Ni gute twasigasira umunezero w’Agakiza(...)

Kwamamaza

agakiza

Ni gute twasigasira umunezero w’Agakiza kacu?


Yanditswe na: Ubwanditsi     2020-09-01 09:34:39


Ni gute twasigasira umunezero w’Agakiza kacu?

“Musabe muzahabwa ngo umunezero wanyu ube wuzuye” Yohana 16:24. Igihe urukundo rw’Umwami Yesu rwadukoragaho bwa mbere tukatura ndetse tukihana mu izina rya Yesu, twumvise umunezero mwinshi wuzuye imitima yacu tutari twarigeze kumenya. Mbega umunezero twagize umunsi twavukaga ubwakabiri!

Imana yifuza ko abana bayo bose baguma mu munezero w’agakiza ubuzima bwabo bwose. Byakagombye kuba ihame n’icyiifuzo cya buri mwizera wese nk’uko mu rwandiko 1Petero 1:8 habivuga."Nicyo gituma mwishima ibyishimo byiza bitavugwa” N’ubwo tudashobora gutakaza agakiza kacu k’iteka, dushobora rimwe na rimwe gutakaza umunezero w’agakiza kacu. Bishoboka bite? Reka turebe impamvu ebyiri zishoboka:

Icyaha gituma dutakaza umunezero w’agakiza

Nubwo twakijijwe, twese turacyacumura, turateshuka tugatenguha kandi ntitwumvira Imana uko bikwiriye. Ibyaha dukora bidutera gutakaza umunezero w’agakiza. Nyuma yo gucumura, twumva ko hari ibitagenda neza; twumva urusika hagati yacu n’Imana. Yesaya 59: 2 haragira hati: “ Ahubwo gukiranirwa kwanyu ni ko kwabatandukanyije n’Imana yanyu, n’ibyaha byanyu nibyo biyitera kubima amaso ikanga no kubumva”

Ibyaha byacu bidutandukanya n’Imana kubera ko Imana ikiranuka, ikindi kandi burya Iman ntinezezwa n’icyaha. Niyo mpamvu n’iyo cyaba ari icyaha twita gito gitera inzitizi hagati yacu n’Imana. Ibyaha byacu bidutera gutakaza umunezero w’agakiza kacu.

Kubabaza Umwuka Wera utuye muri twe, bituma dutakaza umunezero w’agakiza

Abaroma 8:9” Ariko mwebwe ntimuri aba kamere, ahubwo muri ab’Umwuka niba Umwuka w’Imana aba muri mwe . Ariko umuntu utagira Umwuka wa Kristo ntaba ari uwe”

Abakristo dukwiye kumenya ko tutakiri twe twenyine, ahubwo dufite Yesu utuye muri twe, kandi tugengwa n’ibitekerezo, ibyiyumvo n’ibyo akunda.

Ibi bikwiye gutuma tugendana na Yesu aribyo bizamutera kwishima, kandi natwe tuzanezerwa. Abefeso 4:30, Intumwa Pawulo yaranditse ati:“Kandi ntimuteze agahinda Umwuka wera w’Imana wabashyiriweho kuba ikimenyetso, kugeza ku munsi wo gucungurwa”

Kubabaza Umwuka Wera ni ukutamushimisha

Umwuka Wera aguma muri twe ubuziraherezo (Yohana 14: 16-17), ntajya adutererana. Niyo mpamvu, ababara iyo tutagendeye muri We (Abaroma. 8: 4), ni ukuvuga, iyo tutabaho dukurikiza ihame ry’ukuri hamwe n’ubuntu mu urugendo rwacu rwa buri munsi, niko gutera agahinda Umwuka Wera.

Reka dufate urugero rutoya kandi twese tuzi. Iyo hari ahantu ugiye kujya ubanza kugisha Inama Umwuka Wera? Hari ubwo rero tujya gufata urugendo hanyuma tukumva hari ikintu kitari kiza muri twe, umutima ukadiha tukabura amahoro. Burya Umwuka Wera ntaba ashaka ko ujya aho hantu. Nyamara muzarebe ukuntu turushaho guhatiriza bikagera aho urwo rugendo rukozwe kandi umuntu abizi Neza ko Umwuka Wera yamwangiye. Iyo rero ufashe icyemezo cyo kugenda Umwuka Wera agira agahinda kandi ntakabuza nawe ntuzagira umunezero na rimwe muri wowe.

Ni gute dushobora kugarura ubusabane no gukomeza umunezero w’Agakiza kacu?

Nk’abakristo, rimwe na rimwe guhorana umunezero w’agakiza kacu ntibitworohera. Hari ubwo twisanga turimo gutakamba nk’uko Umwami Dawidi yabwiye Imana ati” ungarurire umunezero w’Agakiza kanjye” Ni iki twakora ngo tugarure uyu munezero mu bihe nk’ibyo kandi ni gute dushobora kwirinda kuwutakaza mbere yuko biba?

Nk’uko iyo ururabo rubungabunzwe rukarerwa n’ubutaka bukwiye amazi n’izuba bihagije ruba rwiza, Niko umunezero w’Agakiza twahawe n’Imana ukwiye kurindwa.

Reka turebere hamwe ibintu bine byingenzi wakora ugasigasira umunezero w’Agakiza kawe

Kwihana vuba (Kudatindana icyaha muri wowe)

Ibyaha byacu ari ibicumuro bito cyangwa ibyaha bikomeye, tugomba kubyatura tukabisabira Imana imbabazi vuba na bwangu! . Ibi bikubiyemo gutera agahinda Umwuka Wera n’ibindi bidusubiza inyuma buri munsi. Igihe cyose umutimanama wacu utumenyesheje ko twacumuye, ntidukwiye gutinda kwaturira Umwami Yesu. Mu rwandiko 1Yohana 1: 9 hagira hati: “Ariko nitwatura ibyaha byacu, niyo yo kwizerwa kandi ikiranukira kutubabarira ibyaha byacu no kutwezaho gukiranirwa kose”. Igihe rero ikibazo (ari cyo cyaha) twari dufitanye n’Imana gikemutse, ubusabane bwacu nayo nabwo buragaruka. Niho duhera dusubizwa wa munezero w’Agakiza.

Fata ijambo ry’Imana nk’ibiryo byawe by’Umwuka bya buri munsi

Twese tuzi uburyo dushobora guhangayika n’ uburakari tugira iyo tutariye kandi bigaragara ko umubiri ushonje, cyangwa se mu gihe cy’ imirire mibi. Duhura n’inzara nk’iyo mu buryo bw’Umwuka mugihe tudafite ijambo ry’Imana muri twe. Igihe tuzaha agaciro n’umwanya ijambo ry’Imana tukaryishimira buri munsi, Ayo magambo tugaburirwa ahinduka umunezero n’ibyishimo by’umutima wacu, bikaduha umunezero w’agakiza twahawe umunsi wose.

Kurya ibiryo by’umubiri biradushimisha, ariko kurya Ijambo ry’Imana bituzanira kunyurwa kw’imbere mu mutima kandi kuramba. Ingeso ya buri munsi yo gufata Ijambo ry’Imana nk’intungamubiri zacu zo mu mwuka bizadufasha gukomeza umunezero mu gakiza k’Imana.

Kunda gusabana n’Imana mu masengesho

Ntabwo ari ngombwa ko utegereza umunsi wagenwe n’itorero usengeramo ugera, cyangwa ko ukenera kubanza guhura n’itsinda musanzwe musengera hamwe. Birashoboka cyane ko ufata umwanya wawe ukiherera ku buryo bw’umwihariko kuko ni nabyo Imana ishaka. Va mu kivunge cy’abantu benshi ushake Imana ku giti cyawe izakumva haba kumanywa cyangwa ni joro.

Muri Yohana 16:24, Umwami Yesu aragira ati” Kugeza none ntacyo mwasabye mu zina ryanjye. Musabe muzahabwa ngo umunezero wanyu ube wuzuye” kugira umuco wo gusengera buri kintu cyose tugiye gukora bituzania umunezero. Mu gukingurira Umwami Yesu imitima yacu mu masengesho buri munsi Atari mugihe cyagenwe gusa, cyangwa mu bihe bikomeye by’ubuzima, ntakabuza ko tuzashimangira umubano wuje urukundo na Yesu. Tuzakomeza gusabana na We kandi tuzishimira umunezero w’Agakiza kacu.

Girana ubusabane(Guterana) n’abandi bakristo buri gihe

Kugirana ubusabane n’abandi bakristu nabyo bidufasha gukomeza umunezero wacu na Yesu, kubera ko kimwe mu byishimo bikomeye mu buzima bwa gikristo ari uguterana n’abandi bakunda Yesu. Ku bijyanye n’ubusabane bw’abizera, muri 1Yohana 1: 3-4 , intumwa Yohana atwereka ko ubusabane bwa gikristo nyabwo atari inshingano cyangwa umuhango ahubwo ni ugushaka isoko y’ibyishimo

“Ibyo twabonye tukabyumva ni byo tubabwira kugira ngo namwe mufatanye natwe, kuko ubwacu dufatanyije na Data wa twese n’umwana we Yesu Kristo. Ibyo nibyo tubandikiye kugira ngo umunezero wanyu ube mwinshi”. Guteranira hamwe n’abandi bizera, gusomera Ijambo ry’Imana hamwe, kuvuga ibya Kristo, no guhimbaza Uwiteka Imana biraduhumuriza, bikadutera imbaraga kandi rwose byuzuye umunezero.

Buri mukristo wese rero akwiye kwihatira kubaka izi ngeso nziza mu buzima bwe bwa buri munsi: Mu kwatura ibyaha bye vuba, kwigaburira (kugaburirwa) Ijambo ry’Imana, kuvugana n’ Imana mu masengesho, no guhurira hamwe ndetse no gusabana n’abandi bakristo . Ibi byose nibigerwaho bizafasha buri wese gukomeza umunezero wuzuye w’Agakiza mu buzima bwa gikristo bwa buri munsi.

Source: Bibles for America (Blog)

[email protected]

Ibitekerezo (0)

Tanga igitekerezo

Amategeko n'amabwiriza arakurikizwa

Haba hari icyemezo ufashe nyuma y'ubu butumwa ?