Ni gute twahuza agakiza na sport?

Kwamamaza

agakiza

Ni gute twahuza agakiza na sport?


Yanditswe na: Ubwanditsi     2021-05-07 10:31:04


Ni gute twahuza agakiza na sport?

Siport (imyitozo ngororamubiri) ituma umuntu agira ubuzima bwiza muri rusange kuko ituma amaraso atembera neza mu mubiri,ituma ibyo twariye tubasha kubikoresha, ituma dusohora imyanda binyuze mu cyuya. Ni byiza rero guhuza siporo n’imirire kuko ari byo bitera umuntu kugira ubuzima buzira umuze.

Muri iki gihe indwara zitandura zikomeje kwiyongera ndetse zigahitana ubuzima bwa benshi, ni byiza ko dusobanukirwa byinshi ku mirire inoze ndetse tukagira n’ubumenyi bwimbitse ku bijyanye n’uburyo sport ikorwamo ndetse tukabihuza n’agakiza nk’abakristo bityo ubumenyi kuri ibi byose iyo buhujwe bitanga umusaruro mwiza ku buzima bwa muntu.

Aganira n’Agakiza.org, umujyanama mu bijyane n’imirire Mfiteyesu Leah yasobanuye uburyo bwiza bwo guhuza siporo n’imirire ndetse ndetse n’ibyo umuntu akwiye kwitondera mugihe akora sport kugira ngo bitamwangiriza ubuzima.

Ati “Hari indwara zitandura umuntu ashobora kurwara akayigumana ubwe ntabe yayanduza umwana cyangwa umugabo we.Izo ndwara zifite ibintu 4 bizitiza umurindi: Kurya nabi, ikoreshwa ry’inzoga, ikoreshwa ry’itabi no kudakora imyitozo ngororamubiri. Ni yo mpamvu rero ukwiye kwita ku mirire na siporo kuko inzoga n’itabi biroroshye ku barokore kubyirinda”.

Yakomeje agira ati “Hari abantu bibwira ko gukora imyitozo ngororamubiri yonyine izabafasha kugira ubuzima bwiza cyangwa se kugabanya ibiro ariko iyo tugiye ku ijanisha dusanga imyitozo ngororamubiri ifata 20% noneho imirire igafata 80%. Ni ukuvuga ngo sporo yonyine ntabwo ifasha umuntu ku rugero ruri hejuru, ahubwo umuntu akwiriye kuyifatanya n’imirire myiza iboneye.

Hari sport zitandukanye abantu baba bashobora gukora ariko ikigo gishinzwe ubuzima ku isi bagira inama abantu gukoresha iminota 150 mu cyumweru y’imyitozo ngororamubiri isa n’aho yihuta, bivuze ngo ni iminota 30 mu minsi 5, ushobora kwiruka, kunyonga igare n’ibindi ”.

Mfiteyesu Leah yasobanuye amwe mu makosa abantu bakora mugihe bari gukora siporo kandi bikaba byabagiraho ingaruka mbi ati “Umuntu uri mu mubyibuho ukabije cyangwa se wafashwe n’indwara zitandura hari siporo tubabuza, nk’urugero umuntu munini iyo usimbutse umugozi kuriya uba uzamuka wiceka hasi ibiro byawe ari byinshi binaniza amavi agatangira kubabara.

Ikindi ushobora kurwara umugongo uwutewe no gukora siporo nabi hari n’abahakura indwara zidakira nk’iz’urutirigongo kuko hari igihe umuntu kwa muganga bamwandikira siporo agahita ashaka gukorera rimwe izo atakoze zose. Cyangwa se umuntu akajya muri jimu (gym) agatangira guterura ibintu bimurusha imbaraga. Ibyo na byo bishobora gutera kwangirika kw’amagufwa no kugira udusebe ku mikaya ariko ku bantu bafite ibibazo by’umugongo si byiza guterera umusozi cyangwa kuwumanuka.

Ku bantu barwaye diyabete iyo akoze siporo nyinshi ashobora kugira isukari nkeya cyane bikaba byamutera ikibazo. Ni yo mpamvu gukora siporo ku muntu utabimenyereye akwiriye gutangira bucye agenda n’amaguru yihuta kuko byo akenshi nta kibazo bitera.

Ku rundi ruhande hari abantu bafite imyumvire ivuga ko gukora siporo ari icyaha, Madame Leah yagize icyo abivugaho muri aya magambo:

“Akenshi tugarutse ku itorero ryacu, abenshi ku bijyanye n’imyambarire y’abagore n’abakobwa mbona bigenda bihinduka, ariko n’iyo waba ufite iyo myumvire yo kumva ko imyambarire ari cyo kibazo, wiyambariye ikanzu yawe ushobora kuzenguruka karitsiye yanyu wihuta n’ubundi ntibizakubuza kubira ibyuya. Mubyukuri icya mbere si uburyo wambaye, si aho uyikoreye ahubwo icya mbere ni icyo ukoze, ariko si icyaha kuko siporo ni kimwe mu bituma dufata umubiri wacu neza”.

Muri macye abarokore n’abandi bantu muri rusange bakwiriye gukora imyitozo ngororamubiri kandi badategereje ko haza umubyibuho ukabije cyangwa se indwara

Videwo y’iyi nyigisho wayisanga hano:

[email protected]

Ibitekerezo (0)

Tanga igitekerezo

Amategeko n'amabwiriza arakurikizwa

Haba hari icyemezo ufashe nyuma y'ubu butumwa ?