Ubuhamya:Uko Nicole yanzwe n’umuryango we(...)

Kwamamaza

agakiza

Ubuhamya:Uko Nicole yanzwe n’umuryango we ariko Yesu akamurengera


Yanditswe na: Ubwanditsi     2021-06-21 06:37:11


Ubuhamya:Uko Nicole yanzwe n’umuryango we ariko Yesu akamurengera

Irankunda Nicole, umuvugabutumwa ubarizwa mu Itorero Presibiteriyene mu Rwanda (EPR), kuva mu bwana bwe yanyuze mu buzima bugoye aho yanzwe n’ababyeyi kuburyo byamuviriyemo kujya arara mu gihuru, ariko Yesu yaramutabaye ndetse amuha agakiza ubu ni umukozi w’Imana wahinduriwe amateka.

Mu magambo ye Nicole arasobanura inzira y’umusaraba yanyuzemo akiri umwana akaba amaze kuba inkumi Yesu yahinduriye amateka.

Ati “Nakoze akazi ko mu rugo ndi umwana muto nkajya nikorera ijerekani ntayibasha, ndibuka umunsi banyirukanye nijoro banziza ko abana bataye akantu k’umutemeri wa supaneti, hari mu mvura nyinshi y’amahindu ndara muri borodire mbona burakeye. Nahise njya gukora ahandi mu rugo mpasanga murumuna wa mabuja. Sinaryaga inyama ariko uwo mukobwa yambeshyeraga ko nzirya bituma uwo mudamu anyirukana antwitse akaguru, yafashe icyuma aragitwika arambwira ngo n’ahandi nzajya gukora sinzongere kurya inyama z’abandi.

Navuye aho ndakomeza ndarorongotana muri Nyabugogo ababyeyi banjye barandetse kuko mama yari yarashatse undi mugabo najyayo akanyamagana ngo yashatse mama ntabwo ari njye yashatse, najya no kwa sogokuru nabo bakanyanga. Nageze aho mpura n’umugabo anjyana iwe i Kibungo ngezeyo nsanga umugore we ari umupfumu, barampigishaga kuva mu gitondo kugeza nimugoroba, byageze aho uwo mugabo ashaka kumfata ku ngufu, hanyuma mushiki we twararanaga andwanira ishyaka akajya andaza mu mufuka uvamo isukari kugira ngo ntafatwa ku ngufu.

Mushiki w’uwo mugabo yarantorokesheje ngenda mu mashyamba nisanga nageze i Kigali. Nagiye iwabo wa papa kuko we yarapfuye, bahita banyirukana. Nahise mfata umwanzuro wo kuba mu bihuru ndibuka nandikiye ubuyobozi bw’ikigo mbabwira ko nta mafaranga y’ishuri nabona, barabyemeye ariko nkajya ndara mu gihuru kugeza ubwo umwana twiganaga namubwiye ibyanjye anjyana iwabo.

Nkigerayo nari mfite imyaka 14, kuko iwabo bari bakijijwe najyanaga na bo gusenga Imana ikajya impa amasezerano menshi. Byageze aho ndabatizwa najya nsenga nkumva hari izindi ndimi ziri kuza mbese nakira agakiza. Igihe cyaje kugera mama aza aho nabaga abasaba ko yanjyana kuko mama ntiyigeze anyanga ahubwo ni uko yaburaga uko abigenza. Yaranjyanye rero turabana nabwo bikomeza kutugora kubona ubushobozi bwo kwishyura ishuri, ariko Imana ikambwira ko izampa ikigo cyiza kandi yarabikoze incira inzira mbona umushinga.

Igihe cyaje kugera Imana inshira inzira njya kwa nyogokuru baranyemera, ariko kuko nari narakijijwe bo badakijijwe najyaga numva amajwi y’abadayimoni ambwira ko mbabangamira. Hazaga ibitero bya Satani ariko Imana ikambwira ngo izandwanirira. Igihe cyarageze nyogokuru ararwara asaba ko ari njye ujya kumurwaza arambwira ati “Sinkwifurije gukora nk’ibyaranze umuryango wacu, ahubwo ngusaba ko wazakorera Imana”. Mubyukuri Imana yari itangiye kunyiyereka ku buryo mu muryango habaga ikibazo bakampamagara ngo nze mbasengere.

Igihe cyarageze nyogokuru arapfa dusigara nk’abuzukuru b’abanyeshuri, ariko Imana yaradutunze igakoresha abantu bakaduha ibyo dukeneye. Byaje kugera aho nsubira kwa mama n’umugabo we mbona ubuzima buranze ibibazo bibaye byinshi mfata umugambi wo kwiyahura, narakugendeye ntoba ikinini cy’imbeba ndakinywa, ariko habe ngo ndware n’ibicurane. Imana yahise intumaho umuhanuzi arambwira ngo kuba ikinini kitakwishe ni uko Imana igufiteho umugambi. Numvise nsubijwemo ibyiringiro ko n’ubwo byose biba Imana ikindinze.

Nyuma Imana yaje kunshira inzira impa umuryango mwiza mbamo uyu munsi, ndetse impera umugisha muri chorale mbamo yo kuri paroisse Imana irabankundisha bakamenyera byose. Ni ubwo buryo nagiye ntabarwamo nk’uko Imana yatabaye Dawidi. Sinirata ko ndimo kwiga mu bigo bihenze, ahubwo ndirata Kristo wenyine.

Asoza ubuhamya bwe Nicole arakomeza abantu bari guca mu ntambara zinyuranye ndeste abibutsa ko Imana Yera itajya itererana abantu bayo ko na nyuma ya zeru ikora kandi Uwiteka ntajya akangwa na byacitse. Icyo dusabwa nk’abantu ni ukwizera no gukora ibyo gukiranuka.

Source: Himbaza tv

[email protected]

Ibitekerezo (0)

Tanga igitekerezo

Amategeko n'amabwiriza arakurikizwa

Haba hari icyemezo ufashe nyuma y'ubu butumwa ?