Ubuhamya:Uko Mukamugema wari imbata y’uburaya(...)

Kwamamaza

agakiza

Ubuhamya:Uko Mukamugema wari imbata y’uburaya n’ubusinzi yakijijwe


Yanditswe na: Ubwanditsi     2020-12-09 09:11:42


Ubuhamya:Uko Mukamugema  wari imbata y’uburaya n’ubusinzi yakijijwe

Mukamugema Rose uzwi ku izina mama Gad ubarizwa mu Ruhango, yabaye mu buzima bwo kunywa ibiyobyabwenge, ubusambanyi, ubujura n’ibindi biteye isoni kuko umutima we wari warabaye akahebwe yahuriyemo n’ingorane zo gukubitwa, guterwa icyuma ariko kuko Yesu yari amaufiteho umugambi yaje gukizwa binyuze mu nzozi zikomeye yarose afata icyemezo cyo kwihana ndetse ahabwa ubutumwa bwo kubwira abatuye isi.

Ari mu kigero cy’ubwangavu yapfushije ababyeyi hanyuma asigarana abana 7 bavukana ari we ushinzwe kubarera. Yageze aho biramuyobera ahungira ku mubyeyi w’inshuti ya mama we nuko uwo mubyeyi kuko yari indaya yigishije Roze umwuga w’ubusambanyi kugirango ajye abona amafaranga yo gutungisha abavandimwe be.

Bidatinze Rose yinjiye mu buraya abufatanya no kunywa inzoga z’ubwoko bwose ndetse ageze aho arabyara nk’uko agiye kubisobanura:

"Satani yari yaranteje umudayimoni w’icyaka (inyota) nahereye kuri fanta bukeye jya kuri byeri, bukeye njya kuri mutsing, nyivaho njya kuri uganda waragi, nyivaho njya kuri kanyanga, kanyanga nayo nyivaho ntangira kuzivanga zose. Mu gitondo narabyukaga nkajya kunywa ikigage, nkahava njya muri tunuri (ubwoko bw’inzoga), ubwo icyaka kikambana icyorezo tugahita tumanuka tukajya kwa Rufufu kunywa igikwangari. Njyewe n’incuti yanjye twakoranaga umwuga Adeline ni twe twafunguraga akabari kuko batubwiraga ko tubatera ishaba.

Hari umunsi ntazibagirwa habaye umukwabo wo kumena inzoga z’ibikwangari, reka mbabwire Uwiteka atari we uhinduye abantu, abayobozi bavunika bidasanzwe. Umuyobozi yaraje asanga twicaye mu kabari tunywa, amena inzoga zose arangije atwinikamo, uko atwinikamo, niko twazinywaga tugotomera twumva ntacyo bitubwiye, byageze aho Executif atuvanamo ati "Buri muntu wese aho ataha". Nahise niruka niyambura imyenda mpita njya kunywa bundi bushya kugira ngo muhime".

Mubyukuri mu buraya nta cyiza kihaba ubuzima bwaho ni imibabaro gusa nk’uko Rose akomeza abisobanura:

"Nahuye n’ibikomeye ariyo mpamvu mbwira abantu kureka uburaya. Ndibuka umunsi umwe umugabo yanjyanye mu gipangu cye, dukora icyatujyanye hanyuma arambika ibihumbi bitanu ku meza kuko ariyo twari twasezeranye. Nazanye akaboko ngo nyafate arambwira ngo ayo mafaranga si ayawe! N’ubugare bwinshi ndamutuka mubwira ko nayakoreye, nkibivuga mbona akuye umuhoro mu nsi ya matelas nahise niruka nambaye ubusa ndokora amagara yanjye. Ntibyarangiriye aho undi munsi undi mugabo yanteye icyuma mu mutwe kugira ngo mpfe cyangwa nsare ariko Yesu yarandinze kuko yabonaga ko nzamukorera".

Mama Gadi akomeza avuga ubugome bwa Satani ati:"Satani ni umushumba mubi agira atya agakora muri depo agakura mo umutezi akaba araguhaye, SIDA akaguhereza, agakuramo umujinya n’agahinda akaguhereza ahasigaye ugapfa uhagaze".

Uko mama Gadi yakijijwe

Rose aragira ati:"Uko Satani yanshakaga ni ko na Yesu yanshakaga, naje kujya mu mushinga witwa "Ihorere munyarwanda" wigishaga indaya uko zikwiriye kubyara abo zishoboye kurera no kwirinda SIDA. Hari umupasiteri wazaga kutubwiriza akatubwira Yesu yadukoresheje n’amahugurwa bakaduha insimbura mubyizi y’ibihumbi bitanu tukajyayo ari yo dukurikiye. Nageraga mu rugo ngatangira gutekereza ku byo nigishijwe ariko nkumva simbyumva.

Umunsi umwe narose inzozi zintera gufata icyemezo. Imana yanyeretse ndimo kugenda urugendo rurerure ariko aho rugarukira hari urusengero rutatse neza abantu bagenda binjira mu kinyabupfura. Aho navaga hari hameze nko mu kabwibwi, abo twagendanaga bari barimbye twaragiye tugeze ku muryango w’urusengero abandi barinjira njyewe umugabo wari uri ku muryango ambuza kwinjira ati "Wowe ntusa n’abandi, ngaho irebe".

Nahise mpabwa andi maso nsanga meze nk’umuntu witwa Lazaro w’umusazi uba iwacu mu Ruhango, uwo musazi ntiyiyogosheshaga, yigaraguraga mu ivu ry’amakara, yambaraga amadeyi n’inzara zaramwereyeho. Nahise nsindwa n’urubanza. Nibajije aho ngomba kujya nuko uwo mugabo yongera kumbwira ngo ndebe hirya mpita mbona abantu basa nabi bari kujya mu kuzimu mu irimbukiro.

Naramubwiye nti:"Databuja! Ndi umusinzi n’indaya" yahise ambwira ati:"Uvuze ukuri ngaho genda ubwire bagenzi bawe bakora ibisa bityo ko umugabane wabo ari mu nyanja yaka umuriro n’amazuku, ariko wowe ugende ushake umwenda mwiza nuza nzakwakira, nahise nsanga indaya bagenzi banjye mbibabwiye baranseka bampindura umusazi, ako kanya nahise nkanguka nsanga zari inzozi ariko numva ko ari promosiyo mpawe yo kuva mu byaha".

Rose yongeye kubona izindi nzozi ari zo zamuteye kureka uburaya ati "Narose twicaranye ahantu n’abagore tumeze nk’abasilamu bari gusali, mbona twicaye duteze amatwi umugore waturutaga arimo kutwigisha uko tuzajya dufata abagabo, uko tuzajya tubambura ariko icyambabaje buriya porono zituruka ikuzimu kuko nagize ntya mbona afite ikintu cy’igiti gishushanyije nk’igitsina cy’umugabo, mbona arimo kucyereka abana b’abakobwa kugira ngo abinjize mu cyaha cy’ubusambanyi ndavuga nti "Ariko se ko twe twarangiye bariya bana b’abakobwa bizagenda bite?" Nahise mvamo ndigendera ndabasiga".

Navuye aho ntambika hirya ngera mu ndaya zapfuye nzizi nuko mbona zarabaye nabi ari amagufwa, barira, baboroga nuko ndabawira nti "Bene mama! Mwaretse tugasanga Yesu ko ari we uzatumara umubabaro? Barambwira bati ariko Rose uri umushinyaguzi, genda umusange twebwe ubuzima bwacu bwarangiriye aha" Bakimbwira gutyo nahise mbona akadayimoni kameze nka Lazaro wa musazi narose karabwira kati "Wowe aho usambana tuba turi, aho unywera inzoga tuba turi kumwe, wibwira abantu gusanga Yesu".

Ako kadayimoni karitakumye kati dore nta cyantandukanya nawe, nabonye ku mukondo we hava umugozi ufata ku mukondo wanjye bimeze nk’urureri ruhuza umwana na nyina, ako kazimu karambwira kati:"Nuca uyu mugozi uzagende usange Yesu uvuga", Natangiye kubona uwo mugozi uvamo ibintu bisa nabi ntangira kuwiyambura mvuga ngo mu izina rya Yesu, ako kadayimoni karaseka ngo Yesu se uramuzi? Nisuzumyye nsanga ntamuzi mfata icyemezo cyo kutazongera kuryama kugira ngo ntazongera kurota Yesu, narasinye nkajya ndara nicaye".

Nakomeje kubura amahoro njya mu rusengero rumwe mpageze ndicara nyuma y’umwanya muto nisanze njyewe n’umwana wanjye intebe tuyicyeho twenyine kuko buri muntu yahagurukanaga isakoshi ye kuko bambonaga nk’umudayimoni, twaratashye tuganira ko batweretse ko turi abanyabyaha.

Ku itariki 27/7 2017 hari umubyeyi witwaga mama Sara turahura arambwira ati:"Wakijijwe ko Satani ashaka kukwica! Nahise nibuka za nzozi ubwoba buranyica, musaba ko yamfasha kugera mu rusengero kuko urwa mbere bari bampunze. Yampaye gahunda yo kujyana gusenga ku cyumweru. Kuko nari umunywi nikomereje kunywa ariko nkajya nibuka gahunda yo kujya gusenga uwo mugoroba nabwiye satani ko natanyica uwo mugoroba ejo nzakizwa, uwo mugoroba ninjije amafaranga menshi ubanza satani yaribwiraga ko yangotesheje amafaranga ngo nibagirwe mu rusengero.

Ku cyumweru harageze nzindukira kwa mama sara tujyana ku rusengero rwitwa Inkuru nziza, tuhageze banyicaza imbere batangiye kuririmba numva ndahindutse ntangira gusuka amarira, numva ntangiye kwanga inzoga n’uburaya. Barabwirije igihe kigeze batanga umwanya wo kwihana ndasimbuka mfata mikoro maze ndondora ibyaha byose nakoze ndihana baransengera ndakizwa.

Dutashye mama sara yampaye igihumbi nuko njya guhaha kandi mbere sinajyaga ndya ahubwo nanywaga inzoga gusa, nageze mu rugo inkuru irakwira ahantu hose bucya indaya ziza kundeba ngo zijye kungurira ariko ndabahakanira mbahamiriza Yesu wankijije, bigeze aho bameneyera ko nabaye umurokore".

Asoza ubuhamya bwe Mukamugema Rose arashima Yesu wamukuye mu byaha kandi ashishikariza abantu bagikora uburaya, ubujura, ibiyobyabwenge ko basanga Yesu akabaruhura, akabaha amahoro yo mu mutima kandi ikiruta byose bakazabona ubugingo buhoraho.

source: zaburi nshya

[email protected]

Ibitekerezo (0)

Tanga igitekerezo

Amategeko n'amabwiriza arakurikizwa

Haba hari icyemezo ufashe nyuma y'ubu butumwa ?