Patient Bizimana ​yerekanywe mu rusengero(...)

Kwamamaza

agakiza

Patient Bizimana ​yerekanywe mu rusengero n’umukunzi we bitegura kurushinga


Yanditswe na: Ubwanditsi     2021-06-21 10:35:31


Patient Bizimana ​yerekanywe mu rusengero n’umukunzi we bitegura kurushinga

Tariki ya 21 Kamena 2021 yinjiye mu mateka y’ubuzima bw’umuhanzi Patient Bizimana na Karamira Uwera Gentille bitegura kurwubaka nk’umugabo n’umugore.

Kuri uyu munsi ni bwo aba bombi berekanwe bwa mbere mu rusengero rwa Evangelical Restoration Church (ERC) Masoro, Patient asanzwe ateraniramo.

Intambwe yo kwerekanwa kw’abasore n’inkumi bitegura kurushinga iri mu z’ibanze zibanziriza umuhango wo gusezeranira imbere y’itorero. Ikiba kigamijwe ni ugushimangira ko abagiye kurushinga ari indakemwa mu mico n’imyifatire kandi abanyetorero bakabitangamo ubuhamya.

Mu materaniro yo ku Cyumweru ni bwo Patient Bizimana na Uwera Gentille bamaze igihe bari mu rukundo berekanwe imbere y’abakirisito ba ERC Masoro.

Ni igikorwa cyabaye hifashishijwe ikoranabuhanga mu kwirinda ikwirakwira rya Coronavirus. Hahamagarwaga couple imwe ku yindi hanyuma hakerekanwa ifoto yabo.

Muri couples zaranzwe zizakora ubukwe uyu mwaka harimo n’iya Patient Bizimana na Uwera Gentille usanzwe atuye muri Leta ya Tennessee muri Amerika.

Ubwo Pasiteri Kamanzi Marcellin yahamagaraga amazina yabo byahinduye isura, humvikanye amajwi arenga aherekejwe n’umuziki wumvikanagamo indirimbo ya Patient Bizimana yitwa “Menye Neza”.

Ni ikimenyetso gisa n’icyerekanaga ko bishimiye kubona umukunzi w’uyu muhanzi uri mu bakunzwe cyane mu muziki uhimbaza Imana w’u Rwanda.

Nubwo nta tariki iratangazwa y’igihe Patient Bizimana azarongorera, kuba ari mu rutonde rw’abaranzwe ni icyerekana ko uyu mwaka uzasiga atakiri mu busiribateri.

Patient Bizimana yamaze kuba umugabo byemewe n’amategeko kuko yasezeranye na Uwera muri Kamena 2019 mu Karere ka Rubavu. Ni umuhango wabaye mu bwiru bukomeye, uhezwamo itangazamakuru ndetse no kubona ifoto byabaye ingume.

Patient Bizimana ni umuramyi umaze gushinga imizi mu ndirimbo zo kuramya no guhimbaza Imana.

Umuziki yawutangiye akiri muto, akiyumvamo impano yatangiye kwihatira kwiga gucuranga piano mu rusengero hanyuma bigeze mu 2007 asohora indirimbo ye bwite yitwa ‘Andyohera’ ari nabwo benshi batangiye kumubwira ko afite ijwi ryiza.

Yakunzwe bidasanzwe mu ndirimbo ze nka ‘Iyo neza’, ‘Amagambo yanjye’, ‘Menye neza’, ‘Ikimenyetso’, ‘Ubwo buntu, ‘Ndaje’ n’izindi nyinshi

Azwiho gutegura ibitaramo ngarukamwaka bya ‘Easter Celebration’ byitabirwa ku rwego rwo hejuru n’ibihumbi by’abakunda umuziki we. Yabiteguye ahereye ku byo yitaga ‘Poetic Evening of worship’ nyuma bibyara Easter Celebration iba buri mwaka mu kwizihiza Pasika.

Reba ku 1h55’10’’ ubwo Patient Bizimana n’umukunzi we bahamagarwaga

Source: Igihe.com

[email protected]

Ibitekerezo (0)

Tanga igitekerezo

Amategeko n'amabwiriza arakurikizwa

Haba hari icyemezo ufashe nyuma y'ubu butumwa ?