Wari uzi ko imibabaro ishobora kuzamura kwizera kwawe?

Mu buzima bwa buri munsi duhura n’imibabaro y’uburyo butandukanye, kandi idutera kwibaza byinshi kuri yo, ariko mugihe ubuzima bugoye butuguye gitumo bituma tunoza umubano wacu na Kristo ndetse kwizera kwacu kukazamuka.

Imibabaro ducamo mu mibereho ya gikristo, itugirira umumaro ukomeye kandi izamura igipimo cyo kwizera kwacu, reka turebere hamwe uburyo imibabaro inoza umubano wacu n’Imana:

1. Imibabaro ituma dutekereza byimbitse

Wigeze uca mu mu bikomeye, usubiza amaso inyuma, ureba uburyo wakuze? Hari ikintu cyihishe inyuma y’imibabaro kidusunikira ku kwizera Yesu ku kigero cyo hejuru. Iyo ubuzima bugenda neza rimwe na rimwe dutangira kwita ku butunzi, abandi bantu aho guhanga amaso kuriYesu.

Iyo ibyo twishingikirizagaho byanze, nibwo duhita tubona ko Yesu ariwe wenyine tugomba kwiringira, uko tugenda tumwegera, niko umubano wacu na we urushaho kuzamuka no gutera imbere. Mubyukuri duhitemo kuzana imibabaro yacu kuri Kristo tumusabe aduhumurize kandi adukize ibikomere.

2. Imibabaro ituma twongera gusuzuma ikintu cy’ingenzi

Niba hari ikintu kimwe kibabaza kizakwigisha, ni iki: uburyo bwo kongera gusuzuma ibyo ushyira imbere cyangwa uha umwanya munini.

Biroroshye kurangazwa n’ibintu byose bidafite umumaro biba bidukikije igihe cyose, urusaku rw’ubuzima burigihe. Iyo turangajwe n’ibyo, bishobora kugorana kwibuka aho intego yacu igomba kuba ihingiye.

Ingorane dushobora guhura nazo ni uko iyo ubuzima bworoshye, dukunze kwibagirwa ko mubyukuri Uwiteka ariwe waduhaye byose. Niho usanga twibanda kubyo dushobora gukora cyangwa kugeraho ubwacu aho gushimira Imana ibyo yaduhaye byose.

3.Yesu atwibutsa uwo ariwe binyuze mu mibabaro yacu

Imibabaro iratubangamira ariko ntibuza Yesu gukora, mu bikomeye byose tunyuramo, Yesu aba ahari, icyizere cye ku buzima bwacu ntigishobora gushira, kandi buri kintu cyose kitubaho Kristo aba azi impamvu yacyo.

Yesu ashaka ko tumuzanira amarangamutima yacu yose, ubwoba n’ibitekerezo byacu. Mugihe dufite imibabaro, ntidukwiriye kuyihererana twenyine kuko Yesu yiteguye kuduhumuriza no kuduhoza amarira. Yesu ari mu isi nawe yarababajwe niyo mpamvu atareka kumva abamutakira ku manywa na nijoro.

4. Yesu ashoboye gufata imibabaro yacu akayihindura ibyishimo

Iyo turebye ku musaraba, nta kintu cyiza cyahabereye. Byari inzira iteye ubwoba yo gupfa.Yesu, kubambwa ku musaraba ntibyari bibabaje gusa, ahubwo byari n’uburyo bwo gutesha agaciro Kristo ku karubanda.

Ariko yesu ntiyanze kubambwa, yarihanganye kandi amaherezo yarazutse atsinze urupfu maze acungura ikiremwa muntu. Yarababaye bikabije kugirango atwunge n’Imana ubu dufite umudendezo ukomoka mu mibabaro Kristo yagiriye i Goligota.

Yesu yafashe umusaraba awuhinduramo ikintu cyiza cyo kutwunga n’Imana. Niko abigenza mu mibabaro yacu arayifata akayihinduramo ibintu byiza.

Iyo turi mu mibabaro biragoye kwiyumvisha ko hari icyiza cyayiturukamo, ariko n’ubwo waca mu bihombo bimeze bite, iyo Kristo agushumbushije ntiwongera kumva intimba wagize mu buzima bwawe.

5. Imibabaro ishobora kubyara kwihangana

Imibabaro yose ducamo, n’ubwo iba idashimishije ako kanya, ariko uko tugenda tugerageza ngo turebe ko twagera ku ntego twihaye, bituma turushaho gusa na Yesu Kristo.

Urugero: Umunyeshuri uri mu ishuri aba afite intego yo gutsinda ibizamini agatahana amanota meza, mugihe cyo kwiga biramugora cyane, ariko kuko aba azi neza intego afite, arihangana agashinyiriza kugeza arangije amasomo ye. Niko natwe abakristo twihanganira imibabaro yo mu buzima bwa buri munsi kuko dushaka kuzabana na Kristo ubuziraherezo.

Muri macye ntucike intege kuko imibabaro yawe ifite intego. Kuyinyuramo bizagufasha kuvugurura umubano wawe na Yesu, ariko mbere na mbere, dukwiye guhitamo kwemerera Yesu akagendana natwe mu mibabaro yose ducamo kuko nyuma yayo tuyisohokamo dufite ukwizera gukomeye.

Source: crosswalk.com

[email protected]