Uko Pasiteri Nkundakozera Jean Bosco yakijijwe, nyuma yo gukorera Nyabingi imyaka irenga 20

Pasiteri Nkundakozera Jean Bosco ni umusaza w’imyaka 72 y’amavuko, atuye mu kagari ka Bikara ho mu murenge wa Nkotsa mu karere ka Musanze.Yabyirutse ari umugirwa wa nyabingi, nubwo we atigeze abigiramo uruhare ahubwo byaturutse ku babyeyi be bagiye kumuraguriza, Ari naho havuye izina Nkundakozera.

Mu kiganiro uyu mupasiteri uri mukiruhuko cy’izabukuru yagiranye na TV1 Rwanda, yavuze ubuzima butoroshye bwo kwisanga ari umukozi wa Satani, ibintu yisanzemo ngo kuko ababyeyi be mbere yuko bamubyara babyaraga bapfusha, hanyuma ku nda ye bajya kumuraguriza inzuzi ziraberera, arinabwo bahise bamwita Nkundakozera kubw’ibyago izo ndagu zikomeza kumukurikirana yisanga akorera Sekibi.

Ati: "Iyo babaga batinze kujya kuraguzayo cyangwa gutangayo amakora byaramfataga.Urabona nk’iyo umuntu yarwaye marariya, najyaga hasi nk’urwaye marariya kuko nabaga meze nk’ugiye muri koma, ubwo bakunsukaho amazi bagirango bampembure. Iyo bamaraga kunsukaho amazi byamvugiragamo bivuga ngo muje kudusukaho amazi kandi tuje kureba umwana wacu”

Yakomeje kuba muri ubwo buzima ahora aterwa n’izo mbaraga z’umwijima ababyeyi be babonye bikomeje, niko kongera kwigira inama yo kujya kuraguza ngo bababwira ko kugira ngo ibyo bishire ari uko umwana wabo yakwinjira mu bupfumu, biza kurangira yemeye iyo nama niko kumutegeka ibyo agomba kugura nyuma ajya kubihesha umugisha ku bagirwa bakuru i Bugande, bamuha n’umuganda wo kubakira ingoro ye ya nyabingi atangira ubupfumu atyo.

Pasiteri yakomeje agira ati "Nafataga inanga ngacuranga ngahamagara, b’abazimu, ngahamagara nyabingi abaturage rero nabo bakaba bari aho. Nabaga nifubitse uruhu rw’imondo nkegamira inzu ikanyegenyega cyane, hagahinda umushyitsi abari aho bakagira ubwoba. Nabaga maze kunywa inzoga y’ubuki n’itabi, amaso amaze gutukura ngahera ko nkaragurira ababaga bari aho, nyabingi ikamvugiramo, ikavuga ibyo bafite mu rugo ndetse n’ibyabazanye”

Pasiteri Nkundakozera avuga ku itandukaniro ry’ijwi ry’abahanuzi b’Imana n’ijwi ryamuvugiragamo ari mu bupfumu ati”uko abahanuzi bahanura biratandukanye, kuko umuhanuzi iyo ahanura ntahindura ijwi. Naho twebwe icyo gihe turagura, icyazaga niba ari inyinamukiga, hazaga ijwi ritoya, niba ari rutindangezi akaza ari ijwi rinini, niba ari nyabyinshi akaza ari ikijwi ry’igikecuru”

Ubu buzima bwo gutwazwa igitugu na Satani Pasiteri yabubayemo imyaka irenga 20 abifatanya n’indi mirimo yari ashinzwe muri Leta, ngo kuko yigeze kuba Konseye (conseiller). Icyakora ngo ijoro ryaje kuba rimwe amateka amuhindukiraho ahamagarwa n’Imana, ubwo yari ku kazi k’izamu yari asigaye akora.

Ati "Hari itariki 31/3/1992,aho nari ndyamye nijoro nagiye kubona mbona ndi hagati y’abantu bane, umwe arambwira ngo kwetura inkweto zawe kuko hano uri ari ahera. Barambwira ngo gukwetura inkweto ni ukwihana, bati ihane ibyaha byawe. Twaje turi bane nyabingi twayirukanye ndetse na madamu wawe yahindutse, none ihane kuko Imana ikudutumye ngo uze uyikorere.

Wakoreye satani igihe kirekire, none Imana irakudutumye. Nuzuye izindi mbaraga nigiye ku ruhande numva barambwiye ngo “Imana iguhaye impano yo gusengera abarwayi ndururuka mva ku buriri njya hasi. Ubwo ntangira kuririmba amakorasi, ubwo hari nko mu masacyenda”

Nubwo abantu benshi bibabera amayobera ukuntu umuntu yava mu bupfumu akajya mu bukristo, Pasiteri Nkundakozera wabaye muri iyi myemerere yombi we avuga ko ari ibintu bitandukanye “ Bijya gusa nuko abami batandukanye nakoreraga umwami witwa nyabingi, ariko ubu ndavuga Kristo. Nambazaga nyabingi nk’imana ariko iyo umwijima uri munzu, hakaza itara uwo mwijima urahunga. Nabonye itara rero ryirukana byabindi umwijima urahunga”

Pasiteri Nkundakozera Jean Bosco ufite ubuhamya bukomeye bushobora guhindura imbaga nyamwinshi mu batuye isi, yifuje ko ubu butumwa bwashyirwa mu nyandiko, avuga ko yari yarabitangiye ubushobozi bukamubana buke ageze hagati.

Source: TV1 Rwanda

[email protected]