Ubuhamya:Uburwayi bukomeye bwabereye Ndayambaje

Kwamamaza

agakiza

Ubuhamya:Uburwayi bukomeye bwabereye Ndayambaje ikiraro cyo gukizwa


Yanditswe na: Ubwanditsi     2021-02-02 03:41:45


Ubuhamya:Uburwayi bukomeye bwabereye Ndayambaje ikiraro cyo gukizwa

Ndayambaje Shaban wahoze ari umuyoboke w’idini ya Islamu yarwaye indwara y’uruhu iramuzahaza ayimarana imyaka 15 yarananiye abaganga, ariko iyo ndwara yayikiriye mu masengesho ndetse ahita afata icyemezo cyo gukizwa no kwakira Yesu nk’Umwami n’Umukiza w’ubugingo bwe, ubu ni umuvugabutumwa bwiza bwa Kristo.

Mu buzima hari byinshi bitugeraho tukabona ko bishaririye ndetse tukumva ko ari ryo herezo ry’urugendo rwacu hano ku isi, nyamara hari igihe biba bivuye mu bushake bw’Imana ishaka ko tuyimenya neza ndetse tukava mu nzira mbi tugakora ibijyanye no gushaka kwayo. Ndayambaje aradusobanurira muri macye uburyo indwara yamubereye inzira yo gukizwa.

“Mu mwaka wa 2012 nahuye n’uburwayi buteye ubwoba mbabuka umunwa no ku maguru ndavuga nti iri niryo herezo ry’ubuzima bwanjye.Ariko icyo gihe nari ntaramenya Imana kuko nari nkiri umuslamu, uyu mwanya ndashima Imana yankuye aho hantu bitabaye ngombwa ngo numve ijwi ryayo”.

Imana irumva kandi irakora n’iyo itavuga burya isezerano ryayo irarikurikirana kugeza risohoye kuko ni Imana ishobora byose. Shaban arasobanura uko uburwayi bwe bwananiye abaganga nyamara Yesu akamukiza.

“Ababyeyi banjye banjyanye kwa muganga bansuzumye babura indwara kandi narababaraga ku maguru mfiteho ibisebe byinshi cyane n’umunwa waratemutse, nahise numva ntakaje icyizere cyo gukomeza kubaho. Ndabibutsa ko Imana ikora kandi ikomeye, ndabyibuka hari umubyeyi umwe w’umukozi w’Imana yigeze kumbwira amagambo akomeye ati buriya n’ubwo ubona ko ubwo burwayi bukurembeje ariko hejuru y’imbaraga z’uburwayi hari imbaraga z’Imana”.

Mu mwaka wa 2012 mu kwezi kwa 5 nagiye kureba uwo mubyeyi kuko yari yambwiye ko anshaka. Mpageze yambwiye ko yifuza ko twazajyana gusenga mu cyumba cyari gifite groupe yitawa abanyamugisha, yambwiye ko nshobora kuzahakura igitangaza gikomeye cyane.

Igihe cyarageze uwo mubyeyi njya kumureba tujyana gusenga ndibuka ko icyo cyumba cyatangiraga saa moya kikarangira saa cyenda. Naricaye bigeze nka saa yine umumama umwe Imana imukoreramo arambwira ngo umva uko Uwiteka avugana nawe ati ufite ikibazo cyakurembeje, ariko Imana yatumye ugera ahangaha, yashakaga kuhagutabarira, none uyu munsi uraza kuvana amashimwe akomeye ahangaha.

Murumva ko njyewe nari umuslamu iby’ubuhanuzi ntabizi kandi muri Islamu twakundaga kuvuga ngo Imana ntibyara kandi ntibyarwa. Ariko namaze kumva ayo magambo ndataha maze ku mugoroba ndamye nabonye ikiganza kije mbona kinkozeho ku maguru hanyuma gikora no ku munwa. Naribwiye ngo ni inzozi zisanzwe.

Nyuma y’iminsi ibiri naje kujya kureba umubyeyi watangaga imiti ya Kinyarwanda maze ampa umuti ndawuzana ngeze mu rugo mugihe ndamye, mbona umuntu afashe uwo muti arawujugunye. Njyewe narabyutse mu gitondo ngiye gushaka uwo muti ndawubura, narebye ku maguru nsanga bya bisebe bitangiye kugenda bikira buhoro buhoro, mubyukuri nyuma y’ukwezi kumwe mvuye muri icyo cyumba cy’amasengesho nari maze gukira burundu kandi iyo ndwara yari yarananiranye nkeka ko ari amarozi ariko Yesu yarankjije ubu ndi mu murimo w’Imana”.

Asoza ubuhamya bwe, Ndayambaje Shaban aributsa abantu bafite uburwayi bwananiranye ko bakwiye kwizera Imana kuko ijya yemera ko ibibi bitugeraho kandi mu gihe gikwiye Imana izabaramburira ikiganza cyayo gikiza indwara kandi ikirenze byose yiteguye kubakiza ibyaha.

Source: Himbaza tv

[email protected]

Ibitekerezo (0)

Tanga igitekerezo

Amategeko n'amabwiriza arakurikizwa

Haba hari icyemezo ufashe nyuma y'ubu butumwa ?