Ubuhamya:Uwase wageragerejwe mu rushako no mu(...)

Kwamamaza

agakiza

Ubuhamya:Uwase wageragerejwe mu rushako no mu murimo w’Imana Yesu yaramurwaniriye


Yanditswe na: Ubwanditsi     2021-01-22 04:51:22


Ubuhamya:Uwase wageragerejwe mu rushako no mu murimo w’Imana Yesu yaramurwaniriye

Uwase Jeanne uzwi ku izina rya mama NIYO ni umubyeyi w’abana batatu n’umutware, ni umukristo akaba n’umuvugabutumwa bwiza. Kuva yagera mu rushako yahuye n’intambara z’urudaca ku buryo umwana wa mbere yavukanye n’ibisimba bitatu biturutse ku mbaraga z’abarozi ariko we n’umutware we bikomeje ku Mana hanyuma mu gihe gikwiriye baratabarwa.

Mama Niyo amaze imyaka hafi makumyabiri akijjwe cyangwa se yakiriye Yesu nk’Umwami n’Umukiza w’ubugingo bwe. Yakuriye mu buzima bw’ubupfubyi ariko Yesu aramurera aramukuza ndetse igihe kigeze arashyingirwa ashaka umugabo uvuye mu bushake bw’Imana nk’uko abyivugira ati:

“Mubyukuri Yesu wanjye wandeze akankuza yarananshyingiye, nashakanye n’umugabo wanjye ari Imana imumpaye kuko icyo gihe navuganaga n’Imana kandi n’ubu turavugana niyo yari imumpaye. Bene Data nadababwiza kuri ko n’ubwo urugo rwacu rwubatswe mu bushake bw’Imana, ntirwabuze guhura n’ibigeragezo ariko hamwe no gusengano kwizera Imana yaduciriye inzira”.

Uwase Jeanne n’umutware we Bongo Alphonse bahuye n’ibigeragezo bikomeye ndetse n’ibitero bya Satani kuburyo iyo hatabaho ubutabazi bw’Imana bombi bari kuhasiga ubuzima nk’uko uyu mubyeyi abisobanura.

Ati: “Umugabo wanjye Imana yamukoreye ibitangaza birenze ubwenge bwa muntu kuko icya mbere yamuhagurukije ari ikimuga kigendesha amaguru n’amaboko ubu ni umugabo mwiza ugenda yemye. Icya kabiri amaze gukira ubwo burwayi yatangiye gukorera Imana avuga ubutumwa, muri iryo vugabutumwa, umuntu wo mu itorero yaje kumugirira ishyari aramuroga. Nituvuga uwo mu itorero basenganaga, bakoranaga umurimo w’Imana, ntukagire ikibazo kuko ibiri mu mazi byose ntabwo ari amafi kuko habamo ibikeri, inzoka n’ibindi bibi.

Uwo muntu yagiriye ishyari umugabo wanjye kuko Imana yari yaramuhagurukije akavuga ubutumwa abantu benshi bagakizwa. Yaramuroze rero, burya Imana ijya ibyemera kugira ngo ubuhamya buzakomeze benshi. Mu gihe gito inyama zo mu nda zari zimaze kubora n’urutirigongo narwo ari uko. Bamujyanye kwa muganga abadogiteri bavuga ko atazigera akira baramusezerera ngo agende arindire gupfa.

Muri icyo gihe yari ategereje gupfa, nibwo Imana yohereje Marayika amukiza bwa burozi amwereka n’ifoto y’uwamuroze aramubwira ati: “Uyu niwe wakuroze, uzagire kwihangana no kubabarira byabereyeho kugira ngo ngaragaze imbaraga zanjye. Mboneyeho kubwira abantu ngo ibintu bibi byose bagukorera Imana irabireba kandi n’ababikora irabareba, nkabwira n’abakora ibibi ngo barekere aho kuko Imana izahana inkozi z’ibibi”.

Izindi ngorane zabaye mu muryango wa mama Niyo ni uko umunsi umwe umugabo we yishe inzoka y’ikigirwamana yasengwaga n’idini rimwe hariya Kimironko inyuma y’umurenge mu mwaka w’1999. Rwari urusengero runini cyane rufite abakristo benshi bararamya ndetse bahimbaza, ariko mbere y’uko abapasiteri bajya mu rusengero, babanzaga kujya mu cyumba ya nzoka irimo ikabanza ikabaha ubushobozi bakabasha gukora ibitangaza. Torero ry’Imana mukwiye kwitonda kuko Ijambo ry’Imana rivuga ngo kugirango bayobye intore, ni biba ngombwa bazajya bamanura umuriro hejuru, rero musobankirwe abashaka kubayobya.

Iyo bageraga mu rusengero babaga bafite ubushobozi bakuye kuri ya nzoka maze bakarambika ibiganza ku barwayi, ugasanga abantu bagwiriranye, abagabo barigaragura mu rusengero, barutse n’ibindi. Bene Data ntabwo ari kuriya Umwuka w’Imana akora, we natshobora gusebya abantu niyo mpamvu mbinginga ngo mutunge Umwuka w’ubwenge n’ubugenzuzi ajye abahishurira imikorere ya Satani.

Byageze aho umutware wanjye yica iyo nzoka y’ikigirwamana urwo rusengero rurasenyuka abantu bajya mu yandi matorero ndetse iryo dini ryari rifite abaterankunga b’abazungu nab o bahagarika inkunga hanyuma Bishop abura akazi ntiyongera gukorera mu rusengero, ariko abandi bakora nkawe bakomeje kumutumira. Urumva rero ko atari yemerewe gushing urundi rusengero kuko abantu bari bamaze kumumenya.

Mubyukuri uwo Bishop ntacyo atakoze ngo yice umugabo wanjye ariko hejuru y’imbaraga zose hari imbaraga z’Imana, niyo mpamvu Imana yagiye iturinda.Yagiye akoresha imbaraga zose zishoboka kugira ngo atugabe ho ibitero atwice ariko Imana ikatubwira iti: “Kereka nimumvaho nibwo azababona”. Nakugira inama yo kuguma ku Mana kuko niyo rufatiro rw’ubuzima bwawe.

Imbaraga z’umwanzi zakomeje guhiga ubuzima bw’umuryango wa mama Niyo kugeza ubwo umwana wa mbere yabyaye yavukanye n’ibisimba bitatu ariko hamwe n’imbaraga z’Imana baracyari bazima nk’uko Uwase abisobanura:

Ati “Umwana wa mbere natwaye inda ye byari ibintu bikomeye cyane!Abahanuzi barampanuriraga bakambwira bati “Tubonye ubyara ibibwana by’injangwe, abandi bati tubonye ubyaye inyamaswa”.Ubwo byadusabaga guhora dusenga kuko twabonaga ibitero by’abadayimoni. Ubwo rero umwana wa mbere bashatse kumuhindura injangwe ari mu nda bituma ahasengerwa n’ahadasengerwa hose ngerayo kugira ngo Imana izandinde gukorwa n’isoni.

Muri uko gusenga Imana yarirahiye irambwira iti: “Nguhaye umwana muzima azavuka mu bikomeye, Satani azamurwanya cyane ariko nguhaye umwana muzima kuko wanshakanye umwete”. Iryo jambo nararyicaranye n’ubwo gutwita iyo nda byari bingoye yaranguye nabi kuburyo nagiye kubyarira narabyimbye n’isura yanjye utayimenya ku buryo n’agatanda babyariraho ntabashaga kugakwirwaho.

Nagiye kubyarira i Kibagabaga bibanza kugorana abaganga bansimburanaho ariko umwana aravuka ndetse avukana n’ibisimba bitatu ubona biri mu bwoko bw’injangwe ku buryo iyo mbyibutse numva nkutse umutima. Abaganga baratangaye bahindura umwana ngo barebe ko ari muzima ibyo bisimba bitamuririye mu nda ariko basanga ari muzima. Icyo cyabaye igitangaza mu bitaro byose ndetse imbaraga z’Imana zagaragariye aho hantu”.

Asoza ubuhamya bwe mama Niyo arashima Imana yamurwaniriye ikamuha umwana muzima n’ubwo uwo mwana Satani yakomeje kumusabiriza akarwara indwara y’amayobera ariko Imana yaramukijije, iramurinda ubu yarakuze afite imyaka 12.

Uwase Jeanne aboneraho kwibutsa abantu kwikomeza kuri Yesu kuko hejeuru y’imbaraga z’abarozi hari imbaraga z’Imana kandi umugambi wayo urakomeye ku muntu wayo. Arakomeza abari bacitse intege kubera ibigeragezo by’urudaca abibutsa ko Imana yiteguye kubatabara.

source: sinai tv

[email protected]

Ibitekerezo (0)

Tanga igitekerezo

Amategeko n'amabwiriza arakurikizwa

Haba hari icyemezo ufashe nyuma y'ubu butumwa ?