Ubuhamya: Uko Umwuka Wera yamwihanishije,(...)

Kwamamaza

agakiza

Ubuhamya: Uko Umwuka Wera yamwihanishije, agatwika indangamanota z’impimbano. Past Emmanuel Uwambaje


Yanditswe na: Ubwanditsi     2021-05-26 08:27:58


Ubuhamya: Uko Umwuka Wera yamwihanishije, agatwika indangamanota z’impimbano. Past Emmanuel Uwambaje

Mu bintu Umwuka Wera akora, atsinda ab’isi akebemeza iby’icyaha, iby’Imana, n’iby’amateka. "Ubwo azaza azatsinda ab’isi, abemeze iby’icyaha n’ibyo gukiranuka n’iby’amateka, iby’icyaha, kuko batanyizeye." Yohana 16:8

Ikintu abantu bakwiye kumenya, tukabwizanya ukuri! Dufite abantu bagiye bagura za Perime, nko mu Rwanda kuyikorera bigoye umuntu akayigura ari umukristo. Wajya kumva ukumva yarazimye kuko atunze ikintu Umwuka Wera umwemeza ko ari ikijurano, kandi n’Umwuka Wera ahora abimubwira. Iyo perime niyo imutunze, niyo yamuhesheje akazi, akibaza ati ese ndayita mbeho? Kwihana bikamugora!

Dufite ibyaha Umwuka Wera aziranyeho natwe, ku buryo nta wundi muntu wagufashe. Ibyo byaha wowe n’Umwuka Wera muri babiri muba mubiziranyeho, ku buryo niyo washima n’Imana ukaba uzi neza ukuri kw’ibintu ubamo.

Njyewe rero nari umuntu nanjye umeze utyo: Nagiye kwiga mu mwaka wa mbere wa segonderi, narangije uwo mwaka mfite amanota meza. Nyuma ngeze mu mwaka wa kabiri mpura n’abana b’amasarigoma(amabandi) bari abacongomani banyigisha kubeshya ababyeyi nkabaka amafaranga aruta aayo bantumye. Bati nuzana ayo bagutumye gusa, ayo kurya ku ruhande uzayakurahe?

Ubwo rero nkagenda nkaka ababyeyi amafaranga arenze ayo bantumye, kuko bangiriraga ikizere bakayampa kugira ngo mbone ayo ntanga, mbone n’ayo kujya kurira. Ubwo rero banyigishije no kudakunda no kwiga, bati” Mwarimu iyo umuhaye ibi n’ibi nawe aguha amanota”. Nkamuha ubunyobwa n’imineke, cyanwa se isukari. Mwarimu akambwira ati” nshyireho amanota angahe?” ubwo rero mpita menya ko kwiga atari ngombwa, bitanavuna.

Banyigisha kujya banyandikira amanota, noneho nkabona biroti itariyo, amanota ngashyiraho ayo nshaka bitewe n’icyo nahaye mwarimu. Ubwo nkagera mu rugo ndi umuhanga kandi ntiga birirwa banzerereza, papa akanshimira ati ndi umwana kandi umwana wo mu kirokore. Nta Mwuka Wera nari mfite nubwo nari mbatije! noneho ngeze mu mwaka wa gatatu barambwira bati tujye ahandi. Tujya aho ducurisha noneho nkagera ku kindi kigo, ariko biroti nzanye ari inshurano.

Ibyo nakoze rero ku ishuri, nahindutse umuntu utaziga na rimwe. Data aricara igihe kigeze ati ‘ ariko uyu mwana uhora avuga ngo ari mu mahanga, uwazajya kureba ibyo yiga?’ aje kundeba ku kigo yanshyizeho asanga narahindaguye ibigo, kuko nigaga igihembwe kimwe aha, ikindi nkakiga aha, ukwezi kumwe aha ukundi aha, kubera nyine ubwo buzima nabagamo. Icyo gihe rero papa ahita arakara, kuko twari abakene arambwira ati rero nari nziko uzavamo umuntu ukomeye, none taha ujye guhinga!

Ubwo ndataha nyine kuko niwe wandihiriraga, ankwikirira isuka! Kandi ubwo kwiga segonderi mu gihe cyacu, wabaga uryoshye, wabaga wubashywe, baravugaga bati umubyeyi wawe yabyaye abazungu. Nuko njya guhinga, mu kujya guhinga rero nibwo nagize ikimwaro cy’aho nza guca abandi bana bari kuza mu cyiruhuko, nibaza aho nzaca nk’umuntu wari muri bake bigaga icyo gihe. Nibwo rero ngize agahinda ko kwibaza uko bizagenda, ntangira kwiga gushyira mu bikorwa ibiri muri Bibiliya, ntangira gukurikira abajya gusenga.

Uko najyaga gusenga rero, hamwe n’Umwuka Wera nibwo ibyaha byanjye byaje, binsaba ko njya kwatura nkabwiza iwacu ukuri uko nabikoraga byose. Ndabaturira, birangiye barambwira bati turakubabariye ariko kuko aribyo wahisemo, hariga abandi. Nuko nsanga Imana ndayibwira nti ko natuye, mpa imbabazi ariko ungarurire n’amahirwe nataye.

Umwuka Wera arambwira ati fata byabipapuro ugende utwike, za biroti zose ncana umuriro ndazitwika nsigara nta rupapuro na rumwe mfite! Njya kwiga igifundi ariko Imana irambwira iti ‘Nzakwigisha’. Ubu amashuri ndimo kwiga ni ingororano zo kwihana! (Ubu nzagira Phd). Kwihana nakoze no gutwika izo mpapuro Imana yarambwiye ngo nzakwigisha, nzaguha amashuri, nzakugeza aho utigeze ugera, amashuri yose yo ku isi ushaka uzayiga. Byari ukubera ko Imana yari inejejwe n’igikorwa nkoze ( kwihana).

Ubwo njya kwiga igifundi, gihe kiza kugera njya kwiga amashuri ya Tewologjiya, imyaka 6 ndayirangiza i Bukavu, numvaga ko amashuri ari ayo Imana yambwiye. Ndaza nshaka umugore, maze kubyara abana 5 (mfite abana 6), Imana irambwira ngo isezerano ryawe rirasohoye jya mu ishuri. Kuko nari mfite ya Dipolome ya

Tewolojiya, ndayibereka banyemerera guhera mu wa 3 segonderi. Baranyemerera, bamfata nkaho nize tron-commin byabindi byose natwitse Imana iranshumbusha. Ubwo ndiga ndangiza segonderi, Imana irambwira ngo ntabwo uriga, njya muri kaminuza, ndangije Imana iti’ Ntabwo uriga, njya gukorera Masters nubu irambwira ngo ntabwo uriga, ndacyakomeje amashuri.

Isomo nakuye muri ibyo byose, ibyemezo nagiye mfata ni uko ntajya nirwanirira. Sinjya nirwanirira, ikintu cyose kitwa forode, amanyanga, sinjya nkibamo kuko narabibonye. Iyo ukoze amanyanga uradindira, urumva ko nanjye nari naratakaye kuba narize segonderi mfite abana 5. Iyo nza kuba narumviye Umwuka Wera nkitwara neza, siko byari kugenda. Nahisemo rero kuvuga ngo nzajya nkora ibintu by’ukuri: Yego ibe yego, oya ibe oya, ikinyoma sinkijyamo, nta ruswa naguha, ntayo nafata, ntamanyanga najyamo.

Reba hano ubuhamya ndetse n’inyigisho, Pasiteri UWAMBAJE Emmanuel

Source: Snai Tv

[email protected]

Ibitekerezo (0)

Tanga igitekerezo

Amategeko n'amabwiriza arakurikizwa

Haba hari icyemezo ufashe nyuma y'ubu butumwa ?