Ubuhamya:Charlotte Yesu yamukijije umugongo(...)

Kwamamaza

agakiza

Ubuhamya:Charlotte Yesu yamukijije umugongo abanganga babona byarangiye


Yanditswe na: Ubwanditsi     2021-03-30 09:03:53


Ubuhamya:Charlotte Yesu yamukijije umugongo abanganga babona byarangiye

Murorunkwere Charlotte umukristo mu itorero ADEPR umudugudu wa Nyarugenge yahuye n’ingorane zo kuba imfubyi akiri muto ariko akomeza gukizwa, yanyuze mu buzima bugoye ku buryo yarwaye Imana ikamukura mu rupfu abaganga n’abandi bantu babona ko byarangiye. Ibyo byamubereye igitsikamutima bimukundisha Imana ku kigero cyo hejuru.

Umugambi w’Imana ku muntu yaremye ni mugari kandi irinda ijambo yavuze kugeza irisohoje kuko ari Imana itabeshya. Mu magambo ye Murorunkwere Charlotte arasobanura uko Imana yamukuye mu menyo y’urupfu imusubiza ubuzima.

“Nyuma y’ibyumweru bitatu dukoze ubukwe natangiye kuwara nkajya mu bitaro kandi hagati aho nari narasamye. Ndibuka ko ku ivuriro ryo kwa Nyirinkwaya (La Croix du Sud) twahishyuye ibihumbi 827 n’imisago icyo gihe hari mu mwaka wa 2008. Nararwaye kugeza ubwo namaze amezi 9 nta kintu nshyira mu nda, nanywaga amazi nkaruka ibintu by’ibiremve (amaraso) nararwaye mva ku biro 82 nsigarana ibiro 30.

Mubyukuri ntibyoroshye gusobanura uko narwaye kuko nari narahindutse amagufwa kuburyo murumuna wanjye yanteruraga urumva umuntu w’ibiro 30 biroroshye kumuterura. Nararwaye bigera aho mbona ko kubaho bitagihari mbwira Imana nti “Yesu nshyize ubugingo bwanjye mu maboko yawe ubundi umpe iherezo ryiza”.

Nkivuga gutyo nagiye kubona mbona umugabo mwiza araje yari afite urumuri rwamenaga amaso araza agenda neza kumureba bikanga mpita ntokesha mu izina rya Yesu kuko nari nzi ko ari umudayimoni. Yaje anyegera angeze iruhande arambura ibiganza mbona mo inkovu z’imisumari mpita nikubita hasi mera nk’upfuye ndavuga nti mbabarira Mwami wanjye nakwitiranyije, nkibivuga yahise andambika ho ibiganza arambwira ngo umva mwana wanjye utinyishijwe n’iki ko ndi Imana yawe? Utinyishjwe no kubyara? Uko nabyazaga abaheburayo muri Egiputa niko nzakubyaza, ntuzapfa uzarama kugira ngo utekerereze abantu imirimo myiza nagukoreye.

Burya Imana icyo yavuze iragishoza nabyaye mfite ibiro 38, banjyanye kwa muganga mfite ibise ngezeyo birahagarara barategereza bucyeye bantera tewobari (imiti yongera ibise) na byo biranga bafata icyemezo cyo kumbaga. Banjyanye mu ibagiro (sale d’operation) bamaze kuvoma ikinya bagiye kukintera, nafashwe n’akayi gacye cyane kuko nta mwuka nagiraga wo gusunika umwana narakoroye gacye umwana aba araje. Uko yambwiye ko izambyaza nk’abaheburayo kazi ni ko yabigenje habaye imbaraga z’Imana impa umwana ufite ibiro 3 n’amagarama 200 kandi ntarariye cyangwa ngo nywe mugihe cyo gutwita.

Muri ubwo burwayi bwose nabaga mfite kwa muganga nta ndwara babonaga ariko umutware wanjye yagiye gusenga Imana imubwira ko bampumanyije (bandoze). Igihe cyarageze Imana intumaho umuntu arambwira ngo kuko bakubwiye ko urwaye ukaba waranze kunywa imiti, nupfa uzabarwa nk’uwiyahuye. Kuva ubwo natangiye kunywa imiti y’uburozi, nayinyweye igihe kirekire ngiye kuruka nduka umutubu (ubwoko bw’igikeri) ari kizima kirasimbuka nahise ndabirana, mubyukuri si ibanga ibi byabaye hari abadiyakoni na bo babihamya. Si ibyo gusa ahubwo bari barandoze uruvu kuburyo umubiri wanjye wahoraga uhindura amabara nakwisiga amavuta ntamfate ariko ndashima Imana yandinze ikankiza ndetse ikansubiza umubiri muzima.

Maze kubyara umwana wa 2 nafashwe n’umugongo kuko muri genocide bari baradukubise cyane nkurizamo ubwo burwayi. Umugongo warandembeje njya CHUK banyohereza Roi Faical kuko nari mfite uburibwe budasanzwe. Nabaye mu bitaro umwaka wose, baransuzumye bambwira ko batazamvura ko ibyanjye byarangiye ntazakira kuko nageraga igihe ngatakaza ubwenge ndetse n’ingingo ntizikore, naragiye mbyimba umubiri wose ntube wamenya.

Muganga akimara kumbwira ko ntazakira natewe n’umubabaro mwinshi nkajya ndira nkibutsa Yesu uburyo nabaye imfubyi none uratinyutse abana banjye nab o ubagize imfubyi. Muri iyo minsi Imana yantumyeho umukecuru uvuye i Nyagatare araza armbwira ati: “Imana irambwiye ngo igukijije umugongo, humura amagambo wayibwiye yarayumvise abana bawe ntibabaye imfubyi uzabasubiramo ubarere”.

Muri iyo minsi Imana yankoreye igitangaza mbona transfer njya kwivuza mu buhinde mu bitaro byitwa APOLO HOSPITAL,ariho bamfotoreye amafoto muzabona ndembye. Nkimara kugerayo satani yangabagaho ibitero akanyereka napfuye, akajya ku mugabo wanjye nawe akarota murugo habaye ubukwe ari njye mugeni, icyo gihe umutware yafashe igihe cyo gusenga Imana imubwira ko izangarura mu Rwanda ndi muzima kandi yarabikoze. Baramvuye rero sinatinzeyo kuko nahamaze iminsi 40 nagiye ngendera mu kagare ngaruka ngenda n’amaguru.

Kugeza ubu Charlotte Imana yamusubije umubiri muzima

Asoza ubuhamya bwe Murorunkwere Charlotte arashima Imana yamusubije ubuzima bikomeye aho abaganga n’abandi bose babonaga atazakira ariko aho rukomeye niho Uwiteka aseruka. Arashima Imana ko ubu umugongo we ukora, akagenda n’amaguru bikemeera yewe n’imirimo yose y’urugo akaba abasha kuyikora. Aboneraho kandi kubwira abafite uburwayi bubaremereye ndetse batakaje icyizere cyo kubaho ko bakwiye kwegurira Kristo ubuzima bwabo akaba ari we ubuyobora kuko ni we ushobora ibyananiranye.

Source:agakiza tv

[email protected]

Ibitekerezo (0)

Tanga igitekerezo

Amategeko n'amabwiriza arakurikizwa

Haba hari icyemezo ufashe nyuma y'ubu butumwa ?