Samu Rwibasira yakumbuje ijuru abakunzi(...)

Kwamamaza

agakiza

Samu Rwibasira yakumbuje ijuru abakunzi b’umusaraba mu ndirimbo ye ‘ Amatsiko’ ( Video)


Yanditswe na: Ubwanditsi     2020-10-28 07:01:21


Samu Rwibasira yakumbuje ijuru abakunzi b’umusaraba mu ndirimbo ye ‘ Amatsiko’ ( Video)

Umuramyi, umucuranzi, umuhanzi akaba n’umuririmbyi wabyize mu ishuri, Rwibasira Samu ni umukristo ubarizwa mu itorero Betesida. Nkuko bigaragara ku rubuga rwe rwa YouTube yitiriye amazina ye ‘Samu Rwibasira’ indirimbo ‘Amatsiko yakiriwe neza n’abatari bake mu bakunzi b’indirimbo zaririmbiwe Imana, aho abarenga ijana bamaze kugaragaza ko banyuzwe n’ubutumwa buyikubiyemo(Comments).

Ni indirimbo ije isanga izindi Rwibasira yamenyekanyemo nka ‘Witinya’, ‘ Naramubonye’, n’izindi zitandukanye zirimo n’izo yagiye asubiramo(Cover).

Amatsiko ifite uburebure bw’iminota ine n’amasegonda atanu. “ Nkugiriyeho umugisha wo kumva ijwi ryawe ry’ihumure rinkumbuza ururembo Siyoni, wateguriye intore zawe turi muri iyi nzira irimo ishuheri n’ibitero by’umwanzi,” ni amwe mu magambo agize iyi ndirimbo.

Mu kiganiro na Agakiza.org, Samu rwibasira yavuze ko iyi ndirimbo yayanditse biturutse ku miruho yo mu isi abizera bahoramo umunsi ku munsi , icyakora akabibutsa ko uru rugendo ruzagira iherezo, Ati” Ni indirimbo nanditse ntekereje imiruho n’ibyo twirirwa twirukamo biturushya muri iyi si, ariko bizarangira. Bizarangira tujye mu gitaramo kitazarangira aho tuzaririmba, tugacuranga uburyo butarangira. Imitima yacu ikumbura kuba aho hantu mu ijuru. Indirimbo iravuga ibyiza by’ijuru, iravuga umunezero uzaba uri mu ijuru.”

Nshimiyimana Israel, ni umwe mu bakiriye n’amarangamutima menshi ubutumwa bugize iyi ndirimbo , avuga ko yakozwe ku mutima cyane n’amagambo ayigize ati” Ndumva nenda kurira kubw’iyi ndirimbo! Sam, Sam, habwa umugisha kubw’aya magambo wakoresheje muri iyi ndirimbo.”

Naho Umugiraneza Innocent we yavuze ngo“ Mwenedata Sam, humura Imana twizeye twayibikije ubugingo bwacu, ubundi twiyemeza gukora neza. Izadukomeza umutima inadufate ukuboko kugeza dutashye. Kandi kuri twe ibi ntabwo ari ubwamamare cyangwa ugushaka ubutunzi, ahubwo ni kubw’icyubahiro cy’Imana.”

Uyu mukunzi we kandi yanamwifurije gukomera ku murimo biciye mu ijambo ry’Imana riboneka mu rwandi ko 1 Petero 4:19 , hagira hati “ Nuko rero, abababazwa nk’uko Imana ibishaka, nibabitse uwo Muremyi wo kwizerwa ubugingo bwabo, bagumye bakore neza.”

Samu yatangiye kuririmba kera kuko ari ibintu yavukiyemo nkuko abitangaza. Ibi nibyo byatumye abyinjiramo neza nk’umuhamagaro nyuma yo kumara imyaka itatu ku ntebe y’ishuri abyigira muri ’Ecole d’Art de Nyundo’. Yishimira ko kugeza ubu hari intambwe ishimishije amaze gutera ugereranyije n’aho yatangiriye, ibintu ashimira Imana cyane kuko atatekerezaga ko yaba ageze aho ari uyu munsi.

Mu bikorwa byagutse uyu muhanzi ategura muri iki gihe, harimo gukomeza gutanga umusanzu wo gutoza no guhugura abaririmbyi babyifuza, haba mu buryo bw’imiririmbire cyangwa n’imicurangira. Arateganya kandi gushyira hanze ibindi bihangano.

Reba ’Amatsiko’ ya Rwibasira Sam

[email protected]

Ibitekerezo (0)

Tanga igitekerezo

Amategeko n'amabwiriza arakurikizwa

Haba hari icyemezo ufashe nyuma y'ubu butumwa ?