Ni ubuhe buryo bwiza kwatura ibyaha bikwiye(...)

Kwamamaza

agakiza

Ni ubuhe buryo bwiza kwatura ibyaha bikwiye gukorwamo?


Yanditswe na: Ubwanditsi     2021-05-18 09:17:18


Ni ubuhe buryo bwiza kwatura ibyaha bikwiye gukorwamo?

Kenshi iyo uvuze kwatura ibyaha benshi bumva itorero ry’Abapantekote , iyo uvuze kwicuza ibyaha rikunze gukoreshwa mu idini Gatorika. Gusa iyo utekereje usanga aya magambo yose ari amwe kandi asobanura kimwe. Sobanukirwa no kwatura ibyaha ndetse n’uko bikorwa nkuko bigiye kugarukwaho muri iyi nkuru.

Kwatura ni ibintu abantu benshi bakunze kwibazaho kandi ntibabyumve kimwe, cyane cyane usanga bikunda gukoreshwa n’abakirisito bavuga ko bari gusaba Imana imbabazi. Ndetse abadakunze kwinjira mu bintu byo gusenga usanga nabo babyibazaho, ariko ntibasobanukirwe ibyaribyo uko bikwiriye.

Nk’uko tubisanga mu Migani:28:13 haravuga hati “Uhisha ibicumuro bye ntazagubwa neza ariko ubyatura akabireka azababarirwa.”

Kwatura ni ikintu gikunze gukomerera abantu kuko bisaba kuba uciye bugufi mu mutima wawe, ariko ugasanga abantu benshi bakunze kwihagararaho bakanga gusaba imbabazi. Nyamara ibi ntibyagakwiye kuba ari ibintu bigoranye kuko bifasha abantu kubana n’Imana bigatuma nayo ibishimira.

Muri Bibiliya tugenda tubonamo ingero z’abatubanjirije bagiye bakora ibyaha bakamenya ko babikoze bakatura( bagasaba mbabazi) ndetse bakababarirwa. Nka Dawidi yasabye Imana imbabazi nyuma yo kuryamana n’umugore wa Uriya ndetse na nyuma yo kwica Uriya.

Dawidi yari afite ubushobozi bukomeye mu bintu byinshi, yari umwami, yari intwari ku rugamba. Yari umusizi akaba n’umucuranzi ariko ibyo byose ntibyamubujije gucabugufi ngo yature kubera ko atishingikirizaga ubushobozi bwe, ahubwo yishingikirizaga ku Mana ye.

Ni ryari umuntu akwiye kwatura ibyaha?

Umuntu yatura iyo aribwo akimara gukizwa, kuko aba amaze gusobanukirwa ko ibihembo by’ibyaha ari urupfu naho impano y’Imana akaba ari ubugingo buhoraho.

Umuntu kandi yongera kwatura igihe cyose yongeye gukora icyaha, kuko iyo umuntu akijijwe ntibiba bivuze ko avuye mu isi ngo abe atazongera gukora icyaha na rimwe. Iyo akoze icyaha aba agomba kwihutira kwihana.

Hari uburyo bune bwo kwaturamo ibyaha twahisemo kubagezaho.

1. Kwicuza: Iyo umuntu amaze gukora icyaha byanze bikunze umutima we umwemeza ko yagikoze, cyane ku bantu basenga bagifite Umwuka Wera muri bo. Iyo umutima wawe wamaze kukwemeza amakosa ni byiza ko utekereza ukumva ko wakoze amakosa , bikakubabaza ndetse ukagambirira ko utazongera.

2. Kwatura ibyaha: Niba umaze gukora icyaha umutima wawe ukabikwemeza ndetse ukicuza wumva ko utazongera, ukoresha ijwi ryawe uvuga ubwira Imana ibyaha byawe uyisaba imbabazi z’ibyo wakoze.

3. Gusaba imbabazi abo wahemukiye: Igihe uhemukiye umuntu waba ubishaka cyangwa utabishaka ni ngombwa ko ugomba gutekereza kubyo wakoze. Wakumva umutima wawe ukwemeza ko wakoreye uwo muntu amakosa, ukihutira kumusaba imbabazi. Ubu ni uburyo bwiza bwo kwaturamo kandi ukumva ubohotse k’uwo wakoreye amakosa nawe akumva akubabariye.

Mu butumwa bwiza bwa Yesu uko bwanditswe na Matayo:5:23-24, hagira hati ”Nuko nujyana ituro ryawe ku gicaniro ukahibukira mwene so ko afite icyo mupfa usige, ituro ryawe imbere y’igicaniro ubanze ugende wikiranure na mwene so.”

4. Kureka ibyaha: Niba wakoze ibyaha ukicuza mu mutima, ukatuza akanwa kawe usaba Imana imbabazi, ndetse waba wabikoreye umuntu nawe ukamusaba imbabazi, ikiba gikurikiyeho aba ari ukureka ibyo byaha ukihana ndetse ugaharanira kutazongera kubikora.Yesu amaze kubabarira umugore wari waraguye mu cyaha cy’ubusambanyi, yaramubwiye ngo " Genda ntuzongere gukora icyaha ukundi"

Ubu ni bumwe mu buryo bwo kwatura wakoresha mu gihe waguye mu byaha, bikaba byagufasha kubivamo.

Source: Isezerano.com

[email protected]

Ibitekerezo (0)

Tanga igitekerezo

Amategeko n'amabwiriza arakurikizwa

Haba hari icyemezo ufashe nyuma y'ubu butumwa ?