Uruhare rwa covid-19 mu kunoza imibanire(...)

Kwamamaza

agakiza

Uruhare rwa covid-19 mu kunoza imibanire y’abantu


Yanditswe na: Ubwanditsi     2020-06-15 06:09:04


Uruhare rwa covid-19 mu kunoza imibanire y’abantu

Ubusanzwe icyorezo cya covid-19 gihangayikishije u Rwanda ndetse n’isi muri rusange kuko gikomeje koreka imbaga nyamwinshi. Icyakora n’ubwo bimeze bityo buri kintu cyose kiberaho kutwigisha, iki cyorezo cyahinduye imitekerereze y’abantu bituma habaho impinduka nziza ku myitarire y’umuryango mugari.

Mu gihe ubuzima bujemo impinduka zitandukanye bisaba kwiga kumenya uko tubyitwaramo by’umwihariko muri iyi minsi byabaye ngombwa ko imirimo imwe n’imwe ihagarara, insengero, amashuri ndetse n’ahandi hahurira abantu benshi hagamijwe kwirinda ikwirakwizwa rya coronavirus, niho imibanire yatangiye guhinduka mu buryo bwiza.

Ni muri urwo rwego tugiye kurebera hamwe impinduka nziza zabonetse mu mibanire y’abantu bityo bikagira umumaro mu kubaka umuryango mugari:

1. kunoza ibiganiro no kwita ku bagize umuryango

Kuri iyi ngingo hari byinshi byazitiraga abagize umuryango ntibabone umwanya wo kuganira hagati yabo ngo bafate umwanzuro uhamye watuma bagirana ubumwe, bitewe n’uko bahugiraga mu nshingano nyinshi.

Urugero: Washoboraga gusanga umuntu akora amanywa, nijoro akajya kwiga, ibi bigatuma ataha bwije abo mu muryango ntibamubone ngo baganire ariko mu gihe cyo kuguma mu rugo ubusabane bwariyongereye ndetse n’umwanya wo kwigira hamwe ibyateza imbere umuryango nawo uraboneka.

2. Guca bugufi

Mu buzima habaho ibyo abantu bishingikirizaho bigatuma bishyira hejuru. ibyo ni ubutunzi bw’isi, imyanya ikomeye mu kazi, impamyabumenyi zo ku rwego ruhanitse n’ibindi byinshi umuntu yakwibwira ko bimuzamura mu ntera.

Mu gihe coronavirus yazaga abatuye isi bose bahinduye imyumvire babona ko Imana ari yo ikwiye icyubahiro kuko ariyo ifite mu biganza byayo ubuzima bw’abatuye isi.

3. Gusangira ibyo bafite

Mubyukuri icyorezo cya covid-19 cyatumye abantu bahindura imyumvire ndetse bamagana ikintu cyo kwikubira yaba abaturage hagati yabo basaranganyije ibyo bafite buri wese yabereye mugenzi we ijisho aho byabaga ari icyaha ko umwe arya mu gihe mugenzi we yicira isazi mu maso. Ibi ntibyakozwe n’abaturage gusa ahuwo ibigo bya Leta n’ibyigenga nabyo ntibyahatanzwe.

4. Kugirana ubusabane n’Imana

Mugihe coronavirus yadukaga, yakanguye imitekerereze y’abantu aho byagaragaye ko ari ishyano rigwiriye isi. N’ubwo insengero n’ahandi hantu abantu basengeraga hafunzwe, ntibivuze ko anantu baretse gusenga, ahubwo bize gusenga byimbitse ari cyo kintu bashyizeho umutima, batakamba ngo Imana itabare abatuye isi. Si ibyo gusa ahubwo abantu bize kuva mu kigare bamenya ko umuntu wese akwiye kwirwanaho akanoza imibanire ye n’Imana.

5. Kumvira

Ubusanzwe mu muryango mugari habamo abantu batagonda ijosi cyangwa se batumvira amabwiriza bahabwa. ariko mu gihe cya gahunda ya guma mu rugo, abantu benshi bahinduye imyumvire babona ko inama cyangwa se amabwiriza ya Leta: kugira isuku, kwambara agapfukamunwa, gusiga intera hagati y’abantu byose bifitiye buri wese umumaro bityo barayubahiriza.

Muri macye nk’abakristo dukwiye kumenya neza ko ikintu cyose kibaho hari impamvu kandi ko kidusigira amasomo tugomba kugenderaho mu buzima bwa buri munsi bityo bikadufasha gutegura ejo hazaza heza ndetse no kunoza umubano wacu n’Imana dore ko twaremewe kuyihimbaza.

[email protected]

Ibitekerezo (0)

Tanga igitekerezo

Amategeko n'amabwiriza arakurikizwa

Haba hari icyemezo ufashe nyuma y'ubu butumwa ?