Ubuhamya:Musonera wabaye umupfumu afite(...)

Kwamamaza

agakiza

Ubuhamya:Musonera wabaye umupfumu afite imyaka 13, yaje gukizwa


Yanditswe na: Ubwanditsi     2020-09-18 09:24:38


Ubuhamya:Musonera wabaye umupfumu afite imyaka 13, yaje gukizwa

Musonera Jean Baptiste, umugabo wubatse ufite umugore n’abana 5 ni umukristo mu itorero ADEPR, umudugudu wa Beteri muri Paroisse ya Bugarama.Yavukiye mu muryango utamukunda biza kumuviramo ibyago byo kuba ikirara n’igisambo cyo mu rwego rwo hejuru. Ku Kigero cy’imyaka 13, yinjiye mu bupfumu abukora igihe kirekire ariko igihe cyarageze arakizwa yakira Yesu nk’Umwami n’umukiza w’ubugingo bwe.

Mu magambo ye, Musonera arasobanura ubuzima yanyuzemo n’impamvu umuryango we utamukundaga ati: "Ntabwo nemewe nk’abandi bana mu muryango, kuberako navutse iwacu bamaze gupfusha abana bagera kuri batatu, maze bajya kuraguza kugirango babaze umupfumu icyo bakora kugirango bazabyare baheke, umupfumu rero abagira inama y’uko undi mwana bazabyara bazamugira igitambo cya Nyabingi maze zikamunywa amaraso nyuma y’ibyo akazabaho, maze bakabyara bagaheka. Nicyo cyatumye naravutse bakamurikira abadayimoni, bagiye bandasaga amaraso yanjye bayasuka ku mbehe, bayashyira abazimu ngo bayanywe bangira igitambo niyo mpamvu ntemerwaga kuko bari bazi ko nzapfa ariko nabayeho."

Jean Baptiste yabayeho mu buzima butoroshye aho yagendaga arerwa n’abantu batamubyaye bagenda bamuhanahana ariko abaho, yabisobanuye agira ati: "Nibuka yuko narezwe n’abantu batambyaye, aho mama yantaye, undi yarantoraguraga, uundi aho anshyize undi akantoragura bagenda bampererekanya gutyo ngera mu myaka umunani nibwo nabonye ko ubuzima bwanjye bushobora kuba bugeze ku iherezo, ntangira kwibeshaho nkajya niba, nkamena amazu y’abantu ntagiye gutwara amafaranga ahubwo ngiye gushaka ibiryo, byageze aho abantu batangira kumpiga bakankubita .

Ngeze mu kigero cy’imyaka 10, nibwo nigiriye inama yo kureba icyo nakora ngo nibesheho, nibwo ninjiye mu idini ya Islamu njyanywe gusa no kwishakira ibiryo kuko nari nziko bakunda kugira imirire, nagzeyo baranyigisha mba umuhanga banyita Abdra Hamani ariko ya ngeso yanjye ntiyihishiriye natangiye kujya mbacunga bamaze kwinjira mu musigiti nabaga ninjiranye agafuka ngasohoka gacye ngatwara inkweto zabo. Byageze aho Islamu nayo nyivamo mbona inzara igiye kunyica kuko nabonaga irayidi izajya kugera ntakiriho.

Nkimara kuva muri Islamu nerekeje muri Kiliziya Gatolika nigira umubatizo barambatiza, ariko nkimara kugera mu rugo nywa urwagwa rwinshi ndasinda numva ingeso yo kwiba irazamutse mpita ngenda njya kwiba baramfata barankubita, kuva ubwo sinasubiye muri Kiliziya ukundi. Igihe cyarageze mfata umwanzuro njya mu itorero ry’Ababatisita naho barambatiza, mugihe nari mvuye muri yorodani, nabajije Pasiteri impavu atanyise izina kandi abandi yayabise, ambwira ko anyise Maritini , kuko martini yari igismbo gikomeye mu gace, nabajije Pasiteri impavu ariyo anyise maze aransubiza ati:"Wowe ntuzabe igisambo" ariko naho sinahagumye.

Mugihe nari mfite imyaka 13, nigiriye inama yo kuba umupfumu maze ndagenda njya gucisha maze banca impigu (ibihembo) bambwira ko ngomba kuzana amagi 50 y’inkoko, kazana inkoko y’ibara rimwe, bantuma igitoki ntemye mu rwobo bakuyemo urwondo rwo guhoma inzu, bantuma imigina y’imiswa bantuma n’utubindi tubiri two mu basangwabutaka. Ibi byose narabyibye ndabizana kuko ntabyo nari mfite ariko inkoko yo narayibuze kuko nagiye kwiba baramfata barara bankubita.Umupfumu nari mbishyiriye ampa ibikorasho: ibinyuguri, ingegene n’ibindi ariko ambwira ko, ntazabona umugabane uhagije nintabona iyo nkoko, maze ambwira ko amapaye ibivuga ikiragi.

Ubwo nahise nshaka abahungu babiri (Bipira na Nyirishema) bakoraga akazi ko ko kuragura ariko nabo bari ibisambo bikomeye turakorana, ninjira umwuga wo kuragura ndawukora koko kandi nari mfite abakiriya benshi kandi abantu bari barabuze amahoro baje kuyanshakirah

Igihe cyaje kugera ibyo kuragura biranga abantu banshikaho babona ko ibyo nkora bidafite umumaro, nigiriye inama rero ngura micro y’amafaranga 2500, ngura na radiyo yitwaga chama cha mapinduzi nyikuramo micro nyishyira ku munwa w’akabindi hanyuma ngenda ntambagizaho amababa n’uduhu tw’inyamaswa maze wabireba ukagira ubwoba, abantu bazaga kuraguza bambaye ubusa maze bahagera nkavugira muri ya mikoro ndetse nkabavugiriza ibinyuguri mu matwi cyane kugirango mbakange mbatware ibitekerezo nigarurire imitima yabo maze icyo mvuga bacyumve.

Ariko burya ibyo Satani akora ntibiramba, igihe cyaje kugera ndamenyekana mu 1993 banshyira mu mvaho yari isohotse ko hadutse igisambo ruharwa batangira kunshakisha nsa n’umubtu uhunga njya i Gako mu Kinihira. Ngezeyo baza kuhamfatira banjugunya mu rwobo rwa metero 15 ncuritse umutwe ariko Imana irandinda sinapfa, baza kunkuramo banjyana kwa muganga baramvura ndakira. Mvuye kwa muganga nibwo nagarutse ku ivuko mbona data na mama nabo bambonye baranyoberwa ariko abaturanyi bari banzi babigiramo uruhare maze ababyeyi barongera baranyemera.

Bitewe n’uko nashakishwaga n’igihugu, nahisemo gutoroka njya i Burundi nkomereza muri Tanzaniya ngamije kujya gucisha kugirango nzaze ndi umupfumu wo mu rwego rwo hejuru. umugabo nahingukiyeho witwaga Bunuki niwe wambereye nka data kugirango mbone ubwenegihugu bwa Tanzania yari umupfumu wo ku rwego rwo hejuru.

Uwo mupfumu yari afite ibintu bitaga imitsindo 2 maze akabishyira mu nzira umuntu yabitambukaho akagwa igihumure agasa n’upfuye maze benewe bakajya kumushyingura, nyuma umupfumu yajyaga ku mva ya wa muntu akazana icyuhagiro akagikubita hejuru y’imva maze ikisatura umuntu tukamukuramo ari muzima, akaza adafite ubwenge tukajya tumukoresha nijoro ahinga ibisambu ariko byagera mu rucyerera tukamukubita cya cyuhagiro akagwa igiumure tukamujyana. Uwo muntu twamugaburiraga ibyatsi bya ruvubu byo ku mazi.

Mu 194, Muri Tanzaniya haje impunzi z’abanyarwanda, iyo najyaga muri izo mpunzi nagendaga mvuga igiswahili kuko nangaga ko bamenya kandi naraje aribo mpunga ngo batangirira nabi bashingiye ku mateka y’ibyo nakoraga. Narahageze nsangamo abantu bw’iwacu turamenyana ariko ngira ibyago nsanga bo barakijijwe basengeraga mu itorero bita Karuvariyo. mu rwego rwo kugirango mbiyegereze nagiye kurisengamo ndetse mbatizwa ntize igice, ariko wa mupfumu twabanaga twaratandukanye mpava nibye gitari n’ubwo nasengeraga muri iryo torero.

Agakiza karankurikiranye maze mu 1996 mfata icyemezo ndongera nsubira mu mazi njya kubatizwa agakiza kamfata gutyo mba mbaye umukristo kandi nari nagiye nkurikiye umuziki w’abarokore, agakiza kanyibagiza ibyo nakoze kera, kanyibagiza abanyaga, nibwo nafashe icyemezo cyo gutaha ngaruka iwacu mu Rwanda nza mfite icyemezo cy’uko nari umukristo, Ngeze mu Rwanda ndagitanga ariko ntibacyemera neza bakavuga ngo"Dushingiye ku mateka ye natabwo yakizwa.

Burya imabaraga z’Imana ntizirondoreka, yanshoboje kugenda nera imbuto, bigera ku rwego babona ko ndi umukristo. Kuva icyo gihe kugeza uyu munsi ndavuga Yesu wangiriye neza, kandi sindasubira inyuma, nta na gahunda mfite yo gusubira inyuma uretse kugira abantu inama gusa nkababwira ngo mu buzima bwose umuntu yaba arimo, hahirwa ufite Imana ya Yakobo nk’umutabazi we akiringira Uwiteka".

Asoza ubuhamya bwe, Musonera Jean Baptiste arashima Imana yafashe amateka ya Kavukire, igafata amateka y’imyuga yakoze yose ikayakubira hamwe ikayabyaza agakiza uyu munsi akaba ari umukristo unezezwa no kumva ijambo ry’Imana ndetse ni umuvugabutumwa bwiza. Ikindi kintu Musonera ashimira Imana ni uko yamuhaye igikundiro mu bantu mugihe mbere y’uko akizwa aho yanyuraga bamuteraga amabuye kubera ibyaha bye.

Source: Zaburi Nshya

[email protected]

Ibitekerezo (0)

Tanga igitekerezo

Amategeko n'amabwiriza arakurikizwa

Haba hari icyemezo ufashe nyuma y'ubu butumwa ?