Ubuhamya:Kutumvira Imana byabateje akaga(...)

Kwamamaza

agakiza

Ubuhamya:Kutumvira Imana byabateje akaga bananirwa kwishyura banki


Yanditswe na: Ubwanditsi     2021-06-29 04:27:57


Ubuhamya:Kutumvira Imana byabateje akaga bananirwa kwishyura banki

Umuryango wa Muyango Philibert na Madeleine buzuye umunezero mwinshi ndetse barashima Imana ko yabigaragarije ikabishyurira umwenda wa banki wari ubahangayikishije, aho umutungo wabo wendaga gutezwa cyamunara bitewe n’uko banze kumvira umuburo w’Imana bagafata inguzanyo maze bakananirwa kuyishyura.

Mu magambo yabo barasobanura uko byabagendekeye nyuma yo kwanga kumvira Imana ibabuza gufata inguzanyo, ndetse n’uko yaje kubatabara ikabishyurira umwenda wa Banki.

Madeleine aragira ati: “Hari mu 2018 turicara nk’umuryango twemeza gufata inguzanyo muri banki, ariko twari dusanganywe indi nguzanyo mu yindi banki. Impamvu twari tugiye kubikora ni uko hari umushinga wari uje uzamara imyaka ibiri kandi twareba tugasanga tuzajya tubasha kwishyura neza. Mubyukuri twashakaga miliyoni 15 kandi dusanganywe inguzanyo ya miliyoni 12 mu yindi banki.

Twabigiyemo dutangira igikorwa cyo gusaba inguzanyo ndetse bigeze ku musozo, ndibuka umutware wanjye yari arimo ashaka ibyangombwa bya nyuma kugira ngo baduhe ayo mafaranga. Abantu b’Imana banyuze mu rugo iwacu, ariko ntabwo twari tuziranye cyane kuko twari twarahujwe na murumuna wanjye usengera muri ADEPR, bityo bari bahanyuze kugira ngo mbajyaneyo bajye kumusura no kumusengera.

Abo bashyitsi bari umugabo n’abadamu batatu bicaye iwanjye batangira gusenga. Nagiye kumva numva umwe muri bo arambwiye ngo amafaranga mushaka gufata muyihorere, murashaka gufata amafaranga menshi ariko nimuyihorere”. Numvise bintunguye, ariko nihagararaho ndavuga, ngo nonese amafaranga turayakura he? Nagira ngo numve ibyo ari byo. Yarambwiye ati “Ntabwo mbona aho muyakura, ariko ndabona muyafata muyasinyira impapuro nyinshi, nimureke ayo mafaranga kuko kuyishyura birabagoye ndabona mwenda gutandukana imiryango yashwanye abantu baraza iwanyu kubishyuza bambaye amajire”.

Nkimara kubyumva nagize ubwoba, sinasobanuye ibyo ari byo, ariko nabijeje ko tugiye kureka ibyo bintu. Baratashye nuko nganira na papa Daisy dusa n’ababihagaritse kandi byari bigeze ku musozo, ariko twakomeje kubivugaho ntibyanadushimisha tukajya dutangira kwiha ibisobanuro, tugatangira kubyoroshya duti: “Buriya ubwo Imana yabivuze ni ukugira ngo tuyafate dusenge dukore cyane kuko twashakaga kuyafata tugakora business”.

Mubyukuri twabihagaritse amezi abiri gusa, ariko mu kundi kwezi twongera kubigarukaho ngo tuyafate ariko twakwibuka uko Imana yatubwiye bikatuyobera. Twatangiye guhindura ibyo Imana yatubwiye dushyiramo ibyacu. Twigiriye inama yo gufata ya mafaranga ariko dusaba macye atazatunanira kwishyura, aho kuba miliyoni 15, twafashe miliyoni 6.

Tukimara kuyafata ya business twatangiye ntabwo yigeze igenda neza ahubwo yahagaze ku buryo butunguranye tutazi uko bigenze kandi nta busobanuro bugaragara. Yagombaga kumara imyaka 2, ariko ntiyigeze imara n’amezi ane yahise ihagarara. Ibintu byose bambwiye basenga ni ko byagenze.

Banki yaratwishyuje ndetse abo bantu bambaye amajire umuntu w’Imana yavuze baraje badutera iwacu mu rugo, baraduhamagaye twumva tugiye guhunga kino gihugu. Twageragezaga kwishyura imwe ya mbere ariko iya kabiri biratunanira pe!

Hanyuma ibintu yigeze kuvuga ngo abonye imiryango ishwana, urumva twari twasabye ingwate kandi tuyisaba mu muryango duhuriyeho n’abandi bana na muzehe ni we wari wadusinyiye. Imiryango yarashwanye, abavandimwe barashwana kuko ntibumvaga ukuntu bagiye kuza bagateza ingwate y’abantu bahuriyeho ari nka 4, ntawumvaga undi abantu twakundanaga twatangiye kurebana ay’ingwe.

Mubyukuri twarababaye twicuza impamvu tutumviye Imana, Satani aradutera aratwoshya atubwira ko Imana itakituzi, yatujugunye. Hanyuma umwaka wa 2018 warangiye utyo, ariko ndababwiza ukuri ko umwaka wa 2019 twaragendaga tukumva turasubira inyuma, twavugana n’abantu tukumva ntituri kuvuga neza twibazaga ukuntu bagiye kuza bagafata ahantu h’umusaza bakahagurisha bikatuyobera.

Dusoza umwaka wa 2019 twarasenze twiginga Imana turarira tubwira Imana ngo n’ubwo twakoze amakosa ntitwumvire tukigomeka, ariko dusoma ko uri Imana igira imbabazi, ibabarira kuki twebwe utadukuraho uyu mugayo. Twaratashye ariko ntitwari tuzi uko bizagenda. Twabonye amabaruwa atatu y’integuza ko banki igiye guteza cyamunara, mubyukuri twari twiteguye ko igihe cyose baza bakahagurisha kuko twari twageragaeje kwegera inshuti n’abandi bose bashoboraga kudufasha birananirana tugera aho turyama ntidusinzire ariko duhebera urwaje.

Hanyuma banki igiye kugurisha 2020 covid iba iraje ibintu bigenda gacye, bigeze mu kwa 7 dutegereje ko bagurisha dutangira kumva baravuze ngo ha hantu Leta yahashimye ngo ihubake amashuri. Bukeye mu gitondo baraduhamara batubaza bati “Ahantu hanyu bimeze gute?” Mwa bantu mwe Imana yarabikoze mu kanya nk’ako guhumbya Leta iratwishyura. Ntitwishyuye ya banki yonyine, ahubwo twashoboye kwishyura na banki ya kabiri. Ni ukuvuga ngo Imana iyo ivuze irabikora kandi neza”.

Basoza ubuhamya bwabo baragira bati: “Uwiteka yumve ko duhagaze hano tumushima kuko ibintu biraba tukumva ko byagombaga kuba, ariko Uwiteka yaraturwaniriye tumuhaye icyubahiro”.

Src: Sinai Tv

[email protected]

Ibitekerezo (0)

Tanga igitekerezo

Amategeko n'amabwiriza arakurikizwa

Haba hari icyemezo ufashe nyuma y'ubu butumwa ?