Ubuhamya:Nyuma y’imyaka 10 atabyara,Annet Yesu(...)

Kwamamaza

agakiza

Ubuhamya:Nyuma y’imyaka 10 atabyara,Annet Yesu yamuhaye abana


Yanditswe na: Ubwanditsi     2021-01-14 09:51:26


Ubuhamya:Nyuma y’imyaka 10 atabyara,Annet Yesu yamuhaye abana

Annet NGONDO ni umubyeyi Imana yagiriye neza imuha umugisha w’abana nyuma yo kumara imyaka 10 n’amezi 7 yarabuze urubyaro. N’ubwo yahuye n’urugamba rukomeye ubwo bagenzi be bamugira inama yo kwiteza intanga, kujya mu bapfumu n’ibindi, Annet n’umutware we bahagaze mu kwizera bategereza bihanganye igihe kigeze bahindurirwa amazina bitwa Papa na mama Isaac.

Annet n’umutware we Ngondo bashakanye mu 1999. Ariko mubyukuri ntibahise babona urubyaro nk’uko babyifuzaga. Annet mu magambo ye aradusobanurira uko byagenze n’uburyo yabyitwayemo.

“Tukimara kubaka urugo ntabwo twahise tubona urubyaro, twabayeho kuva mu1999 imyaka ibiri, itatu irashira tutarabyara dutangira kwibaza ngo ese tuzabyara dute? Twatangiye kujya kwa muganga kugira ngo tumenye uko bimeze ariko abaganga batubwiye ko nta kibazo dufite ngo dutegereze tuzabyara. Muri icyo kigeragezo cyo kutabyara, byadusunukiye mu kwizera. Iyo kwizera kwagabanukaga ku ruhande rwanjye, umutware wanjye we nasangaga akomeye bityo tugafashanya.

Tugeze mu myaka umunani twagize igitekerezo kuko twabonaga imyaka igenda iba myinshi twigira inama yo gushaka abana mu kigo cy’imfubi ngo tubarere twe kuba mu rugo rutagira abana kuko abo tuvukana twabanaga bari bamaze gukura bahavuye. Byageze aho ku ruhande rwanjye ibyiringiro birashira ngira inama umutware wanjye ngo ashake uburyo yabyara hanze ariko arampakanira ambwira ko atabitinyuka ko ahubwo dukwiye gutegereza twihanganye.

Twahuye na byinshi byadukomereye kugeza ubwo incuti zacu zatugiriye inama yo kwiteza intanga umugabo arabyumva aranabyemera hanyuma batubarira amafaranga yo kujya kwiteza intanga twumva ni amafaranga menshi, ariko yiyemeza kuyashaka kugira ngo tuzabone umwana. Ariko naribetaga ngasenga nkambwira Imana nti “Ko ufite ubushobozi bwose, ntushobora kudutabara ukaduha umwana tutagombye kwiteza intanga?”.

Mubyukuri hari ibintu bibaho kugira ngo bitwigishe, mu rugo twari dufite inka,umunsi umwe baza kuyitera intanga irababarara cyane. Nitegereje uburyo ibabaye kandi ari inka mpita ngira ubwoba ndavuga nti “Nka njye nzababara bigezehe?” Ikigaragara icyemezo twari twagifashe n’umutware cyo kwiteza intanga ariko naramwegereye mubwira ko nabivuyemo ko ahubwo dukwiye gushyira ibyiringiro byacu ku Mana tugategereza twihanganye kuko Ibasha gukora cyane ibirenze ubwenge bwa muntu.

Umunsi umwe mugenzi wanjye yanyoherereje Ijambo ry’Imana riboneka mu gitabo cya Yesaya 66:9 “Mbese nzatuma batwita ne gutuma babyara?” Nibyo Uwiteka abaza. “Ko ari jye utuma babyara nabaziba inda?” Ni byo Imana yawe ibaza.
Mubyukuri iri jambo ryambereye inkomezi cyane kandi natangiye nsenga mbwira Imana ko mu bantu ituma batwita, babyara n’abo itazaziba inda nanjye ndimo.

Mugihe cyo gutegereza nahuye n’ibigeragezo kuburyo umuntu umwe w’incuti yanjye yangiriye inama andangira umupfumu w’i Nyarutarama najyaho akamfasha kubona umwana, umubyeyi yampaye numero z’uwo mupfumu numva ndabyemeye ariko uwo mukecuru ahita ambwira ati: “Ese ko mbona usenga cyane ubu bizakunda uzemera kujayo?” Naramusubije nti “Birangoye ariko ukuntu nshaka abana nzajyayo”.

Ngeze mu rugo uwo mukecuru akimara kungira inama natashye mfite amarira n’agahinda mbwira Imana nti ko nimbona umwana utavuye mu gushaka kwawe ko ntazabona uko ngushima, nti “Ese Mana ko abantu bagira ibyago mugihe nzaba ngiye cyangwa mva kuraguza imodoka ikankubita ngapfira mu byaha, ubu koko nzabigenza nte?” Nigiriye inama yo kubivamo nkizera Imana ariko ngahora ncengana na wa mukecuru nti “Naza kundeba nzamwihisha kuko numvaga ntafite icyo kumubwira ariko nigira inama ko nzamubwira ko ntwite, nihashira igihe akomeje kumbaza nzamubwira ko yavuyemo ariko ko nzasama indi”.

Gukora kw’Imana kurahambaye icyo gihe nari ntwite ariko ntabizi. Muri ibyo bihe natangiye kurwara no kugubwa nabi, mfite isereri no kwibagirwa kwinshi ndavuaga nti“Umenya noneho nasaze cyangwa ari izindi ndwara ntazi! Nibwo nagiye kwa muganga mu mujyi munsi yo kwa Rubangura ahantu hitwaga kwa Venant nasanzeyo Dr Catherine, ambaza uko ndawaye hanyuma ndabimutekerereza. Yarambwiye ati “Mu miti dutanga tubanza kureba niba umuntu atwite, nawe jya gukoresha ikizamini”. Naramusubije nti: “Dr! Iryo tangazo ntirindeba kuko njyewe simbyara ” Yaranyinginze ngo njye kwa Knimba kwifatisha ikizamini, ndamubwira nti “Ndagiye ariko kubera ko nkubashye”.

Ngiye kw’ivuriro ryo kwa Kanimba nkoresha ikizamini hanyuma ampa ibisubizo bifunze ngo mbishyire muganga wabintunye, nabigejejyo Dr Ctherine arandeba cyane!! Arambwira ati “Ndabona utwite” Naramuahanyije tujya impaka ambwira ko ngomba kujya ahandi bakongera gupima. Umutima wanyumvishije kwakira ko ntwite, narabyakiriye kandi ndabigendera ntangira kwiyumva nk’umubyeyi utwite.

Nageze mu rugo mbibwira umutware ariko mubwira ko nzajya kwipimisha ahandi kandi koko narabikoze njya kwa Nyirinkwaya (La Croix du Sud) kuko nari nsanzwe mpivuriza tumaze kumenyerana, nuko mugihe yarimo ampima arambwira ngo “Felicitation Annet uratwite! Yongeraho ati: “Reka ndebe amavi yawe ko yakobotse usenga?” Namubwiye ko atakobotse ariko ko nasenze cyane. Icyo gihe natangariye Imana cyane ibyishimo birandenga mpita mbona ko Imana yantabaye ntagiye mu bapfumu, Nahize umuhigo ko nzayibwira bose nkavuga ko ari Imana itanga urubyaro. Naratwise igihe kigeze mbyara umwana w’umuhungu, imyaka ibiri itaruzura nahise nsama inda mbyara umukobwa. Ubu ndashima Imana yangiriye neza.

Abantu bose twagiye tubona muri Bibiliya bagiye bita Imana amazina atandukanye bitewe n’umunezero buzuye w’ibyo ibakoreye, Njyewe Ikimara gusubiza amasengesho yanjye ikampa abana babiri umuhungu n’umukobwa nayise Ishoboyebyose. Nabonye ari Imana ihindurira umuntu izina nka njye witwaga Annet gusa nitwa mama Isaac kubera ko nabonye umwana. Nshimye Imana ko mbasha gutanga ubuhamya bw’igitangaza Imana yankoreye haba ku rusengero haba mu itangazamakuru kandi ni umuhigo nahigiye Imana ngomba kuwuhigura ngasubizamo intege abari batentebutswe.

Asoza ubuhamya bwe Annet arashima Imana kandi agira inama abantu bagitegereje urubyaro gukomeza kwizera Imana kuko niba ari yo yaremye amaso irareba kandi yaremye amatwi irumva, bivuze ngo iratureba kandi iratwumva. N’aho bishaririye ariko Imana iba iri kurema ubuhamya kugira ngo ibugwize maze umuntu azabone icyo abwira abandi.

Source:gloryhousetv

[email protected]

Ibitekerezo (0)

Tanga igitekerezo

Amategeko n'amabwiriza arakurikizwa

Haba hari icyemezo ufashe nyuma y'ubu butumwa ?