacu nsanga karabaye. Ariko ndashima Imana ku bo yabashije kurokora. Ubwo naje kujya kuba hanze kuva mu kwezi kwa munani 1994 nikomereza mu isi ndasayisha. Mu w’2005 ni bwo nakiriye Yesu nk’Umwami n’Umukiza, nganira n’umuntu kuri telephone. Nagarutse mu Rwanda, ngirirwa ubuntu bwo gusobanukirwa neza agakiza icyo ari cyo, njya mu nsengero no mu byumba by’amasengesho.

Ubu ndashima Imana kuko nyikorera uko nshobojwe nk’uko Pawulo yandikiye Tito ati “Icyatumye ngusiga i Kirete ni ukugira ngo utunganye ibyasigaye bidatunganye” Tito 1:5. Waba uri umucikacumu cyangwa utari we, niba ukiriho hari byinshi byashoboraga kuba byaraguhitanye nawe, nyamara Imana irakurinda. Iyi nyongezo twahawe rero tuzabazwa icyo twayikoresheje. Ni cyo gituma nguhugurira gukorera Umwami hakiri ku manywa.

Amahoro y’ Imana abane namwe.

Nitwa Mukarurinda Alice, ntuye mu ntara y’iburasirazuba, akarere ka Bugesera, Umurenge wa Nyamata, akagari ka Nyamata y’Umujyi, Umudugudu wa Gatare I. Nakiriye Yesu nk’Umwami n’Umukiza wanjye. Mfite imyaka 43. Ndubatse, mfite abana 5.

Ubuhamya bwanjye bushingiye ku mumaro wo gusaba imbabazi ndetse no kuzitanga, kuko byangiriye umumaro ukomeye. Ndashimira Yesu wambashishije. Kuva mu bwana bwanjye nahuye n’ibibazo byinshi bijyanye n’akarengane kabaga gashingiye ku moko:

1. Mu w’1989: Nakoze ikizamini kirangiza amashuri abanza, ndagitsinda ariko kubera ikibazo cy’amoko cyari gikomeye cyane icyo gihe bankura ku rutonde rw’abajya mu mashuri yisumbuye bansimbuza undi mwana.

2. Mu w’1991: Abakoze Jenoside bishe data bamwita icyitso, ntangira ubuzima bw’ubupfibyi.

3. Mu w’1992: Abakoze Jenoside baradusenyeye, baradusahura ndetse baranadutwikira.

4. Mu w’1994: Noneho abakoze Jenoside mu Rwanda bishe umuryango wanjye hafi ya wose, kuko bishemo abantu 25 barimo umwana wanjye w’imfura nari maze kubyara, bakamwica bamutemyemo kabiri bakamujugunya imbere yanjye.

Jenoside yakorewe Abatutsi itangiye, nahungiye mu rufunzo, mu murenge wa Ntarama. Mpageze, nahasanze n’abandi benshi baje kuhihisha. Nyuma y’igihe gito abakoze Jenoside bari kumwe n’abasirikare ba Leta yariho icyo gihe, badusanze muri urwo rufunzo ku itariki ya 29/04/1994 ari na bwo banyatse umwana w’amezi icyenda nari mfite, bamucamo kabiri n’umuhoro bamujugunya imbere yanjye, bantemagura mu mutwe, bantera icumu ku rutugu, bankubita umuhoro mu misaya, banca n’akaboko k’iburyo nk’uko mubibona kuri iyi foto.

Ubwo bansize nsa nk’uwapfuye nta bwenge ngifite, kandi urebye koko, nari napfuye uretse Imana yanzuye, ikambwira ngo “Baho,” nkabaho. Umutware wanjye we bari bamutaye mu iriba, ariko ndashima Imana ko yabayeho n’ubwo afite ubumuga bw’umugongo.

Ngaruye ubwenge, nasanze ndyamye mu mirambo myinshi, mbona abana bonka amabere ya ba nyina bapfuye n’abandi bareremba mu ruzi. Muri urwo rufunzo nahamaze iminsi irindwi, ukuboko batemye kwarajemo inyo . Twavuye muri urwo rufunzo tariki ya 5/5/1994, tuhakuwe n’abasirikare ba FPR, hanyuma baratangira bamvura bya bikomere byose. Hejuru y’ibyo bikomere, nari naranahimiranye ariko nza koroherwa n’ubuzima buragaruka.

Umunsi umwe naje gutungurwa n’umuntu waje kunsaba imbabazi, ambwira ko ari we wanciye akaboko ansanze mu rufunzo (n’ubwo njye ntashoboye kumumenya), ambwira ko ari we wankubise imihoro mu mutwe, ariko akaba ansaba kumubabarira.

Umunsi wa mbere ansaba izo mbabazi nikubise hasi ndaraba ngwa muri koma, baranterura banjyana kwa muganga. Aho ngaruriye ubwenge, nakomeje gusenga Imana nyisaba imbaraga zo kubabarira kuko ari yo iha intege abarambiwe ndetse n’utishoboye ikamwongera imbaraga.

Si uko nabanje kumwima imbabazi, ahubwo nafashwe n’ubwoba bukomeye mbimarana icyumweru, kandi n’uwantemye na we yafashwe n’ikintu kimeze nk’ihahamuka abonye nguye muri koma.

Nyuma yakomeje kunsaba imbabazi ndamubabarira, musaba ko yaza no mu rugo rwanjye akabasaba imbabazi, na bo baramubabarira.

Ndashima Imana yambashishije, kandi kuri ubu yabaye incuti y’umuryango wanjye, aradusura, kandi tubana mu ishyirahamwe ryitwa “UKURI KUGANZE,” aho tujyana ahantu hose dutanga ubuhamya bugamije kwigisha ijambo “GUSABA IMBABAZI,” ndetse no kubabarira.

Icyabimbashishije ni uko n’ubusanzwe nari narakiriye Yesu nk’Umwami n’Umukiza wanjye, kuko na Yesu ubwe yababariye abamugiriye nabi.

Mbifurije ibihe byiza!

Muri iyi nkuru turabagezah ubuhamya bwa Diane Uwase yivugira mu magambo ye bwiye uko yarokotse jenoside muri Mata 1994, hanyuma y’aho nabwo akicirwa abana batatu, ariko Imana iza kumushumbusha urubyaro ndetse imukiza ihungabana ryari ryaramubayeho akarande.

Nitwa Diane Uwase mwene Sebukayire Jean Marie Vianney, navukiye mu Karere ka Bugesera I Butagata yahoze ari segiteri Nyagihunika navukiye mu muryango ubana neza nta kibazo. Mu mwaka w’1991 naje kuva I Bugesera njya kuba kwa nyogokuru mu cyahoze ari komini Satinsyi ubu ni muri Ngororero. Gusa bitewe n’ ibihe bibi byariho bashatse kunyica; ndibuka ko rimwe twahungiye muri sentere mu Ngororero umwalimu aduhisha munsi y’ igitanda ariko abahungiye mu Ngoro y’Ishyaka iri hafi aho babatwikiyemo nta wavuyeyo.

Naje kugaruka I Bugesera mu w’1992 nabwo mpageze baradutera. Twageze ahitwa Kagembe turi kwiruka bantera umuhoro unyuraho ufata umukecuru wari imbere yanjye ahita yikubita hasi bahita bamwica. Twahungiye kuri Kiriziya tuhamara agahe badusubiza iwacu dusanga imirima barayisaruye ibyo dufite mu ngo barabitwaye bidutera inzara ikomeye.

Naje gusubira Gisenyi aho mukuru wanjye yari yarashatse mu w’1993 ariko numva nifuza ko bamfasha kwiga. Mpageze nagize agahinda ka mukuru wanjye kuko nasanze we n’ umugabo we barabaye abarokore buri kintu cyose bagisengera nkabona ari ugukabya icyo gihe njye sinari bwakire Yesu Kristo.

Uko nakomeje kubana nabo byageze igihe numva ijwi rimbwira ngo wowe ko udakijijwe ikindi kizima ukora ni ikihe? Nashatse ijwi rivugana nanjye ndaribura. Umunsi umwe ndi mu rugo njyenyine nafashe igitabo cy’ indirimbo ngo nigane uko abarokore baririmba ndirimba indirimbo ya 110 nararirimbye ngiye kumva numva umunezero winjiye mu mutima wanjye ntangira kurira mpita mbatizwa mu mwuka wera. Nahise ngira iyerekwa ry’aho abanyabyaha bazajya mbona icyobo kibi gicucumukamo umwotsi w’ umukara abantu batakirayo cyane ngira ubwoba bw’ ibyaha byanjye, nyuma mbona umucyo mwinshi mbona aho abera bazajya numva ndishimye mpita mfata icyemezo natura ibyaha byanjye mba umurokore mpita mbatizwa mu mazi menshi.
Naje kuva kwa mukuru wanjye njya gutura kwa masenge hafi y’ ikiyaga cya Kivu. Yari umugatulika yanga abarokore cyane nasanze baramubwiye ko njye na mukuru wanjye twasaze barangerageza bikomeye ariko nabereye imbuto ngakora imirimo yose Imana irahandindira sinagwa.

Muri Mata 1994 narose inzozi mbona ndi mu giti hejuru mbona munsi hari intumbi nyinshi bimeze nko kureba mu nyanja mbona nanjye bampanuye mu giti mbona banjyananye na za ntumbi mu Kivu.
Bwarakeye nkiri kubwira izo nzozi abo tubana nabonye masenge aje afite ubwoba bwinshi ati mwambare imyenda ikomeye Habyarimana arapfuye, amatangazo yahise atangira gutambuka ngo umuntu wese agume aho ari dutangira kumva urusaku kuri Rubavu abantu batangira gutyaza imipanga amafirimbi aravuga.

Masenge yatubwiye ko tujya ku baturanyi tugapfira hamwe n’ abandi ariko njye nasigaye mu nzu mbanza gusenga. Umwana umwe witwa Monique yaraje turagumana ahita afata icyemezo arakizwa ndamusengera. Masenge yagarutse kundeba asanga ndi gusoma ijambo ry’ Imana rivuga ngo: “Uwiteka ni ubuhungiro umuntu yabasha kuntwara iki?” Twagiye kumva twumva igitero kiraje ntangira gusimbuka ibipangu mpunga aho naruhukiye nsanga hari abandi benshi bahahungiye abo dusize inyuma bahita babica. Masenge bahise bamuca umutwe ariko yanga kuvuga aho twirukiye, byageze mu gitondo bataratugeraho.

Bukeye twari twihishe mu gipangu cy’ interahamwe baje kumvumbura aho nihishe ndiruka nsanga bamwe twari kumwe bose bapfuye nahise nurira inzu na wa mwana nakirije Yesu nawe ansangayo. Ako kanya hahise hagwa imvura nyinshi, kandi twari turyamye mu mureko nuko amazi araturengera, abasirikare bugamye mu nzu hasi kajya bazamuza amabati iminwa y’ imbunda batwekereka ko imvura nihita batwica.

Imvura ihise badusabye kururuka ndururuka mpita niruka ngo bandase niruka nihisha mu gipangu cy’ Umukongomani. Wa mwana bamukubise isasu rimwe ahita apfa. Byageze saa munani y’ ijoro abasirikare baje kuduhiga aho twihishe, nuko bangezeho ntangira gusenga mu ndimi baravuga ngo twigendera uyu ni umusazi.

Umusore umwe mu bo twari twihishanye yumvise ibintu bicecetse arasohoka ngo ajye mu rugo gushaka icyo kurya agwa mu nterahamwe zihita zimwica tubonye atinze tugenda tumukurikiye tuzigwamo natwe babanza kwica abasore twari kumwe abakobwa turiruka twihisha mu gikoni cyari hafi aho maze baje kudukuramo bantera ibyuma mu mutwe, umugongo no ku ijosi nsa nk’aho mpfuye ariko umwuka ntiwashira.
Abo bicaga bose babajyanaga ku muhanda kugira ngo imodoka ize gutunda imirambo. Nagiye kubona mbona abasirikare b’abarokore twasenganaga baraje barambwira ngo: “Ihangane wezwe ujye mu ijuru amahoro nta kindi twagufasha”. Bahise bandondorera abakozi b’ Imana bapfuye bahita bigendera.

Imodoka ipakira intumbi yari hafi aho banzamura ngo banshyire mu ntumbi mbona umusirikare wari hafi aho ndamwinginga ngo nandase azaba akoze arambwira ngo: “Amaraso yawe sinzayabazwa”. Mu gihe akitunganya ngo andangirize, interahamwe zaramfashe zinaga mu ntumbi ntarapfa barabwira ngo barandangiriza tugeze kuri komini (niho hari icyobo bajugunyagamo intumbi).

Tuhageze dusanga icyobo kimwe cyuzuye barangije gucukura ikindi bahita bajugunyamo bamwe barangije gupfa njye banshyira ku ruhande bampa interahamwe ebyiri ngo zinteme zintemo ariko bansunikiyemo ntarapfa.

Abantu bari inyama gusa. Abantu bazanye amashara ngo batwikire izo nyama be kuguma kuzireba. Ubwo babintuyeho babona ndacyari muzima bajya kuzana amabuye ngo bantereremo ariko hari umukobwa wariho asenga Imana iramubwira ngo niyihute ku cyobo hari umurimo Imana iramukoresha. Yaraje asanga ndi kugongera aramenya kuko twasenganaga ahita amanuka aranzamura anjyana kumpisha mu rutoki. Tugeze hafi y’ iwabo anshyira ahantu mu nsina arabwira ati: “Papa na basaza banjye bose bari kwica none nkujyanye iwacu bakwica guma aha ndaza kukureba”.

Nagiye kumva numva interahamwe zuzuye urwo rutoki bafite indangururamajwi bavuga ngo aho dusanga umukobwa wambaye umwenda w’ umukara turabatwika bose, interahamwe nkuru yaraje impagarara imbere iravuga ngo uwanyereka umukobwa bakuye mu cyobo namuhindura inyama gusa. Igitangaje ntiyigeze ambona kandi ampagaze imbere. Nagize ngo barijijisha kuko nta byatsi byari bihari ngo birantwikira.

Uwo mukobwa byageze nimugobora ajya kwa Pasiteri Nyamutera ababwira ibyanjye bahita bantwara iwe banyomora ibikomere barangaburira, abantu bakaza bakavuga bati: “Aha hantu ntituhashira amakenga”.

Byaje gukomera maze Pasiteri Nyamutera amenya ko hari umuntu w’ Imana witwa Kagesera uri gufasha abantu abambukana I Goma (RDC) arambwira ngo nitegure bazantwara. Muri iryo joro narose nashyingiwe nambaye ikanzu yera ijwi rirambwira ngo nzirinde.

Mu rukerera baje kuntwara uwo Kagesera yarasenze numva si umuntu mubi anjya imbere tugera ahantu hafi y’ ikibuga cy’ indege arabwira ngo nimpagarare aho ngira ubwoba ko agiye kuzana interahamwe ariko ngiye kubona mbona azanye mukuru wanjye n’ umugabo we n’abandi yari yahishe hafi aho tugenda twunamye atugeza ku mupaka neza twambukira I Goma muri Congo. Mu by’ukuri byari nk’aho tugeze mu ijuru. Twagiye ku rusengero hafi aho maze Paiteri Karekezi aradufasha cyane, ku munsi wa gatatu tubona Kagesera azanye abana batatu ba mukuru wanjye yari yarabahishe nabo.

Tuhamaze iminsi Imana yatangiye kuvuga ko nta buhungiro dufite aho ngaho twahise dukomeza tugenda ahitwa I Bunagana. Twaraye tuhavuye kuko interahamwe zahunze u Rwanda zinjiraga muri Congo, twakomereje Cyanika ku mupaka w’ u Rwanda na Congo.

Inkotanyi zatwinjije mu Rwanda baraduhumuriza baduha aho ducumbika.Twaje kubona umusirikare uvukana na muramu wanjye atuzana i Kigali. Nakomeje gukizwa nibuka ijwi ryambwiye ngo nzirinde. Nabashije kubabarira abaduhemukiye, umutima wanjye urakira nakira ibyambayeho menya ko Imana yandokoye ku bw’ umugambi wayo. Nyuma naje gushyingirwa mbyara abana 4 Imana ikomeza kungirira neza.

Mu gice gikurikira cy’ubu buhamya tuzabagezaho uko yaje guhekurwa Imana ikamushumbusha urundi rubyaro.

Mu kinyarwanda kubabarira ni igikorwa umuntu akora atari ku bwe ahubwo agikorera undi. Ni ukiuvuga ngo reka kubabara njyewe mbabare mu mwanya wawe. Hanyuma umusaruro uva mo niwo ntuba ukiri umubabaro ahubwo witwa imbabazi.

Usaba imbabazi ni nk’utabaza ubabarira ni nk’utabara.

Umutima ubabajwe n’amafuti ya nyirawo, utakaza amahoro yawo kugeza ku rwego bidashoboka kwihanganira ubwo bubabare, kuko kubura amahoro yo mu mutima ni indwara yica kandi nta muganga wayisuzuma ngo ayibone kereka nyirayo n’Imana imenya ibyiherereye mu mitima.

Bigera igihe rero wa muntu wakosheje yumva atakibashije kwikemurira iki kibazo, agakenera ubutabazi. Ni ko gutera intambwe yo gusanga uwo yahemukiye akamusaba ubutabazi bwitwa imbabazi. Icyo aba amusabye nta kindi ni ukumubwira ngo : « Ndababaye cyane ndagusabye wemere nguhe ku bubabare bwanjye ungabanyirize ndebe ko naruhuka .»

Iyo amwemereye kumuruhura akamuha imbabazi, bimusaba kwakira ibiro amutuye akabyikorera kandi akabyihanganira. Bimusaba gutangira urugendo rutoroshye rwo kurebe uwamukoshereje nk’utaramukoshereje. Hari igihe umutwaro uba munini cyane uwatangaga ubufasha agashaka undi awitirira kugira ngo bimworohere. Rimwe na rimwe arabaza ati « wabitewe n’iki ? » Kugira ngo yumve niba hari undi yashyiraho ayo makosa hanyuma abone uburyo ahanagura icyaha k’uwamugannye.

Ukijijwe neza we, iyo byanze ahita abishyira kuri satani. Ariko kandi uyu aba abaye intwari kuko bimufasha kurakarira satani gusa ntarakarire abandi. Uwabishobora n’ubwo bitoroshye yababarira uwamukoshereje atamubajije impamvu yamuteye gukosa.
Aha hari ikibazo umuntu wese yakwibaza.
Ni nde uvunika kuruta undi hagati y’usaba imbabazi n’utanga imbabazi?

Tubihuje n’uko twabivugaga haruguru, ni nde ufite imvune nyinshi hagati y’utabaza n’utabara ?

Iyi mirimo yombi irakomeye bitewe n’uburemere bw’ikosa. Ariko kandi bikanajyana n’uburyo umuntu ateyemo by’umwihariko n’uko yakira ibintu.
Mu buryo buri rusange, utabaza avunika umutabara ataraza, iyo amaze kubona ubutabazi, hasigara gusa guhangana n’imvune yasigiwe n’ikibazo. Utabara we, aho uwo atabaye atangirira kuruhuka ni ho utabaye atangirira umuruho. Kuko aba aje guhangana n’ibyarwanyaga mugenzi we.

Ukeneye imbabazi avunika cyane igihe cyose ataragera ku ntabwe yo kuzisaba. Ariko iyo amaze kuzisaba akazi gakomeye gasigarana uzitanga kandi we ashobora kubikora igihe kinini, kuko ni urugendo. Niyo mpamvu usaba imbabazi akwiye kwitwararika mu gihe cyose agihura n’ingaruka z’icyo yakoze. Kuko kubwirwa ko ubabariwe ntibizira rimwe no kwibagirwa ko wakosheje. Rimwe na rimwe n’ubusabane bwawe n’uwo wahemukiye ntibuhita busubira uko bwahoze uwo mwanya.

Ushobora kubabarirwa ariko ingaruka zikaza uko byamera kose. Kuko n’Imana ishobora kukubabarira ariko ingaruka zikakugeraho.
Urugero : 1. Wababarirwa ko wasambanye ariko iyo watwaye ind urayibyara, imbabazi ntizigusubiza kuba umukobwa.
2. Wababarirwa ko warwanye, ariko aho bagukomerekeje urahagumana kandi hakubabaza kugeza igihe hazakirira, n’iyo hakize hasigara inkovu.
Umuntu akwiye gusaba imbabazi yiteguye no kwihanganira inzira bizafata kugira ngo ababarirwe, n’ubwo aba akoze igikorwa cyiza cyo kwihana ariko haba hasigaye inshingano yo gufasha uwahemukiwe kurenga ibikomere yatewe n’ubuhemu. Hari igihe byoroha, ariko bishobora no kudakunda ako kanya.

Ubabarira niwe ufite akazi gakomeye. Kuko kubabarira ni ukubabara kabiri. Habaye ho ububabare igihe ikosa ryakorwaga, none hongeye kuba ububabare mu gihe cyo kwibuka ikosa n’urugendo rwo kurisimbuza imbabazi. Kuko kubabarira ni itegeko utitaye ku buryo imbabazi zasabwe mo ndetse Yesu we atwigisha gutera intabwe nini yo kubabarira n’utadusabye imbabazi.

Ubwo akazi ko kubabarira gakomeye gatyo kavamo n’inyungu nyinshi.

Iyo umutabazi yitwaye neza, uwatabawe ntaba akivugwa cyane nk’uwamutabaye kuko we nta kazi kadasanzwe aba yakoze, uwakoze ibidasanzwe kandi by’ubutwari kurutaho ni uwatabaye. Kuko iyo umuntu atabaye aba yiyemeje ibintu bibiri, gupfa cyangwa gukira. None uwafashe icyemezo kingana gityo iyo birangiye adapfuye kandi umurimo we wageze ku ntego wumva adakwiye kugororerwa nk’intwari ?

Kuko ubasha gusaba imbabazi ari intwari, ubasha kubabarira we ni intwarane

Usaba imbabazi aba yigirira neza ubwe. Kuko impamvu zimutera kubikora ni ize bwite. Ari nayo mpamvu iyo tujya gusaba imbabazi dukwiye gusengera uwo tuzisaba ngo Imana imuhe umutima wo kubabarira kuko niyo iwugira. Nti dukwiye kumera nk’abajya guhinyuza gukiranuka kwe ahubwo dukwiye gutanga ubufasha kuko n’impamvu y’ako kazi gakomeye gatyo iba yaturutse kuri twe abakeneye imbabazi.

Bibiliya ibivugaho iki ?

Iyo hatariho imbabazi abantu bitabaza imanza. Kandi imanza zikemura ibibazo ariko ntizikuraho ingaruka z’ibibazo ari byo bikomere byo mu mutima. Ariko imbabazi zikorera iyo mirimo yombi icyarimwe. Iyo habonetse imbabazi nta mpamvu yindi y’imanza. Umuntu utagira imbabazi ntazababarirwa mu rubanza, nyamara imbabazi ziruta urubanza zikarwishima hejuru. Yakobo 2 :13

Rero n’ubwo bigoye ariko ni inshingano y’umukristo kubabarira. Ndetse birenga kubabarira ababidusabye gusa, dukwiye kwitoza no kubabarira abatarabidusaba. Kuko abakosa bose siko basaba imbabazi, kandi twebwe dutegetswe kubababarira.

Ibyo ni byo Kristo yadukoreye, kandi adusaba natwe kubikorera abandi. Mugirirane neza kandi mugirirane imbabazi, mubabarirane ibyaha nk’uko Imana yabababariye muri Kristo. Abefeso 4 :32.
Tugomba kubabarira kuko ari byo Imana idushakaho(Mika 6:8)

Kandi bituma nawe ubabarirwa. Kuko nimubabarira abantu ibyaha byabo, na so wo mu ijuru azababarira namwe (Matayo 6 :14)

Kugira umutima ubabarira bigabanya imanza z’urudaca mu bantu b’Imana, nk’uko twabibonye haruguru. (Yakobo 2 :13)

Igihe ufite umuntu wanze kubabarira ntukizere ko wowe Imana yakubabariye. Bibiliya ivuga ngo : « Kandi nimuhagarara musenga hakagira hari umuntu wabagiriye nabi, mumubabarire kugira ngo wo mu ijuru na we abababarire ibyaha byanyu. » Mariko 17 :3
Aha icyo dusabwa ni ukubabarira twaba twasabwe imbabazi cga tutazisabwe, Imana ikeneye ko dukora uwo murimo wo kubabarira abaduhemukiye, nk’uko nayo itugirira imbabazi. Icyakora kuko tuzi icyo imbabazi zisobanura, natwe dukwiye kugira umuco mwiza wo gusaba imbabazi igihe twakosheje.

Nkwifurije guhora umuco mwiza wo gusaba imbabazi no kubabarira !

NIYONDORA Vedaste [email protected]