Ni gute Imana yuje urukundo yakwemera ko abantu bajya i kuzimu?

Ntabwo dukwiye kwibaza niba ikuzimu habaho kuko Yesu abivuga inshuro nyinshi mu butumwa bwiza. (Matayo 23:33; Luka 12: 5; Matayo 16:18 ), Icyakora bishobora kugorana kwiyumvisha uburyo Imana yuje urukundo n’imbabazi ishobora kureka abantu bakajya ahantu havugwa "itanura ry’umuriro" ubuzima bwabo bwose. (Matayo 13:50)

Iyo bijyanye nuko abantu bashobora kujya ikuzimu, Ibyanditswe byera byerekana ko aribwo buryo bwa nyuma bw’Imana. Imana ntabwo ishaka ko hari n’umwe warimbuka ngo abure ubugingo buhoraho, ahubwo yishimira ko abantu bose bakwihana bagakizwa, bakazabona ubugingo buhoraho. " Ibyo ni byo byiza byemerwa imbere y’Imana Umukiza wacu, ishaka ko abantu bose bakizwa bakamenya ukuri" 1Timoteyo 2:3-4

Kwihana ni igikorwa cyo kwicuza icyaha umuntu yakoze bivuye ku mutima, afite intego yo kutazagisubiramo ukundi. Kwihana bijyana no gufata icyemezo cyo kuva mu bibi umuntu agakorera Imana. Kwihana ni kimwe mu bisabwa kugira ngo umuntu ahunge kuzajya ikuzimu 2 Petero 3: 9

Imana ntishaka ko umuntu uwo ari we wese yajya ikuzimu. Imana iha abantu bose amahirwe menshi yo kwihana no kwakira imbabazi. Ni kenshi Imana yegera abantu mu buryo butandukanye, ibasaba kwiyunga nayo. Ndetse yohereje Umwana wayo w’ikinege ku isi kugira ngo atwereke inzira, ibi byose kwari ukugira ngo tubone amahirwe yose ashoboka kugira ngo dukizwe. (Yohana 3:16)

Mu gihe cya Nowa “ububi bw’umuntu bwari bwinshi, kandi ibitekerezo by’umutima we byahoraga ari bibi cyane buri gihe,” nyamara Imana yarinze Nowa, kandi nyuma y’igihano cyo kurimbuka kwa abantu b’icyo gihe, Imana yagiriye imbabazi abantu n’ibifite ubuzima byose.

Itangiriro 6, Urugero rugaragaza kwihangana kw’Imana n’imbabazi zayo

Imana irakiranuka, ni umucamanza w’ukuri utabera.

“Imbere y’Uwiteka kuko agiye kuza, agiye kuza agacira abari mu isi imanza, Azacira abari mu isi imanza zitabera” Zaburi 96: 13

Imana irakiranuka, nta muntu n’umwe uzarimbuka atarigeze aburirwa. N’umuntu utarigeze amenya iby’Imana, ngo asobanukirwa iby’imbabazi zayo, azacirwa urubanza bigendanye n’umutima nama we uko wamwerekaga icyiza n’icyibi.

Intumwa Pawulo yandikiye Abaroma 2 :12, ko “Abakoze ibyaha bose batazi amategeko bazarimbuka badahowe amategeko , kandi abakoze ibyaha bose bazi amategeko bazacirwaho iteka ry’amategeko. Kuko abumva gusa amategeko atari bo bakiranuka ku Mana, ahubwo abayumvira nibo bazatsindishirizwa nayo”

Abantu bashobora gutekereza ko kuzahanirwa kujya ikuzimu, Imana ishobora kuba yarakabije cyane icyo gihano. Ariko nanone abantu bakwiye kumenya ububi bw’icyaha, kubera ko Imana itazihanganira ko icyaha kinjira mu bwami bwayo.

Ntabwo Imana ariyo izagira uruhare mukohereza abantu ikuzimu, kubera ko ikiranuka ireka hagakora amahitamo y’abantu.

Nkuko hariho inzira iganisha abantu mu ijuru, ninako hariho inzira iganisha abantu ikuzimu. Kuzajya mu ijuru cyangwa i kuzimu ni inzira umuntu ahitamo mbere, iyo umuntu anyuranya n’ubushake bw’Imana ntiyubahe amategeko yayo, aho yigenera kuzaba harumvikana.

Fata umwanya witerezeho uyu munsi

Aha ikintu cyambere dukwiye gutekereza ntabwo ari ugutinya ikuzimu mbere yo gutinya gukora icyaha, gutinya gucumura ku Mana. Yosefu yagaragaje gutinya Imana ntiyahemuka ati

"None nabasha nte gukora icyaha gikomeye gityo, ngacumura ku Mana?" Itangiriro 39:9

Buri gihe ukwiye kwibwira amagambo Yosefu yibajije, maze ukirinda gukora icyaha. Ubwo urugendo rwacu mu isi ruzarangira tuzabazwa imbere y’Imana ibyo twakoze byose , ibyo twakiranutsemo tuzabihemberwa ariko kandi n’ibyo twakiraniwemo tubihanirwe.

“Dore ndaza vuba nzanye ingororano kugira ngo ngororere umuntu wese ibikwiriye ibyo yakoze” Ibyahishuwe 22: 12

Abahisemo kugendera mu bushake bw’Imana , basobanukiwe kugira neza kwayo n’ibyiza ibagambiriyeho. Babayeho ubuzima bw’amahoro kandi bw’uje ibyishimo naho isi yagira imidugararo. Dukwiye kwisubiramo tugatekereza ku guhamagarwa kwacu, tukabera abantu bose impumuro nziza tukababwira inkuru z’agakiza k’Imana ko Yesu yatanze ikiguzi gikomeye kugira ngo abarinde kuzaba ahantu h’imibabaro iteka (ikuzimu). Twibuke ko twatumwe kuvuga ubutumwa bwiza mu si.

Umuntu wese mu ruhande rwe, akwiriye gufata igihe cyo kwigenzura akareba niba agihagaze mu nzira ikwiye Imana imwifuzamo. Iki ni igihe cyo gutekereza ku mumaro wacu ku Mana, cyane tunibuka ko hariho urubanza nyuma y’ubu buzima.

Source: ActiveChristianity.org

[email protected]