Yesu ageragezwa na Satani mu butayu: Abakristo

Kwamamaza

agakiza

Yesu ageragezwa na Satani mu butayu: Abakristo dukuremo ayahe masomo?


Yanditswe na: Ubwanditsi     2020-08-18 07:57:05


Yesu ageragezwa na Satani mu butayu: Abakristo dukuremo ayahe masomo?

Yesu ubwo yari amaze kubatirizwa muri Yorodani, Bibiliya itubwira ko yahise ajyanwa n’umwuka kugeragerezwa mu butayu Matayo 4:1-11. Twibuke ko icyo gihe mbere yo kugeragezwa, Yesu yari arangije amasengesho y’iminsi 40 n’amajoro 40, nyamara ibyo Satani ntibyamuteye ubwoba bwo kumugerageza. Icyakora Yesu kubwo ubutware bwe yaramunesheje ndetse yakuye n’imbaraga muri ayo masengesho. Gusa Bibiliya inatubwira ko Satani ngo yamuteze ikindi gihe ( Luc 4:13)

Mu 2019, neza neza ubwo Pasiteri Desire Habyarima n’itsinda bari kumwe bari bahagaze hagati mu musozi Yesu yageragerejweho. Ni igihe bari basuye igihugu cya Islael. Yavuze ku bigeragezo Yesu yageragejwe na Satani kuri uwo musozi, abihuza n’ubuzima bwa buri munsi ku bakristo atanga inama yuko bashobora gutsinda ibigeragezo, baramutse bakurikije urugero rwa Yesu.

Ati”Gusenga ni byiza ariko nanone twibuke ko iyo dusenga tuba duteye ubwami bwa Satani, kandi nawe ntashobora kureka kuturwanya. Icyakora iyo tubana n’Imana tukayisenga dukiranuka imbaraga z’Imana zibana natwe zikadukiza.”

Pasiteri Desire ahagaze hagati mu musozi Yesu yageragerejweho

Mu minsi 40 Yesu yamaze kuri uyu musozi, yahawe imbaraga kubera ko Abamalayika baje bakamukorera. Bigaragazwa n’igice cya 11 mu butumwa bwiza bwa Yesu uko bwanditswe na Matayo igice cya 4. Izo mbaraga nizo zatumye Yesu mu gihe kingana n’imyaka itatu n’igice akora imirimo n’ibitangaza. Aha hari ikibazo Pasiteri Desire yabajije ati” Ese wowe imbaraga ukoresha uzikura he?

Ndabwira abakozi b’Imana ko dukwiriye gufata igihe kinini cyo gusenga, kugira ngo tubone gutsinda Satani, ndetse tubashe no gukoreshwa imirimo ikomeye. Nidusenga Imana izabana natwe kandi izaba mu ruhande rwacu”

Ibigeragezo 3 Yesu yahuye nabyo kuri uyu musozi

Satani yabwiye Yesu ko ashonje ko bityo yakwiramira agafata ibuye akarihindura umugati. Muby’ukuri kiriya gihe Yesu byo yari ashonje kandi guhindura ibuye umugati yari abifitiye ububasha ariko Yesu ntiyamwumviye, yamusubije ko umuntu adatungwa n’umutsima gusa ahubwo atungwa n’ijambo ry’Imana.

Pasiteri Desire ati “ Nagira ngo mbabwire ko hari abantu birirwa bahindura amabuye ngo ahinduke imigati. Uwo abona imigisha yayishuguritse, akagera kubyo yita byiza ariko yabigezeho mu buryo bubi, Ibyo bintu bizagira ingaruka. Ntabwo dukwiye guhindura ibuye kuba umugati.”

“Ugakundana n’umuntu udakijijwe kubera ko wamubonanye ubutunzi, ejo mugashyingiranwa ariko adakijijwe. Iryo ni ibuye uba wahinuye kuba umugati , umuntu ntatungwa n’umutsima gusa ahubwo atungwa n’ijambo ry’Imana. Ijambo Imana yakuvuzeho rifite agaciro kuruta imigati yose yo mu isi, ntabwo ubugingo dukwiye kubugereranya n’iby’isi bishira dukwiye gushyira ubugingo imbere tugashaka ubwami bw’Imana no gukiranuka ibindi byose tuzabyongererwa.

Ikindi kigeragezo Yesu yageragereshejwe na Satani, yamubwiye ko napfukama akamuramya amuha ubwami bwose bwo mu isi. Aha Satani yabwiye Yesu aya magambo yitegeye umujyi wa Yeriko kuko mu myaka 2000 ishize wari umujyi mwiza. Satani rero yari amubeshye kuko isi n’ibiyuzuye byose ari iby’Uwiteka.

Hari igihe abantu bagera ku bintu ariko babanje kuramya Satani, akaba yabona akazi yatanze ruswa, akaba yateranya abandi agamije kubona ako kazi, cyangwa ngo azamurwe mu ntera n’ibindi . Ariko dukwiye kwiringira no kwizera imbaraga z’Imana kuko ntakiza na kimwe izatwima kandi izaturengera.

Satani kandi agerageza Yesu , hari aho yamujyanye Iyerusalemu ku gasongero k’urusengero amubwira ko niba ari umwana w’Imana yakwijugunya hasi , ngo kuko handitswe ko Imana izamutegekera Abamalayika bakamuramire mu maboko yabo, ngo adakubita ikirenge ku ibuye.

Muby’ukuri koko ibyo Satani yavuze niko byanditse muri Bibiliya . Ariko Yesu ntabwo yigeze yumvira Satani ,ngo yumve ko icyo cyubahiro n’ubundi acyigombwa. Hari ubwo abantu bumva bifuza kuba abakomeye ,yewe no mubigendanye no gukorera Imana. Bakumva bakubaka amazina yabo aho kuzamura ubwami bw’Imana, ariko abantu bakwiye kwirinda uwo mwuka, Imana yonyine igashyirwa hejuru.

"umwanzi arangije ibyo amugerageresha byose aramureka , amutega ikindi gihe ( Luc 4:13)

Ntabwo bihagije , mu gihe umaze gusenga amasengesho cyangwa ukoze ibikorwa byiza bizamura ubwami bw’Imana maze ukumva ko hari aho wageze. Reka da! uzahabwa impundu utabarutse, ukwiye guhora wiyeza kuko Satani we ahora aguhiga umunsi ku munsi. N’ubwo wamutsinda uyu munsi ejo ahora aguteze.

Video yose bari rwagati mu musozi Yesu yageragerejweho na Satani

[email protected]

Ibitekerezo (0)

Tanga igitekerezo

Amategeko n'amabwiriza arakurikizwa

Haba hari icyemezo ufashe nyuma y'ubu butumwa ?