Wari uzi ko Yesu ari we mujyanama ukeneye ?.(...)

Kwamamaza

agakiza

Wari uzi ko Yesu ari we mujyanama ukeneye ?. Dore impamvu 7 zibishimangira


Yanditswe na: Ubwanditsi     2020-12-25 04:50:23


Wari uzi ko Yesu ari we mujyanama ukeneye ?. Dore impamvu 7 zibishimangira

Nta gihugu na kimwe cyo ku isi umuyobozi wacyo aba adafite umujyanama. Aba afite umujyanama mu by’umutekano, mu buzima( Sante), mu bukungu, mu iterambera ry’igihugu. Biratangaje rero kumva ko umuntu yihagije muri iyi nzira y’agakiza!, Ese wasobanukiwe ko Yesu akwiriye kukubera umujyanama?.

Nuko umwana yatuvukiye duhawe umwana w’umuhungu, ubutware buzaba ku bitugu bye. Azitwa igitangaza, umujyanama, Imana ikomeye, Data wa twese uhoraho, Umwami w’amahoro. Yesaya 5: 9.

Mu mazina 7 Yesaya yahanuye ko Yesu azitwa, uyu munsi turagaruka ku izina rya 3, ‘ Umujyanama’. Ni mu kiganiro ‘Ubutumwa bukiza’ hamwe na Pasiteri Desire Habyarimana kinyura kuri Agakiza Tv.

Impamvu dukeneye Yesu nk’Umujyanama

Kubera ko umuntu agizwe no kwibeshya

70% umuntu agizwe no kwibeshya niko umuntu aremye. Umuntu usanzwe ukomoka kuri Adamu ( umuntu wa kamere) ni uko aremye. Noneho fata iyo 70% yo kwibeshya wongereho amoshya ya Satani, ugerekeho ibigeragezo wanyuzemo, ibikomere waciyemo, ugereke ho ubumenyi buke mu ijambo ry’Imana.

Amoshya ya Satani ntareba ngo urahanura, uri pasiteri, ntareba ngo umaze imyaka myinshi mu nzira y’agakiza. Satani ntawe atinya, ntiyatinye Yesu arangije amasengesho y’iminsi 40. Dukeneye Yesu nk’Umujyanama ngo adufashe kumenya icyo twakora muri uku kwibeshya, muri ibi tunyuramo bigoye ni iki twakora ngo dusimbuke imitego ya Satani?.

Turwana n’uburiganya bwa Satani

"Ibisigaye mukomerere mu Mwami no mu mbaraga z’ubushobozi bwe bwinshi. Mwambare intwaro zose z’Imana, kugira ngo mubashe guhagarara mudatsinzwe n’uburiganya bwa Satani. Kuko tudakirana n’abafite amaraso n’umubiri, ahubwo dukirana n’abatware n’abafite ubushobozi n’abategeka iyi si y’umwijima, n’imyuka mibi y’ahantu ho mu ijuru.

Nuko rero mutware intwaro zose z’Imana, kugira ngo mubashe gukomera ku munsi mubi, kandi murangije byose mubashe guhagarara mudatsinzwe. Muhagarare mushikamye mukenyeye ukuri, mwambaye gukiranuka nk’icyuma gikingira igituza, mukwese inkweto, ari zo butumwa bwiza bw’amahoro bubiteguza, kandi ikigeretse kuri byose mutware kwizera nk’ingabo, ari ko muzashoboza kuzimisha imyambi ya wa mubi yose yaka umuriro.

Mwakire agakiza kabe ingofero, mwakire n’inkota y’Umwuka ari yo Jambo ry’Imana, musengeshe Umwuka iteka mu buryo bwose bwo gusenga no kwinginga, kandi ku bw’ibyo mugumye rwose kuba maso, musabire abera bose". Abefeso 6: 10-18

Kubera ko Satani ari umuriganya, dukeneye kugirwa Inama naYesu. Satani niwe muntu mubi wihangana kuruta abandi ku isi, uzi ko akwihorera uri umusore akazagutega uri umugabo, uzi ko akwihorera uri umukobwa nta cyaha ukora akazabigukoresha uri umugore?.

Uzi ko akwihorera uri umukene akazagutega warabaye umukire, akakwihorera uri umukire akagutega wakennye?. Dukwiye Yesu nk’Umujyanama kugira ngo adukize uburiganya bwa Satani.

Kugira ngo tumenye imigambi y’Imana

Iyo tuyoboje inzira Yesu tumenya imigambi y’Imana. Dufatiye ku rugero rwa mose wari uyoboye abantu barenze miliyoni 2, abakuye muri Egiputa abajyanye mu gihugu cy’isezerano, hari ubwo byageraga aho bikamucanga agahita ajya kugisha inama Imana.

Imana irihisha imigambi yayo ntabwo twayimenya dukwiye kugisha inama Yesu tukamubza ngo ‘ Ni ibiki ugambiriye?, wifuza ko tubaho ubuzima bumeze bute?, uyu murimo wawe tuwukore gute?. Ntabwo ushobora kumenya iby’Imana igambirira ku buzima bwawe udashatse mu maso h’Imana.

Kubera ejo hazaza

Ejo hazaza hacu twese Imana yahagize ibanga. Nta muntu n’umwe uzi igikurikiraho ku munota ukurikiraho, yewe dufite abantu bakomeye muby’iteganyagihe ariko nabo bajya batungurwa. Ntabwo uzi ibyo uzanyuramo ni yo mpmvu ukwiye gusaba Yesu ko akubera umujyanama. Ikintu gikomeye ni uko abantu bose bafite ubwoba bw’ejo hazaza.

Ese wari uzi ko iyo Yesu umwegereye akumenera ibanga ry’iby’ejo hazaza?, akakubwira ati witware gutya, hari imigambi ya Satani imeze itya, ibyo ngambirira ni ibi, ukwiye kwitwara gutya kubera ko Yesu ari umujyanama. Ejo hazaza hawe Imana yahagize ibanga, ukwiye kuhafata ukahashyira mu biganza by’uwaharemye.

Kugira ngo tumenye iby’umurimo wayo

Iyi ngingo irareba abantu basobanukiwe icyo baremewe, bakorera Imana mu murimo wayo. Ni ingingo ireba abantu basobanukiwe umugambi Imana ibafiteho, basobanukiwe ko babereyeho gukorera Ubwami bw’Imana. Ntabwo wamenya imigambi y’Imana, ntiwamenya icyo wakorera Imana utayiyoboje inzira.

Ni byiza Imana ishaka ko abantu bose bakizwa, ariko se ibyo urimo urakora ni byo Imana ishaka ko ukora?. Ese wasobanukiwe imigambi Imana igufiteho, wasobanukiwe icyo waremewe. Ibyo ukora ni byo waremewe?, ntabwo wamenya ibyo ukorera Imana udashatse Yesu nk’umujyanama.

Kubera ko dukeneye Inama mu bijyanye n’imigisha iduha

Pawulo yaravuze ngo ‘ Nize guhaga nzi no gusonza, nzi kuba muri byinshi nzi no kuba muri bike, muri byose nshobozwa na Kristo impa imbaraga. Manowa Imana yavuganye n’umugore we imubwira ko agiye gutwita, bakazabyara umwana w’Umunaziri kandi uwo muntu Imana izamukoresha ibikomeye.

Umugabo ntabwo yari ahari, umugore yaratashye abwira umugabo we ahita ajya gusenga abwira Imana ngo ‘ Niba ari wowe wavuganye n’umudamu wanjye garuka umbwire uko tuzafata uwo mwana’. Malayika araza ababwira uko bazafata uwo mwana.

Hari igihe dusaba Imana imigisha ariko ntituyigishe inama y’uko tuzitwara mu migisha. Hari abantu bazi gukira ariko batazi gukena, hari n’abandi bazi gukena ariko batazi gukira iyo bageze mu bukire buhita busimbura Imana. Dukwiye kuyoboza Imana inzira.

Kubera ubuyobe mu nyigisho

Muri iki gihe hari ubuyobe bwinshi mu nyigisho. Dukwiye kwakira Yesu nk’umujyanama tukamubaza ngo ’Mwami muri izi nyigisho nyinshi zitambuka muri ibi bintu byinshi bihari, ni ibihe bintu bindeba nkwiriye kwakira. Bibiliya igizwe n’amagambo 2: Rema na Logos.

Rema ni ijambo ryawe Imana iguhaye ry’uwo munsi mu magambo menshi yanditse muri Bibiliya. Logos ni Bibiliya yose muri rusange, rero muri iyo mirongo myinshi wasomye hari igihe Imana ivanamo ‘Rema’ yawe, ikakuvaniramo irigize ubuzima bwawe. Iyo ibyo utabizi, ushobora gufata ibintu byose ukajya wiyitirira n’imigisha Imana itakuvuzeho.

Hari inyigisho z’ubuyobe ziriho z’ubuntu. Bakubwira ko ibyaha twakoze n’ibyo turimo gukora ubu, n’ibyo tuzakora byose byababariwe ushaka wasambana. Ushaka wakwica, ukanywa inzoga , ugakora ibintu byose ariko ubwo ni ubuyobe. Ubuntu bw’Imana buzanira abantu bose agakiza bwarabonetse, butwigisha kureka kutubaha Imana n’irari ry’iby’isi.

Izindi nyigisho n’inyigisho z’ubukire ( Ibitangaza), aho abantu bigishwa gukunda isi kuruta gukunda ubugingo buhoraho. Yego tuzatera imbere, tuzagira umugisha, tuzagera ku byiza byose Imana itanga, ariko se tuzabigeraho turi bande?.

Birababaje ko abantu bigisha abantu ibitangaza ariko batarashaka Imana ikora ibitangaza. Abantu barashaka amahoro batarashaka Umwami w’amahoro uyatanga, barashaka amafaranga batarasha utanga amafaranga. Ukwiye kwakira Kristo ibindi bikaza ari inyongera.

Reba hano inyigisho Yose: Impamvu 7 zikwereka ko ukeneye Yesu nk’umujyanama mu buzima bwawe bwa buri munsi

Source: Agaikza Tv

[email protected] org

Ibitekerezo (0)

Tanga igitekerezo

Amategeko n'amabwiriza arakurikizwa

Haba hari icyemezo ufashe nyuma y'ubu butumwa ?