Sobanukirwa ibintu 7 bibuza amahoro yo mu(...)

Kwamamaza

agakiza

Sobanukirwa ibintu 7 bibuza amahoro yo mu mutima


Yanditswe na: Ubwanditsi     2020-12-04 04:28:45


Sobanukirwa ibintu 7 bibuza amahoro yo mu mutima

Amahoro ni ikintu nkenerwa mu buzima bwa buri munsi, kandi umutima wuzuye amaganya utakaza amahoro yawo. Hano mu isi hari byinshi bibuza abantu amahoro yo mu mutima harimo icyaha n’ibindi. Kugira ngo umuntu abone amahoro avuye ku Mana bisaba ko aba ayumvira. Mu ijuru icyubahiro kibe icy’Imana, no mu isi amahoro abe mu bo yishimira (Luka 2:14).

Dore ibintu birindwi bibuza umuntu amahoro yo mu mutima:

1. Icyaha

Burya umutima w’umuntu nturya ruswa kandi icyo umuntu yaba cyo cyose ntikibasha gukuraho icyaha ahubwo gikurwaho n’amaraso ya Yesu. Iyo udateye intambwe ngo wihane icyaha, ntigishobora gukurwaho n’uko umaze igihe kinini mu rusengero.

Hai urugero rw’umugabo wasambanye hanyumam yimuka aho yari atuye ajya gutura mu mugi agezeyo aracuruza arahirwa. Nyuma y’imyaka 10 Imana yaramubwiye ngo atahe iwabo, ahageze ijwi ryaramubwiye ngo yitegereze ibuye rinini yahasize arebe ko hari akantu kavuyeho, umugabo avuga ko ritahindutse. Imana yaramusubije iti"Ni ko n’icyaha cy’ubusambanyi wakoze gihora imbere yanjye". Ibi bisobanuye ko icyaha kitamarwa n’iminsi, ahubwo kimarwa n’amaraso ya Yesu.

2. Amaganya y’isi

Hano mu isi hari impande ebyiri uruhande ruhaze ruhora mu minsi mikuru n’ibirori ariko hari n’uruhande rwishwe n’amaganya y’isi aho usanga abantu bibaza aho bazakura amafaranga y’ishuri, icyo kugaburira abana, ubuzima buhenze kuri bo, usanga bene uyu muntu abuze amahoro yo mu mutima kuko yibaza uko bizagenda bikamuyobera. Bibiliya iravuga ngo ntimukiganyire mwibaza uko ejo muzamera ahubwo mureke byose bimenywe n’Imana.

3. Ibikomere

Ibikomere bijya bituma umuntu abura amahoro y’umutima aho usanga umuntu afite ibikenerwa byose ariko akabura amahoro yo mu mutima. Gukomereka ni ikintu kibi kandi kibasiye abantu benshi. Bamwe bakomerekejwe n’imiryango, ibidukikije n’umuryango mugari, ari yo mpamvu imibaare y’abantu biyahura cyangwa basara ikomeza kwiyongera buri munsi. Inkuru nziza ihari ni uko Yesu ataje gukiza ibyaha gusa, ahubwo yaje kuvura imvune zo mu mutima, turamutse tubimuzaniye uko byakabaye nta cyo dusize Yesu yabituruhura.

4. Ubwibone

Niba hari ikintu Imana yanga ni ukubaho wumva wihagije udakeneye Imana mu buzima bwawe. Imana umuntu ayikenera ari muto, ayikenera ashaje ni ukuvuga ko ikwiriye guhora ifata umwanya wa mbere mu mu mibereho ya muntu, kandi Bibiliya ivuga yeruye ko Imana irwanya abibone.

Hari ibintu biba mu buzima bwacu tukajya tubyitirira Satani, ariko mubyukuri atari Satani ahubwo ari uko Imana irwana na twe ishaka kubanza kwica inarijye. Iyo Imana yemeye ko usonza, iba igira ngo nuhaga uzagaburire abandi. Iyo Imana yemeye ko uvugwa, ni ukugira ngo wowe utazakora ikosa ryo kuvuga abandi, iyo Imana yemeye ko uca bugufi ni ukugira ngo nushyirwa hejuru uzibuke kuzamura abandi. Inarijye ni ikintu kibi kigomba guhura n’umusaraba akaba ari wo ucyica.

5. Ubuhenebere

Guhenebera ni ukuba warigeze kugira ibihe byiza byo gusabana n’Imana, hanyuma ubuntu bw’Imana bukagenda bukuvaho. Bibiliya iravuga ngo mwihane, muhindukire, ibihe byiza bibone uko biza.

6. Umujinya (Uburakari)

Mubyukuri kurakara ntabwo ari icyaha kuko ni ibisanzwe Imana na yo irarakara, ariko mwibuke Yesu yaravuze ngo umuntu narakara ntakarenze umunsi. Icyo dukwiye kumenya ni uko uburakari budasohoza ibyo gukiranuka, hanyuma tukitoza kubaho tutari imbata y’uburakari. Nitutiga kugenzura umujinya wacu mu buzima bwa buri munsi, dushobora kubura ubugingo buhoraho kandi twarakijijwe kuko iyo umuntu yarakaye amahoro aragenda.

7. Gukunda iby’isi

Mubyukuri ubugingo bw’umuntu ntibuva mu bwinshi bw’ibyo atunze kuko iyo biba bimeze bityo Yesu ntaba yaraciye umugani wa Razaro. Icyifuzo umukristo nyakuri akwiriye kugira ni ugukomera akuzura Umwuka Wera kugeza umwuka umushizemo. Ibyo mu isi bifatwa nk’inyongera kuko icyo abakristo bafite nyamara isi idafite ni Umwuka Wera, urukundo rw’Imana n’amahoro.

Muri macye Yesu yarapfuye ngo dukire icyaha cyo kwa Adamu naho ibindi ni inyongera. Dukwiye kubaho ku bw’inyungu z’ubwami bw’Imana ariko ntidukwiye kubaho kubw’inyungu zacu bwite.

Source: agakiza tv

[email protected]

Ibitekerezo (0)

Tanga igitekerezo

Amategeko n'amabwiriza arakurikizwa

Haba hari icyemezo ufashe nyuma y'ubu butumwa ?