Umuramyi Vedaste N. Christian Yasohoye(...)

Kwamamaza

agakiza

Umuramyi Vedaste N. Christian Yasohoye Indirimbo Nshya “Ntiwihemukire” Ishingiye ku Buhamya Bw’ibyamubayeho.


Yanditswe na: Ubwanditsi     2020-05-28 05:12:46


Umuramyi Vedaste N. Christian Yasohoye Indirimbo Nshya “Ntiwihemukire” Ishingiye ku Buhamya Bw’ibyamubayeho.

Umuramyi Vedaste Niyondora Christian ukunzwe n’abatari bake bishingiye ku ndirimbo yagiye akora zigakora ku mitima y’abazumvise nk’iyitwa “Uzi gukunda” yakunzwe n’abatari bake, kuri ubu yasohoye indirimbo nshya yise “Ntiwihemukire” ikubiyemo ubutumwa bw’ihumure bwo kubwira abantu kugarurira Imana ikizere no kutiheba, ko Imana itabibagiwe.

Christian avuga ko iyi ndirimbo ikubiyemo ubutumwa we ubwe yahawe n’Imana ubwo yari ari mu bihe bitari bimworoheye. Ati: “Hari igihe cyageze ngira ibibazo bikomeye, aho natekerezaga ko no gupfa bindutira kubaho, ku bw’amahirwe ntarihemukira nibwo Imana yohereje umuntu wayo araza ambwira ubwo butumwa mu buryo bumeze nk’ubuhanuzi. Uko yabimbwiye niko nabiteruye nkabiririmba mu gitero cya mbere n’icya kabiri na ‘chorus’.”

Akimara kumva ubwo butumwa ngo yumvise asubijwemo imbaraga, asaba Imana imbabazi, ni nabyo yahise ashyira mu gatero ka nyuma, ati “Mbwira Imana nti ndabyumvise, hanyuma nyambika imbaraga mbashe gukiranuka no kubigenderaho….ariko mu by’ukuri navuga ko atari njye wayanditse, ahubwo ni ‘message’ Imana yampaye ndavuga nti ubu butumwa uwabutanga ahari mwuka wera yabuherekeza bugafasha n’abandi”.

Christian kandi avuga ko kuba ayisohoye muri ibi bihe bitoroheye abantu benshi, atariko we yabiteguraga ngo kuko “uko nabyifuzaga yakabaye yarasohotse umwaka ushize ariko ntibyakunda igenda igira utubazo, abacuranzi twifuzaga ko bazayicurangamo bigenda bigoranamo gakeya, ariko navuga ko ari umugambi w’Imana kugira ngo iboneke muri iki gihe, ntabwo njye narinzi ko hazaba ibihe bimeze gutya, ni indirimbo imaze imyaka irindwi yanditse nyifite”. Arakomeza kandi ati:”kuba isohotse ubu ngubu ni ubushake bw’Imana kuko bisa naho bigoye abantu benshi”.

Indirimbo “Ntiwihemukire”, Christian avuga ko yifuza ko abantu bazayumva “bazayivomamo ubuzima bw’Ubumana, bakongera kumva urukondo rw’Imana, bakagarurira Imana icyizere, ari abakomeye bakarushaho gukomera ndetse n’abacitse intege bagakomezwa, Imana iracyafite imigambi myiza ku buzima n’ubugingo bwacu”.

Umuhanzi Christian usanzwe umenyereweho kugira indirimbo zirimo amagambo akora ku mitima ya benshi, avuga ko mu myandikire y’indirimbo ze ikintu kimufasha ari uko atajya atanga ubutumwa butabanje kumukoraho ngo bumufashe ubwe. Akenshi ngo iyo ari mu bihe byo gusenga no gusoma ijambo ry’Imana akagira ubutumwa yumva bumufashije bukamutindamo, nibwo ashyira mu ndirimbo akabusangiza abandi.

Christian avuga ko hakiri indirimbo nyinshi afite muri ‘studio’ azagenda asohora uko azashobozwa, gusa akavuga ko bigoye muri ibi bihe kugira indi mishinga umuntu yateganya abantu bataramenya aho byerekeza.

Christian kandi ashimira cyane abantu bagaragaza ko bishimira ibyo akora, akabasaba kugumya kumushyigikira no kumutera imbaraga, bakanamufasha kugeza ubutumwa aririmba ku bantu benshi bashoboka. Yongeraho kandi ati:” ibihe byose umuntu yaba arimo byaba ibyiza cyangwa ibibi, gahunda ya Kristo yo kugaruka irakomeje, gukizwa no kwera imbuto nabyo dukwiye kubikomeza kubera ko isaha ku isaha twakumva impanda kandi gahunda ni ku bicu”.

source: nkundagospel.rw

INDIRIMBO “NTIWIHEMUKIRE” YA CHRISTIAN N. VEDASTE WAYUMVA HANO:

Ibitekerezo (0)

Tanga igitekerezo

Amategeko n'amabwiriza arakurikizwa

Haba hari icyemezo ufashe nyuma y'ubu butumwa ?