Umumaro utangaje ibishyimbo bifitiye mubiri

Ibishyimbo ni ibiribwa bifitiye umubiri akamaro gakomeye kuko bifasha kugenzura urugero rw’isukari mu maraso, bifasha mu kurwanya kanseri, ni isoko y’intungamubiri, bigabanya kugira agahinda gakabije, byongera ubushobozi bwo gutekereza neza ndetse bigabanya ibyago byo kubyara umwana udakuze.

Kongera ibishyimbo mu ifunguro ryawe bifasha umubiri kugubwa neza kuko biba byiganjemo intungamubiri z’uburyo bwose kandi birinda umubiri guhura n’ibibazo bishobora kuwangiza. reka turebere hamwe akamaro k’ibishyimbo mu mubiri w’umuntu.

Kurya ibishyimbo bigenzura urugero rw’isukari mu mubiri:
Intungamubiri ziba mu bishyimbo zifite ubushobozi bwo gushyira kuri gahunda isukari ari nayo mpavu kurya ibishyimbo bigabanya ibyago byo kwandura diyabete. Kurya ibishyimbo kandi birinda umuntu gusonza vuba kuko umubiri ukuramo imbaraga zo kuwufasha igihe kirekire.

Kurya ibishyimbo bituma umutima ukora neza:
Bitewe n’uko mu bishyimbo habamo imyunyu ngugu ya kalisiyumu na magnesium. Iyi myunyu ngugu yombi iyo yishyize hamwe igabanya ingaruka zo kurwara umutima ndetse n’umuvuduko w’amaraso ukabije.

Kurya ibishyimbo birwanya indwara ya kanseri:
Mu bishyimbo dusangamo icyo bita antioxydants zishinzwe kurinda cellules z’umubiri kwangizwa na kanseri. Ubushakashatsi bwakozwe bwerekanye ko umuntu urya ibishyimbo nibura incuro enye mu cyumweru aba adafite ibyago byo kurwara kanseri.

Kurya ibishyimbo mu gihe cyo gutwita bituma umwana akura neza kandi akavukira igihe:
Mu bishyimbo habamo umunyu ngugu witwa folate ufasha umubyeyi mu gihe atwite bigatuma umwana akura neza mu nda ndetse bigatuma umwana avuka yuzuye neza kandi akavukira igihe.

Kurya ibishyimbo bifasha amaso kureba neza:
Mu bishyimbo dusangamo Zinc na vitamine A. zinc ifasha amaso kureba neza, akamaro kayo k’ingenzi ni uguhindura ibyo bita beta carotene bikaba vitamine A ibi bituma ibyashoboraga kubangamira imboni z’amaso biburizwamo.

Kurya ibishyimbo bikomeza amagufka:
Ibishyimbo bikungahaye kuri vitamine K ishinzwe gukomeza amagufwa, umuntu ukunda kurya ibishyimbo usanga amagufka ye akomeye adapfa kuvunagurika uko yiboneye.

Kurya ibishyimbo bigabanya kugira agahinda gakabije (depression):
Mu bishyimbo habonekamo intungamubiri yitwa folate. Iyo folate yiyongereye mu mubiri birwanya kwiyongera k’umusemburo witwa homocysteine mu mubiri w’umuntu. Kwiyongera k’uyu musemburo bigabanya gutembera neza k’amaraso mu bwonko ndetse n’izindi ntungamubiri nkenerwa.

Mu by’ukuri, ibishyimbo ni ingenzi mu mubiri w’umuntu ushobora kubiteguramo ifunguro mu buryo butandukanye ukoresheje ifu, cyangwa ukabiteka bisanzwe, ariko ku bantu bakunda kubitekamo igihembe, si byiza kubikora kenshi kuko intungamubiri nyinshi ziba mu gishishwa cy’igishimbo. Nimucyo rero kwihatira kurya ibishyimbo hagamijwe kugira amagara mazima.

Source: www.naturalfoodseries.com
Vestine agakiza.org