Urasabwa iki ngo uhishurirwe umugambi w’Imana(...)

Kwamamaza

agakiza

Urasabwa iki ngo uhishurirwe umugambi w’Imana ku buzima bwawe?-


Yanditswe na: Ubwanditsi     2021-08-09 08:42:49


Urasabwa iki ngo uhishurirwe umugambi w’Imana ku buzima bwawe?-

Niba umaze kwakira Kristo Yesu mu buzima bwawe ubaye umwana w’Imana, igikurikiraho ni ukumenya ubushake bwayo n’umugambi w’Imana ukawugenderamo wicishije bugufi ukayuba.

Ibyakozwe n’Intumwa 22:10 Pawulo yabajije Yesu wari umaze kumwihishurira ngo ngire nte Mwami? Amubwira icyo agomba gukora nawe ashyira mu bikorwa ibyo yari asabwe. "Ndamubaza nti ‘Ngire nte, Mwami?’ Umwami aransubiza ati ‘Haguruka ujye i Damasiko, ni ho uzabwirirwa ibyo ugenewe gukora byose."

Nawe iyi ni yo nshingano yawe kugira ngo: Umenye, ugendere, uhuze ubuzima bwawe n’umugambi w’Imana. Inshingano yawe ni ukumvira no kwicisha bugufi Kugira ngo wubahe ubushake bw’Imana ku buzima bwawe.

Kugira ubusabane n’Imana mu masengesho

Aya masengesho umukristo akwiye kuba asenga yamufasha kumenya ubushake bw’Imana, agomba kuba ameze nk’aya Dawidi, muri Zaburi 27:11, hagira hati" Uwiteka, ujye unyigisha inzira yawe, Unyobore inzira y’igihamo ku bw’abanyubikira."

Iyo tumaze kumenya iri banga ryo kwegera Imana buri gihe, iduhishurira kubw’ubuntu bwayo umugambi wayo ku buzima bwacu intambwe ku yindi, bigatuma tutibeshya inzira kuko tuba dufite umuyobozi uzi neza aho tugana. Kugira ngo umenya umugambi w’Imana ku buzima bwawe, ni byiza ko ugomba kubaka uburyo usabanamo n’Imana buri gihe mu masengesho.

Kwiga no gushakashaka ijambo ry’Imana

Ni iby’igiciro kumenya ko imibereho y’intwari zatubanjirije mu kwizera yarangwaga no gushishikarira kumenya ijambo ry’Imana no kuyoborwa na ryo. "Ijambo ryawe ni itabaza ry’ibirenge byanjye, Ni umucyo umurikira inzira yanjye. "Zaburi 119:105.

Abatubanjirije kandi bakabyitwaramo neza, iki ni cyo cyabashoboje kugendera mu bushake bw’Imana. Ijambo ry’Imana bari bararigize itabaza ry’ibirenge byabo n’umucyo ubamurikira mu rugendo rwabo, bagahora bashaka kurimenya ndetse no kurimenya kurushaho. Nawe iri banga nurikoresha bizatuma umenya ubushake bw’Imana.

Imana iduhishurira ubushake bwayo, bijyanye n’uko tuyumvira buri munsi

Sawuli yakoze iby’Imana itishimira, acibwa ku ngoma kandi nta kindi yongeye kumenya ku bushake bw’Imana. Nyamara atarakora ibyo, buri munsi Imana yagendaga imubwira icyatumye imushyiraho, n’icyo agomba gukora ariko igihe yacumuraga, byahagarariye aho atangira kujya akora ibyo yibwira. "Samweli aramusubiza ati “Mbese Uwiteka yishimira ibitambo byoswa n’ibindi bitambo kuruta uko yakwishimira umwumviye? Erega kumvira kuruta ibitambo, kandi kwitonda kukaruta ibinure by’amasekurume y’intama." 1Samweli 15:22

Pawulo nawe bwa mbere yasabwe kujya i Damasiko akabona kubwirwa ibikurikira, Ibyakozwe n’Intumwa 9:6. "Ariko haguruka ujye mu mudugudu, uzabwirwa ibyo ukwiriye gukora.” Bivuga ngo iyo utumviye ku kibanza, mu bushake bw’Imana ntabwo ubasha gusobanukirwa mu bikurikiraho.

Kugira ibyiringiro kandi bishikamye

Twemerera Imana gukorera muri twe, iyo duhisemo gusa ubuzima bwo kwizera, bisobanuye ko ari yo twiringiye. Imana yahamagaye Sawuli(Pawulo) ngo abe igikoresho cyatoranyijwe, icyo yasabwaga kwari ukwiringira Imana mu byo yemeye ko ahura na byo mu buzima bwe bwose: Imibabaro, kurwanywa, kurenganywa,...

Tugomba kwibuka ko umugambi w’Imana harimo no kwemerera ibiza kutwigisha, cyangwa kutugerageza mu buzima.

"Bakundwa, mwe gutangazwa n’ikome ryo kubagerageza riri hagati yanyu ngo mumere nk’abagushije ishyano. Ahubwo munezezwe n’uko mufatanije imibabaro ya Kristo, kugira ngo muzanezerwe mwishima bihebuje, ubwo ubwiza bwe buzahishurwa." 2Petero 4:12-13

Imana rero yishimiye ko dufatanya na Kristo kugira ngo tuzananezeranwe na we. Umugambi w’Imana ku buzima bwacu ni uwiteka ryose, ntabwo kandi bireba abakiri bato mu gakiza ahubwo nawe umaze igihe mu gakiza. Ntabwo kubaho kwawe byatunguye Imana, ahubwo Imana data igufitiye umugambi mwiza kandi utangira ari uko wakiriye Yesu mu bugingo bwawe.

Niba utaramwakira ukwiye kubikora aka kanya, nawe wamwakiriye ukwiye gushyira ibi mu bikorwa: Kugira ubusabane n’Imana mu masengesho, Kwiga no gushakashaka ijambo ry’Imana, kumenya, ugasobanukirwa ko Imana iduhishurira ubushake bwayo bijyanye n’uko tuyumvira buri munsi, Kugira ibyiringiro kandi bishikamye.

Reba hano iyi nyigisho yose: Ni gute namenya umugambi w’Imana ku buzima bwanjye? Ibintu 4 usabwa ngo uwusohoze / Pastor Jean J.K.

[email protected]

Ibitekerezo (0)

Tanga igitekerezo

Amategeko n'amabwiriza arakurikizwa

Haba hari icyemezo ufashe nyuma y'ubu butumwa ?