Twibukiranye iby’intwari Samusoni wicaga(...)

Kwamamaza

agakiza

Twibukiranye iby’intwari Samusoni wicaga intare akoresheje intoki


Yanditswe na: Ubwanditsi     2021-06-24 07:17:17


Twibukiranye iby’intwari Samusoni wicaga intare akoresheje intoki

Ku isi hagiye habaho abantu batandukanye bagiye bafatwa nk’ibihangange abandi nk’intawari. Ariko umugabo witwa Samusoni uvugwa muri Bibiliya Yera mu isezerano rya kera we arihariye kubera imbaraga zidasanzwe yari afite zari zihishe mu musatsi we, aricyo cyatumye tubasangiza amwe mu mateka y’uyu mugabo washwanyaguzaga intare nk’ubusa.

Uyu mugabo warushaga abandi bose imbaraga, ni umucamanza witwaga Samusoni. Imana niyo yamuhaga izi mbaraga zidasanzwe yari afite. Mbere y’uko avuka, Imana yari yarabwiye nyina ati ‘Ugiye kubyara umwana w’umuhungu. Ni we uzafata iya mbere mu kuvana Abisirayeli mu maboko y’Abafilisitiya.’

Abafilisitiya bari abantu babi babaga mu gihugu cya Kanani. Bari bafite ingabo nyinshi, kandi bagiriraga nabi cyane Abisirayeli. Umunsi umwe, igihe Samusoni yari agiye aho Abafilisitiya babaga, yahuye n’intare nini yaje yivuga imusatira. Ariko Samusoni yarayishe, ayicishije amaboko ye gusa. Si iyi ntare yishe gusa kuko yishe n’Abafilisitiya babi babarirwa mu magana.

Nyuma y’aho, Samusoni yaje kubenguka umugore witwaga Delila. Nuko abatware b’Abafilisitiya basezeranya Delila ko buri wese muri bo azamuha ibiceri by’ifeza 1.100 mu gihe azaba abafashije kumenya ibanga ry’aho Samusoni akura imbaraga. Delila yashakaga kubona ayo mafaranga yose. Mu by’ukuri, ntiyakundaga Samusoni cyangwa ubwoko bw’Imana. Ni cyo cyatumye atitiriza Samusoni buri gihe amubaza igituma agira imbaraga nyinshi cyane n’aho azikura.

Amaherezo, Delila yashoboye Samusoni maze amumenera ibanga ku birebana n’imbaraga ze. Yaramubwiye ati “umusatsi wanjye ntiwigeze wogoshwa na rimwe kuva navuka, Imana yantoreye kuba umugaragu wayo wihariye witwa Umunaziri. Ndamutse nogoshwe, imbaraga zanjye zanshiramo”.

Delila amaze kumenya ibyo, yabikiriye Samusoni, amusinzirira ku bibero. Hanyuma, yatumije umuntu maze aramwogosha. Igihe Samusoni yakangukaga, yasanze atagifite za mbaraga. Nuko Abafilisitiya baraza baramufata, bamunogoramo amaso maze bamugira umugaragu wabo.

Delila yakoresheje uburyo bwose amenesha ibanga Samusoni
Umunsi umwe, Abafilisitiya bakoze ibirori bikomeye byo gusenga (ikigirwamana) imana yabo Dagoni, maze bavana Samusoni mu nzu y’imbohe kugira ngo bamukwene. Ariko umusatsi we wari warongeye kumera. Nuko Samusoni abwira umuhungu wari umurandase ati “reka mfate ku nkingi ziteze iyi nzu”. Hanyuma, Samusoni yasenze Imana imusubiza imbaraga, maze afata za nkingi. Nuko atera hejuru ati “mfane n’Abafilisitiya”.

Muri uwo munsi mukuru hari Abafilisitiya bagera ku bihumbi 3.000 bose batikiriye mu nzu barimo nyuma yuko Samusoni ahiritse za nkingi zayo yari yafasheho nawe agapfana nabo atyo.

Umunsi wa nyuma wo kubaho kwa Samusoni yishe abafirisitiya basaga 3.000,

Birashoboka ko ushobora kwibaza uti ese iyi nkuru yanyigisha iki, iyi nkuru ikwigishe kugira ibanga cyane cyane iryo wagiranye n’Imana yawe mu gihe ugitegereje kugera ku cyo yakugambiriyeho, ndetse wirinda gushukwa n’uwo ari we wese. Inkuru za Samusoni kandu ushobora kuzisoma muri Bibiliya Yera mu gitabo cy’Abacamanza uhereye ku gice cyaho cya 13 ugakomeza n’ibice by’icyo gitabo bikurikiraho. Source: www.nkundagosple.rw

Dore isomo wakura ku mubano wa Delila na Samusoni

Gukurura, guhindura intekerezo, umugore wagushije umuntu w’Imana,…: Aya ni yo mazina twakoresha dusobanura umugore witwa Delila. Delila agaragara muri bibiliya agahe gato, ariko inkuru ye iraduha amasomo y’ingenzi twakurikiza mu buzima bwacu bwa buri munsi, n’uko dukwiye kwitwara imbere y’Imana n’abantu.

Mu gitabo cy’ Abacamanza 16, haduha inkuru ya Delila. Ni umugore Samusoni yabengutse ariko niwe watumye ubuzima bwe bugira iherezo.

Hanyuma y’ibyo, abenguka umugore wo mu gikombe cya Soreka witwaga Delila.(Abacamanza16 :4)

Samusoni umuntu w’Imana wamenyekanye kubera imbaraga zidasanzwe yari afite, agaragara agushwa n’umugore waturukaga mu kibaya cyasinze inzoga. Bibiliya ntiduha ubusobanuro burambuye ku bwiza bwe, ariko icyo tuzi ni uko Samusoni yamurabutswe kandi akaba ari we gikoresho cyatumye agwa ndetse akabura ubuzima bwe.

Ni iki dukwiye kumwigiraho? Ibi ni bimwe twakwifashisha kugira ngo tubashe kugenda nk’uko Imana ishaka:

Genzura amarangamutima yawe

Abacamanza16:4-22 hatubwirako Samusoni yari ufite imbaraga zidasanzwe kuko nta muntu n’umwe wabashaga kumunesha, ariko ntiyagize ubuhanga mu gufata icyemezo ubwo yameneraga ibanga Delila, ry’aho akura imbaraga ze. Yabaye umupfu akunda umugore ariko we intego ye yari iyo kumugusha, kugira ngo yibonere amafaranga.

“Abatware b’Abafilisitiya basanga uwo mugore baramubwira bati « Umuhende ubwenge, umenye aho imbaraga ze nyinshi ziva, tumenye uburyo twamushobora tukamuboha tukamucogoza. Umuntu wese muri twe azaguha ibice by’ifeza igihumbi n’ijana.”(Abacamanza16:5)

Mu mirongo ikurikiye dusoma uburyo Delila yagerageje guhindura intekerezo za Samusoni kugira ngo amubwire ibanga ry’aho akura imbaraga Imana yamuhaye. N’ubwo Samusoni yagerageje kumubeshayabeshya aho akura imbaraga, umugore we yakomeje kumuhata nk’uwenda gupfa, Samusoni amubwira ibyari mu mutima we byose, amubwira aho imbaraga ze azikomora.(Abacamanza16:16)

Samusoni amaze kumena ibanga, Imana yaramuretse, Abafilisitiya baramufata ndetse aza no gupfa azize kutirinda no kumenya umuntu bari kumwe uwo ari we, ko icyo yari agamije ari ugushyira ubuzima bwe mu kaga. Ntukemerere ibyiyumvo byawe cyangwa uko wiyumva ngo bigukoreshe iby’ubupfu, kuko bishobora no gutuma utakaza ubuzima.

Gendera kure ikintu cyose cyagutera ibibazo cyane cyane icyatuma ugwa mu busambanyi.

Samusoni yari umunyembaraga, ariko ntiyari umunyabwenge. Ntiyigeze ahunga Delila igihe yari agifite amahirwe, ahubwo yakuruwe n’irari ry’ubusambanyi kandi aguma yizeye ko igihe cyose ashobora kurwanya umwanzi wamutera. Byongeye kandi, Samusoni ntiyagiraga amakenga cyangwa ngo agire icyo yitaho mu byo yakoraga . Ntiyatekereje ko Delila agambiriye ibibi kuri we. Ntiyigeze agira aho agarukira bityo bimukururira ingorane mu buzima bwe.

Mu gitabo cy’imigani 7:21-23 hatugaragariza ibyamubayeho, ndetse bikanatuburira. Hagira hati:

“Nuko amushukiha akarimi ke kareshya, amukuruza kuryarya k’ururimi rwe. Ahera ko aramukurikira nk’ikimasa kigiye kubagwa, cyangwa nk’umusazi uboshywe ajya guhanwa. Kugeza ubwo umwambi uhinguranya umwijima we, ameze nk’inyoni yihutira kugwa mu mutego, itazi ko yategewe ubugingo bwayo.”( Imigani 7:21-23)

Ntukemere ko umuntu wese aguhindura igikoresho

Delila yakoresheje intwaro yo kureshyareshya mu kwigarurira Samusoni, kugira ngo amubwire ibanga rye. Ibi bikaba ari byo byatumye agwa, Imana iramureka

Dukwiye kwitonda mu kugirana ibiganiro n’abantu bashobora kuduhindura cyangwa bakaba batuyobora uko bashaka. Ibanga ryacu cyangwa ikindi kibazo cyacu cyihariye twababwiye gishobora gukoreshwa mu gutuma baduhindurira intekerezo, bakatuyobora uko bashaka.

Dukwiye kwiga kubaha icyo Yesu yavuze .Yagize ati:

“Ibyejejwe by’Imana ntimukabihe imbwa, kandi n’imaragarita zanyu ntimukazite imbere y’ingurube, kugira ngo zitaziribata maze zikabahindukirana zikabarya.( Matayo7:6)

Imana idushoboze kwirinda gukora iby’ubupfu, ahubwo iteka tuyoborwe n’Imana mu byo dukora byose.

Izindi nkuru wsoma zerekeye ibya Samusoni:

https://www.agakiza.org/Iyo-nza-kumvira-ababyeyi.html

https://www.agakiza.org/Kumenera-umugore-ibanga-byatumye-amaso-ye-areba-isi-bwa-nyuma.html

https://www.agakiza.org/Iyo-wahawe-amahirwe-ya-kabiri-ugasubizwa-mu-kibuga-utsinda-ibitego-birenze-ibya.html

[email protected]

Ibitekerezo (0)

Tanga igitekerezo

Amategeko n'amabwiriza arakurikizwa

Haba hari icyemezo ufashe nyuma y'ubu butumwa ?