Urasabwa iki ngo uhabwe Umwuka Wera? Ese(...)

Kwamamaza

agakiza

Urasabwa iki ngo uhabwe Umwuka Wera? Ese uwizera wese afite umwuka wera?


Yanditswe na: Ubwanditsi     2021-05-20 05:34:46


Urasabwa iki ngo uhabwe Umwuka Wera? Ese uwizera wese afite umwuka wera?

Bibiliya igira iti” Icyakora abamwemeye bose bakizera izina rye, yabahaye ubushobozi bwo kuba abana b’Imana." Yohana 1: 12

Reka tubanze twibaze ngo umuntu ahinduka uwizera ryari? Umuntu ahinduka uwizera iyo yagize agahinda gatera kwihana kuticuzwa, akababazwa n’ibyaha bye hanyuma akiyemeza kubihindukaho, hanyuma agasanga Yesu akizera ko amaraso ye ari cyo gitambo kizima cyamukuraho ibyaha hanyuma akatura ibyaha bye.

Icyo rero ni igikorwa gikorwa n’Umwuka Wera wenyine, nta muntu wakwemera ibyaha usibye imbaraga z’ubuMana zamufasha kubihindukaho. Urwo ni urugero rwa mbere rwo kwakira Umwuka Wera amurika mu mutima akakwemeza ko uri umunyabyaha, akakwemeza ko ukwiye guhinduka ku ngeso, ko ukwiye kwakira Kristo Yesu nk’Umwami n’Umukiza.

Yesu yaravuze ngo ‘Uwo Mwuka naza, azatsinda ab’isi abemeze ibyaha abameze gukiranuka. Umwuka Wera twakira si uwo kuvuga mu ndimi, si uwo gukora ibitangaza ahubwo mbere na mbere ni uwo kutwemeza ibyaha. Ku bakuriye mu rusengero, hari imbogamizi ikomeye kubabwira ku by’Umwuka Wera utsinda abantu ukabemeza ibyaha, mu gihe batazi n’igihe bakirijwe barabikuriyemo gutyo gusa.

Ku bagize amahirwe yo guhura n’Imana ku giti cyabo, bakakira Yesu ku giti cyabo bazi agahinda k’icyaha. Bazi kuva mu cyaha uburyo bisaba imbaraga, hanyuma iyo umaze kwakira Umwuka Wera ukwemeza ibyaha, uba uvutse ugahinduka kuba umwana w’Imana unapfuye wajya no mu i Juru. Aha ntibivuze kubanza kwigira umubatizo no kurya igaburo ryera, kujya muri korari, mwibuke cya gisambo cyo ku musaraba Yesu yaravuze ngo‘ Mu kanya turabana muri Paradizo’, tabwo yabanjye kubatizwa ariko yagiye mu ijuru.

Hanyuma kuko umuntu adakizwa ngo ahite apfa, iyo umuntu akomeje kubaho uwo Mwuka akomeza akwigisha gukiranuka. Iyi ni intambwe ya 2, iyo twakwita guhinduka ku ngeso.

Guhinduka ku ngeso, ni urugendo rwa buri gihe. Abantu batuzaniye ubutumwa bwiza batubwiye kwihana ko kuvuka( ko kwakira Yesu) ariko hari urugendo rukomeza rwo guhinduka ku ngeso. Guhinduka ku ngeso ni urugendo rwa buri munsi, aho Pawulo avuga ngo ‘ Ndabinginga kubw’imbabazi z’Imana mutange imibiri yanyu, ibe ibitambo bizima niko kuyikorera gukwiriye.’

Aha bigusaba gupfana na Yesu, bigusaba kwemera gupfa ku ngeso aho wicara ukibaza ngo mfite ingeso mbi zingahe? Hanyuma ugasaba Umwuka Wera ko agufasha guhinduka kuri izo ngeso. Uko ukomeza gutera iyo ntambwe, uhinduka wezwa, ubabarira, uhuza ijambo ry’Imana n’ubuzima, ukora ubushake bw’Imana. Uko ukomeza gutera izo ntambwe ugera igihe ukagira umutima nk’uwari muri Kristo Yesu.

Aha rero iyo umaze gutera izo ntambwe hakurikiraho kugira inyota yo kuzura Umwuka Wera, nyuma yo kuzura Umwuka Wera haza impano. Dukwiye gutandukanya ubuzima bw’impano n’ubuzima bw’imbuto, muri ya nzira yo kwezwa no guhinduka ku ngeso, bizana imbuto z’Umwuka kuko imbuto z’Umwuka ni ikinyuranyo cy’uko kamera yacu imeze. ( Iyo ukunda, ukunda abakwanga, wihanganira ibyakugerageje, wishima nta gishimnishije gihari, imbuto z’Umwuka ni amahoro kandi uri mu mahoro make..). Izo mbuto z’Umwuka ziza kuko wemeye guhinduka ku ngeso. Ese imyaka umaze mu rusengero, umaze guhinduka ku ngeso zingahe? Hasigaye zingahe zikigutsinda, ese uri mu rugamba rwo guhinduka?

Kwera imbuto z’Umwuka, ni ubuzima umuntu akwiye guteza imbere kuzageza apfuye. Uko ugenda wegera Imana usabana nayo, kamere irasinzira ariko ntabwo iba ipfuye ahubwo iyo ibonye ikiyivomerera irashibuka. Rero uko ukomeza kugira inyota yo gusenga usaba Imana guhinduka, ugira inyota yo kuzura Umwuka Wera bigera igihe ugahabwa impano z’Umwuka.

Imbuto z’Umwuka ni 9, n’impano z’Umwuka ni 9, rimwe na rimwe iyo urebye abantu benshi usanga bateza imbere impano zabo aho guteza imbere imbuto z’Umwuka. Dukwiye kuzura Umwuka Wera kugira ngo impano z’Imana zikorere mu itorero, mbibutse ko impano z’Imana zibereyeho abandi ariko imbuto z’Umwuka zibereyeho wowe. Uko uzagenda wera imbuto, bizakwinjiza mu Bwami ariko impano zibereyeho gukuza itorero.

Nagira ngo usabe Umwuaka Wera agaruke mu buzima bwawe niba warigeze kumwuzura, niba utaramwuzura umusabe mu buzima bwawe agufashe kuko yatanzwe kubw’abantu bose. Ntabwo washobora imibabaro y’iki gihe udafite Umwuka Wera, ntabwo washobora kwihangana udafite imbaraga z’Umwuka Wera, ntabwo wasobanukirwa ibyanditswe udafite imbaraga z’Umwuka Wera. Saba Umwuka Wera azabana nawe kugira ngo ukore ubushake bw’Imana.

Iyi nyigisho yateguwe, ikanatambutswa na Pasiteri Desire Habyarimana wayikurikira kuri Agakiza Tv

Source: Agakiza Tv

[email protected]

Ibitekerezo (0)

Tanga igitekerezo

Amategeko n'amabwiriza arakurikizwa

Haba hari icyemezo ufashe nyuma y'ubu butumwa ?