Ubuhamya bwa Makombe:Uko Yesu yamukijije(...)

Kwamamaza

agakiza

Ubuhamya bwa Makombe:Uko Yesu yamukijije ihungabana yatewe na Genocide


Yanditswe na: Ubwanditsi     2021-04-19 05:35:52


Ubuhamya bwa Makombe:Uko Yesu yamukijije ihungabana yatewe na Genocide

Makombe Theo umugabo ufite umugore n’abana 4 mugihe cya Genocide ubwo yahigwanga ngo yicwe, Imana yaramurinze ararokoka ariko asigarana ihungabana ritewe n’ibyo yanyuzemo kuburyo yahoraga arota bari kumwica. Akimara gukizwa Yesu yamukijije iryo hungabana ndetse ahabwa imabaraga zo kubabarira abamuhemukiye mu cyimbo cyo kwihorera.

Mu magambo ye aradusobanurira uburyo yagize ihungabana ndetse n’inzira byanyuzemo kugira ngo abashe kubohoka.

“Genocide irangiye nta babyeyi batugiraga inama, twajyaga mu kabari n’abandi bajene barokotse tukiyahuza inzoga. Njyewe ku myaka 15 nari maze kuba wa muntu muhura ugasanga yasinze. Umuntu wese yicaraga atekereza kwihorera kuko abantu batwiciye twari tubazi tubabona. Twahise tugira ikintu kimeze nko kwigunga tukareba leta iriho itatwemerera kwihorera ukumva na yo urayanze tukibaza impamvu abantu baturokoye batubuza kwihorera.

Twagezeho duhinduka abantu bapfuye bashize imbere. Njye nari umuhanga mu ishuri nahoraga mba uwa mbere, ariko natangiye kuba uwa nyuma kuko naricaraga nkabona imihoro, nkabona Genocide irongeye irabaye. Ibyo byose nta hantu wari kubihungira kuko ubuzima bwari bugoye umuntu adafite aho kuba kandi nta kazi kari gahari ko gukora, ubuzima bwari bugoye tuburara ndetse tukabwirirwa. Ibyo byose byatumye niga kurwana ku buryo bukomeye, najyaga mu gisirikare bakanyangira ngo ndacyari mutoya nkabayo nkanga gutaha. Ariko mubyukuri ntibari bazi impamvu dushaka kujya mu gisirikare. Twajyagayo kugira ngo tuzihorere dutware imbunda natwe tuzakange umuntu.

Nakomeje guhugira mu mashuri ariko mbonye mbuze ubundi buryo njya muri karate ndavunga ngo nibura nanjye hatazagira umuntu unsagarira nzirwaneho. Burya umuntu uhangayitse ahangayikisha abandi, siinajyaga nseka, iyo wasekaga uri hafi yanjye nagukubitaga urushyi cyangwa ingume.

Maze kugira imyaka 20 nibwo nakiriye Yesu numva ko ubuzima buhindutse mbona icyerekezo cy’ubuzima noneho nsobanukirwa ibyabaye n’impamvu. Kugira ngo nkizwe byatwaye amasengesho menshi kuko mu bigo nazengurukagamo kwiga byaranze, nageze aho njya kwiga i Rilima mu wa kane ngezeyo ntangira akavuyo kanjye kuko aho nageraga hose nagiraga nibura nka’abantu ijana bangaragiye nyoboye. Narabashatse bagera nko muri 200 ku kigo kirimo abantu bagera ku 1000 icyumweru cya mbere bari bamenye.

Icyakora hari itsinda ry’abasore n’inkumi basenga banshyira muri gahunda batangira kunsengera ariko bakanansura, bakanyitaho bakampa ibyo nkeneye kuko naje mu kigo nta matelas n’amashuka mfite ariko ibyo byose barabimpaye banyitaho. Iyo bantumiraga ntabwo bambwiraga ngo tujye gusenga ahubwo banyumvishaga ko ari ahandi hantu bagiye ngo tujyane nagerayo ngasanga ari ugusenga.

Ndibuka hari umugoroba umwe bansengeye numva yuko hari ikintu kibaye. Barasengaga nk’amasaha 5 agashira nta kiruhuko bashyizemo kandi nta cifuzo nyamukuru barimo gusengera kuko bayoborwaga n’Umwuka. Twagiye gusenga nka saa moya z’ijoro bigeze hafi saa sita z’ijoro mbona bose barahindukiye baje aho nari nicaye narushye nabuze icyo gukora nananiwe no kubacika ngo njye kuryama. Aho ni ho kubohoka kwanjye kwabereye. Bose baraje bandambikaho ibiganza baransengera ngo ni ko Umwuka ababwiye, nyuma yaho barandetse njya kuryama.

Mu myaka 6 yose yari ishize, iyo naryamaga baranyicaga mu nzozi, nabonaga interahamwe zije zirukanka nko hagati ya metero 20 na 50 babaga batangiye kuntera ibyuma, mu nzozi sinabashaga kwirukanka ngo mbacike. Rimwe nkabona barantemye umutwe wanjye nkawubona mbese mu nzozi nabyukaga napfuye, ariko nari narabigize ibanga simenye igihe napfiriye n’igihe ntapfiriye. Mubyukuri nari naramaze kwizera ko napfuye ahubwo ndimo gushakisha inzira yo kugaruka mu buzima.

Iryo joro bansengeye ibintu byarahindutse kuko abicanyi baragarutse baza baturutse imbere inyuma haturuka Yesu, sinamubonaga n’amaso yanjye ariko naramwumvaga yari muremure, afite imbaraga, yasumbaga inzu bivuze ngo abicanyi uko bakaje bo ntibamubonaga ariko bari hafi kungeraho yaranteruye mu kwaha nk’uko baterura umwana anjugunya hejuru mu kirere. Ngeze mu kirere bampaye imbaraga zo kuguruka nkajya aho nshaka numva arambwiye ngo ntibazongera kukwica.

Akimara kumbwira ibyo bintu natekereje ko bishobora kuba ari inzozi nkangutse narababaye cyane ko nkangutse kuko nashakaga kuguma mu butsinzi. Mu gitondo rereo natangiye kubwira abantu ubuhamya bw’ukuntu Yesu yankijije n’uburyo batazongera kunyica. Kuva mu mwaka wa 200 kugeza 2007 ariho nashatse umugore hari intambara nagomabaga kurwana yo kubohoka. Byansabye gusenga cyane no kwiyiriza nshaka kubohoka. Nageze aho nitabaza ikigo cyitwa ‘Genesse a mission’ banyigisha kumenya Imanana, kwimenya no kumenyekanisha ibyo 2. Aho ni ho nabohokeye mpinduka umumisiyoneri”.

Asoza ubuhamya bwe aragira abantu inama yo kuzana ibibaremereye ku Mana kuko ishobora byose ati: “Ikintu cy’ingenzi abantu bagomba kumenya ni uko nta byago bikomeye ushobora kuba waragize byagora Imana. Niba wararokotse ukeneye kongera kurokoka mu buryo bwombi: Mu mwuka no mu mubiri, uriho urahumeka ariko Imana irashaka ko ubaho ku mpamvu kandi intego yawe ni icyo uhinduka cyo. Kristo ni we rufunguzo rw’ubuzima bwacu”.

Source: Agakiza Tv

[email protected]

Ibitekerezo (0)

Tanga igitekerezo

Amategeko n'amabwiriza arakurikizwa

Haba hari icyemezo ufashe nyuma y'ubu butumwa ?