Nutamenya ibyanditswe byera ngo ubyitondere,(...)

Kwamamaza

agakiza

Nutamenya ibyanditswe byera ngo ubyitondere, ubuhanuzi n’amasezerano bizagupfira ubusa!


Yanditswe na: Ubwanditsi     2021-09-01 02:28:38


Nutamenya ibyanditswe byera ngo ubyitondere, ubuhanuzi n’amasezerano bizagupfira ubusa!

“Ibyanditswe byera byose byahumetswe n’Imana kandi bigira umumaro wo kwigisha umuntu, no kumwemeza ibyaha bye no kumutunganya, no kumuhanira gukiranuka.”2 Tim 3:16

Mu buzima tubayemo tujya dukenera ubuhanuzi kuko buduhesha amasezerano y’ibizaba ndetse bikanatwereka gahunda igezweho ku mana. Ariko n’ubwo bimeze bityo uramenye ntuzakore ikosa benshi bakoze ryo gusimbuza ibyanditswe ubuhanuzi, kuko bigira imimaro itandukanye n’ubwo byuzuzanya.

Abantu benshi rero usanga bazi amasezerano Imana yagiye ibahera ahantu hatandukanye (Mu nsengero, mu mashyamba, mu mazi, mu buvumo, ku misozi, etc…). Ariko ugasanga ijambo bigishijwe bataryibuka habe na mba, imitwe ya benshi yuzuye amasezerano ariko ibyanditswe byera wapi!

Ijambo ry’Imana ritubwiye ko ibyanditswe byera bigira umumaro:

1. Wo kwigisha umuntu: Amasezerano akenshi aba akubiyemo amakuru avuga ku mugambi w’Imana ariko ibyanditswe nibyo bikwigisha uko uzawubamo, Nubijya kure na bya byiza Imana yavuze ntuzabasha kubibyaza umusaruro kuko utazi uko bikoreshwa.

Nabigereranya no kujya gusura ahantu nyaburanga ukanga ko abakozi bagusobanurira uko uri bwitware n’igikenewe ngo uze kuhakura ubumenyi bwose, wishingikirije ko woherejwe na boss wabo. Nibutse audio imwe numvise ya president avuga uburyo basuye ingagi noneho imwe muri zo ikikanga abatembereza abantu bakabasaba guca bugufi bose bakicara. Ati"N’’ubwo ndi President wa Repuburika naricaye rwose!"

Yakomeje Yigisha abantu guca bugufi ariko biragaragara ko iyi nama bayimenye kubwo kumvira amabwiriza yashyizweho. Ibyanditswe byera bibamo amabwiriza yashyizweho abasha guhesha abera kwitwara neza mu migisha yose y’Imana (ibibazo n’ibisubizo duhura nabyo)

Nawe niwanga kwikomeza ku byanditswe uzaba utaye umwigisha wo kukwereka ibyo ukwiye kwitondera mu rugendo rwawe n’ubwo waba waravuganye n’Imana, kuko burya imvugo y’Imana ntikuraho amahame yayo.

Ishobora kukubwira ko izakugirira neza waba utaregereye ijambo ryayo ngo rikwigishe gutanga, ugapfusha ubusa ineza yayo. Ishobora kukubwira ko izakuzamura waba utabana n’ijambo ryayo ngo rikwigishe guca bugufi, ukibona ikumanura nk’uko yasezeranije.

Iyo ubana n’ibyanditswe nk’uko Pawulo abitubwiye, ntabwo utindana ibyaha muri wowe cyangwa ngo utinde mu nzira zabyo kuko wamenye ibyanditswe.

2. Bikwemeza ko watandukiriye inzira (byemeza abantu ibyaha): Ukagaruka ukihana, ubusabane bwawe n’Imana bugakomeza kubwo kwemera guhanirwa nabyo (ibyanditswe nyera) gukiranuka. Ijambo ry’Imana rigenda rigutunganya wibereye mu modoka yawe cyangwa mu kazi kawe kubwo kuritekerezaho, bigatuma udatandukira inzira z’Imana muri wowe.

Nurijya kure rero uzaba ubaye nk’umwana utaye umubyeyi we agikeneye kurerwa kandi ntirisimburwa mu buzima bw’uwo ryabyaye. Bene data, Ijambo ry’Imana ntirisimburwa mu buzima bw’umukristo kuko icyo urisimbuje kikubera ikishi ubwacyo.

Yosuwa yasabwe kujya aritekerezaho, umwanditsi wa Zaburi nawe avuga ko hahirwa uwibwira amategeko y’Imana ku manywa na n’ijoro. Burya iyo utajya uritekerezaho (meditation) uba ugabanya umurimo waryo muri wowe.

Iyo usomye isezerano rya kera ubona Abisirayeli Imana ibaha amasezerano batarinjira muri Kanani, yababwiye ibyo bazakora bakabona umugisha (kumvira), inabababwira ko kutumvira bizabahesha umuvumo mu gihugu cyabo. Nyuma y’igihe bavuye mu nzira zayo, Imana yohereza abahanuzi bo kubaburira ariko kuko batibukaga ibyo Imana yavuze, barabarwanya bivuye inyuma ahubwo bagashyigikira abahanuzi b’ibinyoma babahanuriraga ibyiza kandi barataye isoôko yabyo.

Abahanuzi nka Yeremiya barazaga bakababwira ibyo Imana igiye gukora bakabasaba kwihana, ariko bakanangira imitima kuko bari bafite abandi bahanuzi bababwira ukundi.

Bene da, Umwuka wera ntajya ahushana n’ijambo ryavuzwe n’Imana ahubwo aza kurishyigikira, niba uri umunyabyaha ntukeneye ubuhanuzi bukubwira ejo hawe kuko Imana yamaze kubivuga ko nta mahoro y’umunyabyaha. Niba uri umwibone nta bundi buhanuzi ukeneye byamaze gufatirwa umwanzuro ko abibone Imana ibacisha bugufi. Niba kandi ugendana n’Imana wiyoroheje n’ubwo abahanuzi batakubwira ko izakuzamura yo, ubwayo yamaze kubivuga. Niba wifatanya n’ababi ingeso zawe zizononekara.

Ibi tuvuze bishobora kudasohora uyu munsi ariko niyo maherezo kuko hariho umunsi Imana yateguye wo guhana abanyabyaha no guhemba abera. Kandi Pawulo yaravuze ngo: “Ibyaha by’abantu bamwe bigaragara hakiri kare, bikabakururira mu rubanza, naho iby’abandi bizagaragara hanyuma. 1Timoteyo 5:24

Soma ibyanditswe kandi ubyige hamwe no gusenga bizakubwira aho uhagaze, ubundi utegereze Imana mu gihe cyawe iguhe icyo yasezeranije. Ijambo ry’Imana ni ryo mwigisha uzagushoboza kubungabunga ibyo Imana yavuze n’ibyo izakubwira byose.

Ubutaha tuzarebera hamwe ubuhanuzi n’amasezerano byagupfira ubusa mu gihe utamenye, cyangwa ngo witondere ibyanditwe bwera. Imana itugirire neza!

Source: Cepuranyarugenge.org

[email protected]

Ibitekerezo (0)

Tanga igitekerezo

Amategeko n'amabwiriza arakurikizwa

Haba hari icyemezo ufashe nyuma y'ubu butumwa ?