Ngicyo ikiraro gihuza 2020-2021: Uwiteka(...)

Kwamamaza

agakiza

Ngicyo ikiraro gihuza 2020-2021: Uwiteka akubere ubwihisho


Yanditswe na: Ubwanditsi     2021-01-04 10:32:04


Ngicyo ikiraro gihuza 2020-2021: Uwiteka akubere ubwihisho

Kristo Yesu, agakiza, kuba mu Mana, kurindwa, gutambukwaho n’umurimbuzi, ni igisobanuro cyigufi cy’Urwihisho. Ijambo Imana iduhaye mu gutangira 2021

"Uba mu rwihisho rw’Isumbabyose, Azahama mu gicucu cy’Ishoborabyose. Ndabwira Uwiteka nti “Uri ubuhungiro bwanjye n’igihome kinkingira, Imana yanjye niringira.” Kuko ari we uzagukiza ikigoyi cy’umugoyi, na mugiga irimbura. Azakubundikiza amoya ye, Kandi uzajya uhungira munsi y’amababa ye, umurava we ni ingabo n’icyuma kigukingira. Igiteye ubwoba cya nijoro ntikizagutinyisha, Cyangwa umwambi ugenda ku manywa,Cyangwa mugiga igendera mu mwijima, Cyangwa kurimbura gutsemba ku manywa y’ihangu.

Abantu igihumbi bazagwa iruhande rwawe, Abantu inzovu bazagwa iburyo bwawe, Ariko ntibizakugeraho. Uzabirebesha amaso yawe gusa, Ubone ibihembo by’abanyabyaha. Kuko ari wowe buhungiro bwanjye Uwiteka, Wagize Isumbabyose ubuturo, Nuko nta kibi kizakuzaho, Kandi nta cyago kizegera ihema ryawe.

Kuko azagutegekera abamalayika be, Ngo bakurindire mu nzira zawe zose. Bazakuramira mu maboko yabo, Ngo udakubita ikirenge ku ibuye. Uzakandagira intare n’impoma, Uzaribata umugunzu w’intare n’ikiyoka. “Kuko yankunze akaramata ni cyo nzamukiriza, Nzamushyira hejuru kuko yamenye izina ryanjye. Azanyambaza nanjye mwitabe, Nzabana na we mu makuba no mu byago, Nzamukiza muhe icyubahiro. Nzamuhaza uburame, Kandi nzamwereka agakiza kanjye." Zaburi 91: 1-16.

Abantu benshi barimo gutaka ihungabana ry’ubukungu(Crise economique), ibibazo byakomeye ariko mu ijuru nta Crise economique yabayeyo ntayo badutangarije. Ntabwo dutewe ubwoba n’ibyo iminsi yazana ahubwo twiringiye utegeka iminsi.

Mu kiganiro ‘Ubutumwa bukiza’ gitambuka kuri Agakiza Tv, mu gice cyambere cy’iyi nyigisho uyu munsi Pasiteri Desire Habyarimana aravuga k‘Ubwihisho’ nkuko twabisomye muri Zaburi ya 91, naho mu gice cya 2 tuzarebera hamwe ibyo Imana iduhisha.

Ingero nkeye muri nyinshi z’abantu Imana yabereye ubwihisho

Kuva Adamu akoze icyaha mu ngobyi ya Edeni, Bibiliya ivuga ko kuva icyo gihe Uwiteka yashatse ubwihisho. Muribuka ko umuntu yari yatandukanye n’Imana, atandukana na mugenzi we, atandukana n’ibidukikije. Hanyuma kuko umuntu yari yambaye ubusa kugira ngo Imana ihishe isoni z’ubwambure bwe, Imana ibaga inyamanswa ibambika uruhu. Ubu nibwo bwari ubwihisho bwa mbere.

Ntabwo ari icyo gihe gusa ahubwo nyuma yaho igihe abantu bari bamaze kuba babi Imana yicujije icyatumye irema umuntu, Nowa n’umuryango we kuko bari abakiranutsi Imana yabashakiye ubwihisho mu nkuge.

“Uba mu rwihisho rw’Isumba byose, azahama mu gicucu cy’ishobora byose.”

Nagira ngo nkwifurize ko Uwiteka yagushyira mu bwihisho aho ushobora gukira ibyaha, aho ushobora gukira ibirimo biratambuka muri ikigihe cy’ubusambanyi bukabije, igihe Social media yuzuyemo poronograph, muri iki gihe cyuzuye ibihuha, muri iki gihe cy’inzangano, muri iki gihe hari ibibazo bitabarika Uwiteka akubere ubwihisho.

Bibiliya ivuga ko Yozefu ariwe wabanje kumanuka muri Egiputa agenda agurishijwe. Mwibuke ko yari afite amasezerano ko azayobora abo bavukana ariko kuko bamwangaga Imana imushakira ubwihisho muri Egiputa abayo imyaka irenze 13. Aha yari mu bwihisho kuko yabwiye Bene se ngo ‘Mwashatse kungirira nabi ariko Imana yarabikoresheje ngo ikize abantu benshi be gupfa.

Imana ishobora kugushyira mu bwihisho ahantu wenda nawe udasobanukiwe, ariko umugambi wayo ari ukugira ngo izakugeze ku masezerano yayo nyuma yuko yakurinze ibirimo biratambuka.

Muribuka ko yakobo nubwo yari afite amasezerano ko azaba mukuru ariko nyuma yo kwiba umugisha Esawu muribuka ko yahunze akajya kwa Rabani akamarayo imyaka 20. Yagiye ari wenyine agenda ahunze nta kintu afite ariko Ubuntu bw’Imana bubana na we bumurindira aho hantu, abamalayika bajyaga bamusura mu gihe yabaga yahuye n’uburiganya, akabona amapfizi amwimiriza umukumbi. Kugeza ubwo Malayika amubwiye ngo ‘Haguruka ujye aho nakubwiye ageze ku cyambu cya Yaboki bamuhindurira izina bamwita Islaheli.

Yaje afite amashyo, imikumbi, abagore, abaja n’abagaragu n’abana, yarateye imbere. Iyo Imana yaguhishe ntabwo ikora bimwe gusa ahubwo ikora byinshi, uzagaruka uri umugisha uvuye mu bwihisho.

Abahishwe n’Imana ni benshi ariko muribuka ko Mose nawe yahishwe kuko Imana yari imugambiriyeho ko ari we uzakura Abisiraheli mur Egiputa. Igihe barimo barica abana b’abahungu we bamuboheye akato ko kwihishamo imukura mu ruzi umukobwa wa Farawo aramutoragura Imana imuhisha kwa Farawo.

Biratangaje ko kuba umuntu urimo arica abanda ari we ushobora kukubera urwihisho. Biratangaje ko umuntu yagirirwa neza n’ugirira nabi abandi, Imana iyo ishatse kuguhisha ntiyabura aho iguhisha, ishobora gukoresha ibyo ishaka n’utabishaka, aho ukwiye kuba ni mu rwihisho rw’isumba byose.

Ubu abantu baratinya Covid 19, baratinya ibihombo, baratinya ibyago, baratinya ubukene batinya ibintu byinshi. Usibye uhishwe muri Kristo Yesu ntawe utatinya ariko muri Kristo Yesu turahishwe Imana izakomeza kutubera Imana.

Kuva mu itangiriro kugeza mu byahishuwe Imana yateguye urwihisho. Ese ufite ibyo utinya, ufite ibiguteye ubwoba: Bamwe batinya guterezwa cyamunara, abandi batinya ingaruka za Covid 19, abandi batinya indwara nka kanseri yahahamuye abantu, hari n’abatinya kubura abana, abantu bafite ibintu byinshi batinya. Ibyo utinya byose inkuru nziza ni uko Uwiteka yateguye urwihisho.

Ubwoba ni bubi kandi abanyabwoba ntabwo bazinjira mu bwami bw’Imana. Dukwiye kwiringira Imana Uwiteka ni we Bwihisho bwacu.

Reba hano inyigisho yose

Source: Agakiza TV

[email protected]

Ibitekerezo (0)

Tanga igitekerezo

Amategeko n'amabwiriza arakurikizwa

Haba hari icyemezo ufashe nyuma y'ubu butumwa ?