Sobanukirwa akamaro k’inkeri

Inkeri ni imbuto ziryoha cyane kandi zoroshye kuribwa kuko zitagombera kuzitonora cyangwa kuzihata. Inkeri ni ingenzi mu mubiri kuko zongera ubudahangarwa bw’umubiri, zituma uruhu rugubwa neza, inkeri zifasha umwana uri mu nda gukura neza, zituma amenyo agubwa neza, ikindi inkeri zifasha abagabo kugira uburumbuke.

Inkeri umuntu ashobora kuzirya nk’imbuto cyangwa se zigatunganywa ku buryo bwabugenewe hakavamo umutobe, uko wazifata kose zigumana umwimerere wazo kandi zgakomeza kugirira umubiri akamaro.

Kurya neza, nirwo rukingo rwa mbere rushobora kuturinda indwara zitandukanye, Ni muri urwo rwego tugiye kurebera hamwe akamaro inkeri zifitiye imibiri yacu:

Inkeri zongera ubudahangarwa bw’umubiri: inkeri ziba ziganjemo vitamine C ifite umumaro ukomeye cyane mu kongera ubudahangarwa bw’umubiri. Umubiri w’umuntu ntushobora kwikorera ubudahangarwa ubwawo, ahubwo vitamine C iba igomba kuva mu biribwa, inkeri rero ni zimwe mu mbuto zongera ubudahangarwa bw’umubiri.

Inkeri zituma amaso abasha kureba neza: kurya nibura inkeri umunani ku munsi yagufasha cyane kugira amaso arangwa n’ubuzima buzira umuze, atarangwamo ibihu bikubuza kureba, inkeri kandi zirinda amaso kwangizwa n’imirasire y’izuba.

Inkeri zikesha uruhu: birashoboka ko abantu batanga amafaranga menshi bagura imiti ihenze yo gusiga ku ruhu kugirango rube rwiza, nyamara kurya inkeri buri munsi ni umuti watuma uruhu rwawe ruvugururwa rukaba rwiza kurushaho.

Inkeri zigabanya umuvuduko w’amaraso: ubushakashatsi bwagaragaje ko kurya inkeri kenshi bifasha imitsi itwara amaraso gukora neza bitewe na antioxidant iba mu nkeri, umuntu uzirya akensh ntakunze kugira umuvuduko w’amaraso ukabije.

Byongeye kandi inkeri zikungahaye ku munyungugu wa potasiyumu nawo ushobora gushyira kuri gahunda amaraso bityo bikarinda kuba umuntu yafatwa n’indwara y’umutima.

Inkeri zifitiye akamaro umwana uri mu nda: mu gihe cyo gutwita wumva abantu bakubwira ngo ibiribwa ibi n’ibi si byiza ku birya ariko inkeri ni zimwwe mu mbuto umubiri w’umubyeyi ukenera kuko zibamo folic acid ifite umumaro ukomeye wo kuerema ingingo z’umwana uri mu nda. Acide folic kandi wayisanga muri epinari, ibinyampeke ndetse n’amagi.

Inkeri zirinda amenyo wangirika: n’ubwo inkeri zikungahaye ku isukari, amakuru dukesha eatingwell.com atubwira ko inkeri zikungahaye kuri polyphenols zirwanya bagiteri zituma amenyo yangirika. Acide iba mu nkeri ishobora gutuma amenyo ahora yera.

Inkeri zongera uburumbuke ku bagabo: kurya inkeri ku bagabo bibafitiye umumaro ukomeye kuko zibamo vitamine C igira uruhare mu kongera ingano y’amasohoro (spermes), inkeri kandi zibamo antioxydants zituma umutima ukora neza kandi amaraso agatembera neza mu gihe cyo kubaka urugo.

Muri macye inkeri zifite umumaro ntagereranywa ku bantu bose muri usange niyo mpamvu mu gihe bishoboka kuzibona, ni ngombwa kuzirya kenshi gashoboka kuko ziturinda zimwe mu ndwara zituzengereza nyamara kandi kwirinda biruta kwivuza.

Source: www.activebeat.com