Ubuhamya:Igitangaza Yesu yakoze ku mwana wa(...)

Kwamamaza

agakiza

Ubuhamya:Igitangaza Yesu yakoze ku mwana wa Anna wavukanye amagarama 690


Yanditswe na: Ubwanditsi     2021-06-24 08:16:00


Ubuhamya:Igitangaza Yesu yakoze ku mwana wa Anna wavukanye amagarama 690

Umubyeyi Anna yuzuye umunezero mwinshi nyuma yo kubona igitangaza cy’Imana ubwo yafatwaga n’uburwayi atwite bikaba ngombwa ko umwana bamukura mu nda afite amagarama 690 nyamara akabaho. Ni ibintu bitajyaga bishoboka, ariko iyo Yesu ategetse byose biramwumvira.

Mu magambo ye arasobanura inzira y’umusaraba umwana we yanyuzemo n’uburyo Yesu yababereye ingabo ibakingira hanyuma umwana akava kwa muganga afite ibiro bishyitse ubu akaba yarakuze:

Ati “Nari mvuye gusenga bisanzwe ntwite ndabyibika haburaga ibyumweru bicye ngo amezi atandatu yuzure. Nafashwe n’uburibwe maze numvise bikomeye njya kwa muganga, ngezeyo muganga amaze gupima ambwira ko ntagomba gutaha kuko mfite indwara y’umuvuduko mwinshi w’amaraso yahuriranye na proteyine nyinshi mu mubiri kandi ko biteza urupfu. Ndibuka abo twari kumwe bafite iyo ndwara bo barapfuye, ariko Yesu yaranyimanye ndamushima.

Muganga yambwiye ko ngomba kuguma aho bakareba niba bishobora kugabanuka, ariko ko inda bagomba kuyikuramo kugira ngo bakize ubuzima bwanjye. Yari umwana Imana yavuzeho byinshi binyuze mu buhanuzi. Muganga yarambwiye ati “Ikintu cya mbere ni ukugukuramo umwana” Nahise musubiza nti “Uyu Yesu yavuzeho! Abandi itavuzeho baravutse ndabarera barakura, none uwo Imana yavuzeho ni we mushaka gukuramo? Ntabwo mumukuramo”.

Dogiteri yarambwiye ati “Ntuzi ingaruka zishobora kukubaho: 1.Urasara 2. Urahuma n’ibindi. Naramubwiye ngo ntibizambaho mu izina rya Yesu”. Byageze aho muganga aganiriza umutware wanjye arabimwumvisha na we aza kungira inama ariko mubwira ko bidashoboka ko bankuriramo umwana. Dogiteri yarandebye neza ayoberwa burundu icyo nishingikirijeho, ariko iyo bamaraga kugenda ningigaga Imana ngo inyoherereze Malayika”.

Imana yaje kunyoherereza Malayika kuko hahise haza umuganga wari uvuye mu bihugu byo hanze, impamvu mvuga ko ari Malayika ni uko navuyeyo na we agahita avayo akajya mu rindi vuriro kandi akinjira ho ndi numvise ijwi rimbwira ngo malayika wasabye araje. Yinjiye aririmba indirimbo ayirangije arambaza ngo wizera Imana? Ndamubwira nti “Ndayizera cyane” Yarambwiye ati “Maze imyaka 27 mvura abagore, ariko igihe cyose ngiye kuvura umurwayi ndavuga ngo Mana ngiye gukoresha ibyo nize ariko wowe ushyireho ikiganza cyawe”.

Yakomeje ategereje agira ngo akana kiyongere ibiro, ariko ntibyaza gukunda bigeze ku mezi 6 umwana bamukuyemo afite amagarama 690. Bamaze gukuramo umwana njyewe nabaye nabi kurushaho kuko umubiri waragiye urabyimba ku buryo bukabije. Umwana bamukuramo bari bazi ko atagomba kubaho kuko nta bihaha yari afite. Ariko igitangaza cyabaye bamukuyemo, yateye induru abaforomo barumirwa bavuga ko ibibayeho ari ubwa mbere babibonye aho umwana udafite ibihaha arira kugeza aho bamushyizeho oxygen.

Ikindi gitangaza ni uko umwana uvutse angana atyo iyo bamuhaye amashereka bidakorana n’umubiri we agahita apfa, ariko uwanjye yarayanyoye ntiyagira ikibazo. Byageze aho abaganga baza kutubwira ibibazo umwana afite harimo kuba afite amazi mu mutwe, kuba afite igihaha kimwe, mu mutima amaraso atajya aho agomba kujya ndetse n’imyanya ndangagitsina yari itaraza kuko ikura ku mezi 9, bambwiye kandi ko kubera ukuntu yavutse urutirigongo rushobora kudakora bityo akananirwa guhaguruka, kwicara, kugenda n’ibindi.

Igihe cyarageze njyewe baransezerera umwana asigarayo nkajya njya kumwonsa. Igihe kimwe twari turimo gusoza umwaka tujya kwa muganga kureba umwana tujyanye n’abandi bana bacu kugira ngo dusangire na we. Tugezeyo twasanze byabaye bibi cyane. Twasanze yabyimbye bikabije ahantu hose yabaye umukara. Twaratashye tumusigayo ariko mfata icyemezo cyo kujya njya gusenga buri munsi ntitaye ku kuba ntarakomera. Naje kubabwira ngo uko twicara dusenga turema, burya mu isi y’umwuka hari ikiba kiremeka.

Ndibuka nari ndyamye mu nzozi mbona umwana wanjye arimo gutaka afashe ha hantu nkajya mbona amaraso adudubiza kuko ntiyajyaga aho bikwiriye, ariko mbona umuntu araje afataho aravuga ngo humura birababaza, ariko urakira. Nyuma y’izo nzozi haje umuganga w’inzobere uvuye muri Amerika ageze ku mwana wanjye, yarakugendeye amukura kuri buri kimwe cyose bari baramwandikiye hanyuma akora systeme nshya. Nyuma y’igihe gito umwana yari avuye ku byuma bimuha oxgene akize”.

Asoza ubuhamya bwe, Anna arashima Imana yamukoreye igitangaza ikamurindira umwana kwa muganga kugeza igihe akuze agataha mu rugo. Arakangurira abandi babyeyi n’abantu muri rusange gusenga no guhagarara mu kwizera kwizera Imana kuko ishoboye byose. Akomeza kandi atangariza abantu ko uwo mwana wanyuze mu nzira y’umusaraba bene ako kageni, yakuze ubu akaba yiga.

Source:himbaza tv

[email protected]

Ibitekerezo (0)

Tanga igitekerezo

Amategeko n'amabwiriza arakurikizwa

Haba hari icyemezo ufashe nyuma y'ubu butumwa ?