Ubuhamya:Angelique wamaze imyaka 9 ategereje(...)

Kwamamaza

agakiza

Ubuhamya:Angelique wamaze imyaka 9 ategereje urubyaro,ubu arahetse


Yanditswe na: Ubwanditsi     2020-12-18 08:18:25


Ubuhamya:Angelique wamaze imyaka 9 ategereje urubyaro,ubu arahetse

Angelique utuye i Bugesera nyuma yo gushyingirwa yahuye n’igishakwe cyo kubura urubyaro, biza kumuviramo gutabwa n’umugabo ajya kwibanira n’umukobwa wari incuti ya Angelique amubeshya ko atwite inda ye ariko kuko ikinyoma kidahishwa, byagaragaye ko uwo mukobwa adatwite bituma aumugabo yiyemeza kugaruka mu rugo akihagera umugore awe ahita asama kuko yari yicaranye isezerano ko Imana izamuha urubyaro kandi yarabisohoje.

Bakimara gusezerana Angelique n’umugabo bumvaga bazahita babyara kuburyo wasangaga baganira, umugabo yifuza ko bazabanza kubyara umuhungu naho umugore yishakiraga kubanza umukobwa ariko babaye mu kibazo cyo kubura urubyaro.

Mu magambo ye, Angelique arabisobanura neza ati:"Tukimara kubana twategereje urubyaro umwaka n’igice ushize dutangira urugendo rwo kwivuza, twivurije ku Gisenyi duhura n’abaganga bakomeye ariko batubwira ko ibisubizo by’ibizamini byacu bigaragaza ko turi bazima nta n’umwe ufite ikibazo, batubwira gutaha tugategereza urubyaro. Twarategeereje imyaka 3 ishize twibwira ko ku Gisenyi twakoreye ubukwe hashobora kuba hari ikibazo nuko dufata icyemezo twimukira i Bugesera.

Tugeze i Bugesera twamaze umwaka dutegereje na bwo biranga, dutangira gutekereza ko abaganga badusuzumye mbere batarebye neza, dutangira kwivuza i Kigali ariko aho tugeze hose bakatubwira ngo tugende turi bazima. Ariko hagati aho amagambo y’abantu yabaga ari menshi bamwe bavuga ngo ndya iby’iki, banyita ingumba n’ibindi byinshi byanteraga umubabaro udashira.

Twakomeje gutegereza imyaka ibaye 8 nari ndi mu masengesho y’iminsi 7 ku rusengero, umukozi w’Imana yarampamagaye njya ku ruhimbi ndapfukama ampanurira ko Imana impojeje amarira, impaye urubyaro ndetse inyubakiye urugo. Impamvu mbabwira ko imvugo y’Imana ihambaye, nkimara kubwirwa ubwo buhanuzi uwo munsi naratashye ngeze mu rugo umugabo wanjye ambwira ko ananiwe gutegereza agiye gushaka umwana. Yahise ajya kubana ku gisenyi n’umukobwa wari incuti yanjye magara, wumve ukuntu satani agutera ahereye ku ncuti za bugufi, ya marira Imana yambwiye ko Impojeje ahubwo nibwo nayarize".

Burya nta jambo Imana ivuga ngo rihere, irarikurikirana kugeza risohoye, ariko kandi imvugo y’Imana isaba uyibwiwe gushishoza, kwihangana no kwizera nk’uko uyu mubyeyi abisobanura agira ati:

"Umugabo wanjye amaze kujya kubana n’uwo mukobwa, yamubeshye ko atwite inda ye, akajya asaba icyo ashaka cyose akakibona. Iyo igihe cyo kujya gupimisha inda kwa muganga cyageraga umukobwa yasabaga umugore utwite inkari akaba ari zo atanga igisubizo kikaza cyerekana ko atwite".

Igihe cyarageze abantu bakajya babwira umugabo wa Angelique ko uwo mukobwa babana amubeshya adatwite, umugababo akabahakanya avuga ko ari ukubateranya. Umugabo yaje gushyira ubwenge ku gihe abwira uwo mukobwa ati:"Abantu bambwira ko udatwite, none ngwino tujyane kwa muganga ikizamini bagusaba uragifata turi kumwe hanyuma ukimpe ngishyire muganga". Umukobwa akimara kubyumva yahinze umushyitsi apfukama imbere y’umugabo amusaba imbabazi ati:"Mbabarira nakubeshye ko ntwite nyamara sinigeze nsama, none ngirira imbabazi".

Umugabo akimara kumenya ko umugore yamubeshye yahise afata umwanzuro wo gusubira iwe agafatanya n’umugore we gutegereza umwana.

Angelique aragira ati "Hari kuwa kane nka saa tanu z’amanywa mbona umugabo araje arambwira ati:"Umva rero mugore wanjye! Ndaje ngo dufatanye gutegereza umwana kuko nsanze ibyo nabagamo nta mumaro reka dufatanye dusenge.

Twabaye aho hashize igihe gito narasamye mbanza gushidikanya nkeka ko ari ibibyimba byaje mu nda, ariko ngiye kwa muganga bambwira ko nasamye. Igihe cyarageze mbyara umwana w’umukobwa tumwita Uwishimwe Shamiryase Radika"

Asoza ubuhamya bwe uyu mubyeyi arashima Imana ko yasohoje ibyo yamusezeranyije ikamuha umwana w’umukobwa. Aboneye ho kandi gukomeza abari bacitse intege kubera kubura urubyaro, ababwira ko mu ijuru hari Imana ishobora byose bityo bategereze bihanganye Imana izabikora.

Source:agakizatv
Reba Video yose:

[email protected]

Ibitekerezo (0)

Tanga igitekerezo

Amategeko n'amabwiriza arakurikizwa

Haba hari icyemezo ufashe nyuma y'ubu butumwa ?