Ukwiriye kumenya kurinda iby’agaciro wakiriye

Kwamamaza

agakiza

Ukwiriye kumenya kurinda iby’agaciro wakiriye


Yanditswe na: Ubwanditsi     2021-06-21 07:52:35


Ukwiriye kumenya kurinda iby’agaciro wakiriye

"Ndaza vuba, komeza ibyo ufite hatagira ugutwara ikamba ryawe." Ibyahishuwe3:11

Iyo tuvuze iby’agaciro hari abataracyira Yesu nk’Umwami n’Umukiza, hari n’abamwakiriye bazi ibyo tugiye kuvuga bazi ubugingo buhoraho nk’ikintu cy’agaciro gikwiye kurindwa. Ubugingo buhoraho nicyo kintu cy’agaciro karuta iby’isi byose, ibyo isi itunze byose bizasigara ariko ubugingo buhoraho(Agakiza) wakiriye kazakwinjiza mu munezero w’iteka, kazakwinjiza mu bugingo bohoraho niyo mpamvu ukwiye kukarinda.

Bibiliya iravuga ngo ‘Mose umunsi yamenye ko ari umuheburayo, ngo yabirutishije ubutunzi bwose bwo muri Egiputa n’ubundi bwahishwe, ariko ibyo bintu byose yabirutishije kuba ari umuheburayo yemera gusuzuguranwa n’ingabo z’Imana. Kuba uri umukristo ni ikintu gihenze utagura amafaranga, agakiza ntiwakagura ibyamirenge utunze, agakiza gatangwa na Yesu kandi ku buntu. Dukwiye kwiga kurinda ibyo bintu by’agaciro tubitse, kuko aribyo bizatwinjiza mu bugingo buhoraho, agakiza twakiriye niwo mutungo uzatwinjiza mu bwami bw’Imana.

Muri iki gihe hari ukwibeshya gukomeye, umuntu yibwira ko abonye iby’isi ahari bishobora kugira uruhare mu kumwinjiza mu bugingo buhoraho. Ntabwo ariko bimeze! Yesu yaravuze ngo” Ubugingo bw’Umuntu ntabwo buva mu bwinshi bw’ibyo atunze” Iyaba ari ibyo abakire bose tuzi bari kuba buzuye insengero, iby’umubiri bifasha umubiri kandi amafaranga ni meza kuyatunga ariko ubugingo buhoraho iyo wabwakiriye icyo gihe uhinduka umukozi mwiza mu bwami bw’Imana.

Urugero rw’umugani Yesu yaciye: Hari umugabo wari umuhinzi, yarahinze areza aricara areba umusaruro we avugana n’umutima we ati” Ngiye gusenya ibigega bito nubake ibindi binini” Ngira ngo arangije guhunika yaricaye aruva ngo ‘Mutima wanjye tuza uzabaho neza, nta kibazo uzongera kugira’. Nuko iryo joro ngo Imana iramusanga iramubwira ngo uyu minsi urapfa, ibyo waruhiye bizaba ibyande?

Namaze ighe kinini ntekereza icyaha uyu mutunzi yakoze: Guhinga ni byiza, kweza ni byiza, guhunika ni byiza, ariko icyaha yakoze ni icyo kwitiranya ibintu. Ntiyamenye ubugingo aho bukwiye kujya mu mwanya wabwo, n’amafaranga cyangwa se ubutunzi aho bukwiye kuba mu mwanya wabwo, yitiranya iby’ubugingo n’iby’umubiri. Icyabaye ni iki? Ni uko yaje gupfa kandi bitazamufasha aho agiye!

Nagira ngo nkubwire ko amafaranga akwiye kubikwa kuri konte, kuko iyo uyabitse mu mutima ntiwafasha umukene, imyenda myiza wambara ikwiye kubikwa muri gariderobe(Garde robe) ariko ntabwo ikwiye kubikwa mu mutima. Mu mutima hakwiye kubikwa iby’ubugingo, Bibiliya iravuga ngo ’Rinda umutima wawe kuruta ibindi byose birindwa kuko ari ho iby’ubugingo bikomoka.’

Muri iki gihe rero abantu bitiranya ibintu: Atekereza ko kubaha Imana bingana n’ibiryo arya, iyo umuntu bavuga ngo arya nk’umuzungu(ubwo ni ukuvuga ngo yarasubijwe), iyo afite imodoka aba yumva akomeye…,ariko ibyo bintu byose nubwo ari byiza kubigira ntabwo bikwiye kugaragaza ko kubigira byerekana ko uri kumwe n’Imana.

Muribuka ko Yesu hari abantu bamwubahiye imigati biramubabaza, hanyuma ngo abasitaza abishaka arababwira ati’Si njye mukunda ni imigati nabahaye ejobundi!’ bamuvaho hasigara 12 gusa, bya bihumbi byari bije gushaka imigati barigendera. Birababaje ko abantu benshi basenga kugira ngo babone iby’isi kuruta kubona ubugingo buhoraho! Rata niba waragize Imana ukabubona, ubukomereho kuko Satani nicyo kintu yifuza kutunyaga buri gihe. Muri iki gihe abantu benshi bagera ku bintu runaka babanje kuramya ibindi bintu:

Umuntu akabigeraho yambuye, agambanye, abeshyeye abandi, akabigeraho mu buryo atatanga ubuhamya. Ese mu bintu utunze, wabitangira ubuhamya uko byabonetse? Yego Imana yaguhaye imodoka ariko yabonetse ite? Wubatse inzu ariko ybonetse ite? Umugore mubana wamubonye ute?. Hanyuma se akazi ukora? Ikitu kibabaje ni kimwe: Tubigeraho duhemukiye abandi, dukoze ibidakorwa, hashira iminsi ugasaza ukabisigira abatazabigushima, cyangwa se ugapfa, cyangwa se uko byaje akaba ariko bigenda!

Ese ujya wibuka ko ubugingo wakiriye buhenze kuruta iby’isi? Niba warakiriye Kristo Yesu nk’Umwami n’umukiza w’ubugingo bwawe, ubikomeze! Dore impamvu ukwiye kubikomeza: Ni uko muri iki gihe kubona umukristo urinda ubugingo buhoraho akera imbuto ari ikintu cy’ingenzi! Mu mbuto z’Umwuka harimo imbuto yitwa ‘Kwirinda’, gerageza wirinde rero.

Ese ntiwaba waragize uburangare iby’ubugingo bikagucika? Ntiwaba waratangiye gukinisha ibyaha bitobito utazi ko harimo imitego ya Satani? Erega Satani ni umuriganya: Azanwa no kwica, kwiba, no kurimbura. Birashoboka ko hari ibyo umaze gutakaza, birashoboka ko wambuwe, ibyo wambuwe urabizi, aho wamburiwe urahazi. Birashoboka ko wifuza kugaruka mu nzira nziza usenge ubwize Imana ukuri kugira ngo ukomeze iby’agaciro wakiriye.

Iyi nyigisho yateguwe na Pasiteri Desire Habyarimana, inyura kuri Agakiza Tv

[email protected]

Ibitekerezo (0)

Tanga igitekerezo

Amategeko n'amabwiriza arakurikizwa

Haba hari icyemezo ufashe nyuma y'ubu butumwa ?