Ni iki twakwigira ku mubano wa Mose na(...)

Kwamamaza

agakiza

Ni iki twakwigira ku mubano wa Mose na Aroni?


Yanditswe na: Ubwanditsi     2021-06-25 05:45:55


Ni iki twakwigira ku mubano wa Mose na Aroni?

Aroni yari mukuru wa Mose, wayoboye Abisirayeli abakura mu buretwa bwo muri Egiputa. Mose yavutse Aroni afite imyaka itatu (Kuva 7:7), ariko ntituzi imyaka Miriyamu mushiki wabo yari afite icyo gihe. Birashoboka ko harimo intera ndende hagati ya Miriyamu na Mose kuko Miriyamu yari ashinzwe kwita kuri musaza we Mose ari uruhinja, mugihe Farawo yategekaga ko bica abana b’abahungu bose bavutse (Kuva 1:22, 2:1-4).

Imana yagize icyo ikora kugira ngo irinde Mose, maze uruhinja rubonwa n’umukobwa wa Farawo, bamujyana kuba mu ngoro nk’umuhungu we (Kuva 2: 5-10). Bibiliya isa nk’aho ishaka kuvuga ko Mose yemerewe gukomeza umubano n’umuryango we yavutsemo. Nubwo Mose yakuze ari igikomangoma cyo muri Egiputa, yakomeje kumenya inkomoko y’Abayahudi kandi yafataga Abaheburayo nk’ abavandimwe be.

Mugihe yari abonye Umuheburayo ufatwa nabi n’Umunyamisiri (Umunyegiputa), umujinya wahise uzamuka muri we, yica uwamuhohoteye (Kuva 2: 11-12). Kubera gutinya ko ubuzima bwe bwajya mu kaga, Mose yahungiye mu butayu aho yamaze imyaka 40 akora akazi ko kuragira intama (Kuva 2:15; 3: 1).

Bibiliya nta kintu itangaza muri iyo myaka, gusa dushobora gushaka kumenya niba Aroni yari azi aho Mose ari cyangwa niba yarajyaga kumusura. Bimeze nk’aho Aroni na Mose bakomeje gushyikirana rimwe na rimwe. Igihe Imana yahamagaraga Mose mu gihuru cyaka umuriro maze Mose akabihakana yitwaje ko adashobora kuvuga neza, Imana yahise ivuga iti: “Aroni Umulewi ntabwo ari umuvandimwe wawe? Nzi ko ashobora kuvuga neza, kandi ubu ari mu nzira ye aje guhura nawe. Nakubona, azishima mu mutima we. . . Nzabafasha mwembi kuvuga. Azavugana n’abantu mu mwanya wawe. Azakubera umuvugizi, kandi bizamera nk’aho wari Imana kuri we” (Kuva 4: 14-16).

Tuzi bike kuri Aroni muri iyo myaka yo hambere, ariko agomba kuba yarakomeje umubano n’Uwiteka kuko, igihe Imana yamubwiraga ngo ajye guhura na Mose, Aroni ntiyigeze atungurwa na gato kandi yahise yumvira ako kanya (Kuva 4: 27-28). Kubera ko Aroni yari azwi mu muryango w’Abaheburayo, yari afite ubushobozi bwo guteranya abayobozi b’Abayahudi kugira ngo bumve ibyo Imana yabwiye Mose (Kuva 4: 29-31).

Muri kiriya gihe, abana bakuru bari bubashywe kandi bagahabwa umwanya w’icyubahiro mumuryango, ariko Imana yahinduye ibyo byiringiro. Imana yahisemo murumuna wa Aroni kugira ngo ashyirwe hejuru ndetse abe umuyobozi, kandi yahisemo mukuru we kugira ngo amubere umufasha. Muri iyi gahunda, Aroni yasaga nkaho akora neza. Igihe kimwe gusa ni bwo yigometse kuri murumuna we, igihe Aroni na Miriyamu batangiraga kuvuga nabi Mose (Kubara 12: 1-2). Imana yakemuye icyo kibazo, Aroni na Miriyamu barababariwe.

Mu myaka yakurikiyeho Mose na Aroni bashyize hamwe bahangana na Farawo, bazana ibyorezo icumi muri Egiputa, kandi bavana Abisiraheli mu bunyage (Kuva 7: 1-2). Imana yavuganaga na Mose, Mose akavugana na Aroni, Aroni na we agatanga ubutumwa ku bantu. Mubyukuri Mose na Aroni bari ibikoresho Uwiteka yakoresheje kugira ngo akure ubwoko bwe muri Egiputa babashe kugera mu gihugu cy’isezerano. Aroni, hamwe n’umuntu witwa Hur, bafashe amaboko ya Mose ku rugamba barwanaga n’Abameleki, bityo Abisilayeli baratsinze (Kuva 17:10-13).

Igihe Mose yazamutse umusozi Sinayi kugira ngo abonane n’Imana, asiga Aroni ayobora Abisiraheli. Mu minsi mike, abantu barahindutse, Aroni yerekana ko atari umuyobozi mwiza nka murumuna we Mose. Aroni yahise asaba abantu kuzana impeta zabo za zahabu bityo bazikoramo ikigirwamana (Kuva 32). Igihe Mose yamanukaga ku musozi, yagize ubwoba abonye abantu barishoye mu gusenga ikigirwamana Aroni yabakoreye. Aroni yagerageje kwigira nk’aho nta cyo yabikoraho, ariko Imana yazanye icyorezo ku Bisiraheli kubwi’byaha byabo bibi.

Mose na Aroni bakoraga kimwe nk’abayobozi b’ubwoko bw’Imana. Mose yari umuhanuzi watoranijwe n’Imana, kandi Aroni yari umutambyi mukuru w’Imana watoranijwe (Kuva 28: 1-2). Mubyukuri, Aroni yari umutambyi wa mbere, kandi mu rubyaro rwe ni ho hatoranijwe abatambyi bakuru. Mose na Aroni bombi bahamwe n’icyaha cyo kutizera no kutumvira i Meriba (Kubara 20: 8-11), kandi bombi babujijwe kwinjira i Kanani (umurongo wa 12).

Twigira ku mibanire hagati ya Mose na Aroni ko Imana izi imitima yacu n’ubushobozi bwacu, kandi idushyira mu mirimo ikurikije uko duteye. Aroni yagombaga kwicisha bugufi no kwakira umuhamagaro, na Mose yagombaga kwemera ubufasha bwa Aroni. Kubera gufatanya bagakorera hamwe, aba bavandimwe basohoje umurimo wabo neza kuruta uko umuntu umwe yari kubikora. Kubera gufasha Mose akamubera umuvugizi, Aroni yazibye icyuho cy’intege nke za Mose kandi Aroni yahawe icyubahiro (Kuva 28:2). Kubera gufashanya hagati yabo ndetse n’Imana, Abisilayeli babashije kuva mu bihe bikomeye.

https://www.gotquestions.org/

[email protected]

Ibitekerezo (0)

Tanga igitekerezo

Amategeko n'amabwiriza arakurikizwa

Haba hari icyemezo ufashe nyuma y'ubu butumwa ?