Nitudasenga nta mpinduka izaba, kandi(...)

Kwamamaza

agakiza

Nitudasenga nta mpinduka izaba, kandi ingaruka zo kudasenga zizatugeraho-Pst Desire Habyarimana


Yanditswe na: Ubwanditsi     2021-07-12 03:31:08


Nitudasenga nta mpinduka izaba, kandi ingaruka zo kudasenga zizatugeraho-Pst Desire Habyarimana

Nutagira umubababro wo mu mutima ngo usenge, nta mpinduka izaba. Umubare w’abapasiteri n’abayoboke babo wiyongera buri munsi ariko ibyaha bikiyongera buri munsi ntibigabanuke. Niba rero umubare w’abashumba, abapasiteri n’abayoboke wiyongera ibyaha ntibigabanuke hanze aha, birashoboka ko tutarimo turakora icyo twakagombye gukora. Gusa tuzagira umubare mwinshi w’abanyedini, ariko atari uw’abana b’Imana.

Eliya yabayeho mu gihe kimeze neza neza nk’iki turimo: Ahabu yarongoye Yezebeli umunyamahangakazi, amuzana muri Isiraheli azana n’Imana ze. Hahita hakwira ikinyoma muri Isiraheli yose kivuga ngo’ imana za Yezebeli, ni imana igendera ku mababa y’umuyaga, iyo uyirakaje mu kanwa kayo havamo umuriro, kandi iyo mana igusha imvura’. Kugeza ubwo abatambyi bo mu nzu y’Imana iyo bashakaga ko imvura igwa, basengaga imana zo kwa Yezebeli bashaka gutsinda intambara bagasenga Imana yo mu ijuru. Ako kavuyo ko kuba mu nzu y’ibigirwamana Eliya karamurakaza, nta Mana ivuganye nawe aravuga ngo aka kavuyo ndakarambiwe ngiye guhagarika imvura.

Ati” Imvura izongera kugwa ari uko mbivuze” Imana ihita ishyigikira igitekerezo atanze mu Bwami bw’Imana, Bibiliya iravuga ngo “Imana ihagarika imvura, ihagarika n’icyime’ arigendera Imana imutungira ku kagezi kitwa’Kereti’.

Iyo urebye ubona nta mpinduka ugereranyije n’ibyitwa ubutumwa bwiza abantu bakora: Indaya zirakiyongera buri munsi, utubari turavuka, nko mu Rwanda hari abantu bafatwa bashinjwa iterabwoba…, Ese mutekereza ko ibyabaye muri Kenya bitaba na hano, murashaka kuzasenga ari uko batangiye kwiturikirizaho ibisasu mu modoka? Iki nicyo gihe cyo gusenga. Kandi nitudasenga mumenye ko tuzabona ingaruka zo kudasenga, iyo udasenga uba urimo kubiba imbuto mbi.

Nagira ngo nkubwize ukuri, nutagira umubabaro wo mu mutima nta mpinduka izaba mu rugo iwawe! Nigeze kumva umudamu wavuze ikintu cyambabaje: Yaravuze ngo ‘Njyewe umugabo wanjye ntakijijwe, ariko ni umugwaneeeza! Ntambangamira’.

Umuntu mutazabana mu Bwami bw’Imana mu ijuru, mutazicarana ngo Imana ibagorororere uba wumva nta kintu bigutwaye? Ukwiye gusenga kugeza igihe impinduka izaba, mushobora gusangira igaburo ryera mugasangira ijambo ry’Imana, mugasengera ibyifuzo hamwe. Kuba ajya mu kabari atakubuza kuza guterana, uba wumva nta kintu bigutwaye? Uziko hari abamama bibutsa abana babo kwambara mini bakijijwe! ‘Ngo uyu munsi ko wambaye birebire habaye iki, hanyuma se ko watashye kare...?’

Urupfu rw’abana bacu turufitemo uruhare: Ahantu abana banjye bigaga, umwana yaje kwiga yambariye ku cyuma agitera undi mwana mu mutwe. Baramubaza ngo ibi bintu wabikuye he?’ aravuga ngo "papa yazanye firme z’abantu baterana ibyuma, najye nari nigize debande nje gukora igerageza” uri umubyeyi, cyangwa uri umurozi? Past Desire

Nitubona mu minsi iri imbere tugize abaterabwoba mu Rwanda, tuzamenye ko dusaruye imbuto twabibye. Imana yaguhaye umugisha ugura tereviziyo ni byiza, ariko ni izihe firime zirebwa iwawe, ni ibiki birebwa iwawe? Ko dushobora kuzasanga ibyo twita iterambere ahubwo birimo n’urupfu rw’abana bacu! Mu nshingano zawe ugomba no kumenya firime zirebwa iwawe, kuko ni wowe mutambyi w’urugo rwawe.

Mumaze kubona ko firime zica kuri tereviziyo 80% zigisha ubusambanyi? Iyo tureba umukobwa w’umunyarwandakazi ari ku nyanja yambaye ikariso arimo kubyina, bakayishyira kuri tereviziyo y’igihugu mutekereza ko biba bishatse kuvuga iki? Ariko turazireba, tukazirebana n’abana bacu tukumva ko ntacyo bitubwiye! Ariko imbuto urimo kubiba mu mutwe wuriya mwana, buretse uzayifatisha amaboko abiri. Kandi nutangira gusarura aho wabibye, ni igihe cyo kubabara ntabwo ari cyo gihe cyo gusenga. Uzajya wicare umutima ukurye ariko ntacyo uzaba ukibihinduraho. Eliya aravuga ngo ‘Aka kavuyo ndakarambiwe, ndashaka impinduka’

Hari ibintu bikwiye kutubabaza. None ko Bibiliya ivuga ngo” Eliya yari umuntu nkatwe” ni iyihe mpinduka urimo kuzana mu muryango wawe? Ko urumogi, ubusambanyi, inda zitateganyijwe, gukuramo inda, ibyaha nk’ibyo n’ibindi tutavuze byiyongera buri munsi, urimo kubabazwa nabyo ngo ugire impinduka uzana? Wowe se ububayeho ubuzima bwejewe? Nitudasenga nta mpinduka izaba, kandi ingaruka zo kudasenga zizatugeraho.

Pst Desire Habyarimana

Ushobora gukurikira iyi nyigisho yose uko yakabaye hano

[email protected]

Ibitekerezo (0)

Tanga igitekerezo

Amategeko n'amabwiriza arakurikizwa

Haba hari icyemezo ufashe nyuma y'ubu butumwa ?