Ngaya amasezerano 7 y’umwihariko ku bantu(...)

Kwamamaza

agakiza

Ngaya amasezerano 7 y’umwihariko ku bantu bakunda Imana


Yanditswe na: Ubwanditsi     2021-01-10 07:43:29


Ngaya amasezerano 7 y’umwihariko ku bantu bakunda Imana

Iyo Imana ikubwiye ngo ‘ Uzakore ibi nanjye nzakora ibi, Imana ni iyo kwizerwa ku masezerano yayo irabikora. Nta gihe na kimwe yigeze itenguha abantu bayo. Twe rimwe na rimwe hari igihe gusohoza ibyo twemeye ko tuzakorera Imana bitunanira, ariko Imana yo ni iyo kwizerwa ibyo yasezeranye irabisohoza.

“Kuko yankunze akaramata ni cyo nzamukiriza, Nzamushyira hejuru kuko yamenye izina ryanjye. Azanyambaza nanjye mwitabe, Nzabana na we mu makuba no mu byago, Nzamukiza muhe icyubahiro. Nzamuhaza uburame, Kandi nzamwereka agakiza kanjye." Zaburi 91: 14-16.

Ku bantu bakunda Imana, hari amasezerano 7 y’umwihariko izabasohoreza nkuko tugiye kubirebera hamwe muri iyi nyigisho y’uyu munsi. Ni mu kiganiro ‘Ubutumwa bukiza’ kinyura kuri Agakiza Tv, gitegurwa kikanatambutswa na pasiteri Desire Habyarimana.

“Nzamukiza”

Hari ibihamya ko Imana ari umukiza!. Iyo uganiriye n’abantu bamaze iminsi muri uru rugendo rw’agakiza ubona Imana yaragiye ibakiza inshuro nyinshi pe!. Iyo tuvuze ngo ‘Nzamukiza’, si igice cyo mu Mwuka, si no mumubiri, si no mu bugingo’. Hari abantu benshi Imana yagiye ikiza ibintu binshi. Agakiza kuzuye gakiza: Ibyaha, indwara, ibikomere n’imivumo.

Fungura hano umenye byinshi ku Gakiza kuzuye. Menya ibyo agakiza kuzuye gakiza

https://www.agakiza.org/Agakiza-kuzuye-kagizwe-n-ibiki.html

Tuvuze ku gice cyo mu mubiri gusa wenda, twizera ko Imana ikiza indwara. Ibyo siyansi itemera ko bikira muri Kristo Yesu birakira kuko Bibiliya iravuga ngo’ Bazarambika ibiganza ku barwayi bakire’. Iyo twizeye imbaraga z’Imana, tukizera imbaraga z’ubuMana birashoboka ko indwara zikira. Siyansi ntiyemera ko Diyabete, Kanseri, Sida bikira ariko hari abantu bakize izo ndwara kubera imbaraga z’Imana.

Hari n’abandi bari barabwiwe ko batazabyara ariko Imana ikabakorera ibitangaza bakabyara. Baba barijejwe ko ibyo bitashoboka ariko Imana ihinyuza siyansi, igahinyuza ibyo abaganga bavuze. Isezerano rya mbere ku bantu bakunda Imana ni ukubakiza haba mu mwuka, mu bugingo, no mu mubiri. . Izagukiza ibyaha, akaga, ibiguhagurukiye utazi, ibyago, izagukiza muri byose

Gushyirwa hejuru

“Nzamushyira hejuru”. Hari abantu batazi isezerano ry’Imana, Imana yabwiye Abisiraheli ‘ Ngo muzaba umutwe ntimuzaba umurizo’. Iyo urebye Abisiraheli ni abambere mu bintu byose kuko ari isezerano ry’Imana.

“Nzamushyira hejuru kuko yamenye izina ryanjye”

Kumenya ntabwo ari ukumenya mu mutwe, ni uguhishurirwa. Intumwa Pawulo yaravuze ngo ‘Ibyo nahawe n’Umwami kumenya nibyo nababwiye nanjye’. Bisaba kumenya kurimo guhishurirwa, ni ukumenya imigisha iri muri Kristo Yesu, uburenganzira bwawe mu Mana, guhuza ijambo ry’Imana n’ubuzima ukamenya ko ari ko kuri.

Uyu murimo hari ababikora nk’akazi hari n’abandi babikora nk’umuhamagaro kuko bahishuriwe ubwami. Reka ibyo abandi bantu batahishuriwe wowe ubihishurirwe kubera gukunda Imana.

Iyo tuvuze gushyirwa hejuru ntubirebere mu ndege no mumamodoka ahenda na byabindi byose ureba, gushyirwa hejuru ni ugushyirwa ku mutima w’Imana. Ni ukuba aho Imana igushaka ukazasiga umurage mwiza mubyo wakoze mu Bwaimi bw’Imana.

“Azanyambaza mwitabe”

Hari abantu Bibiliya ivuga ngo ‘Yabaciye mu biganza nk’imanzi’, abo bantu ibarinda nk’imboni y’ijisho. Iyo batatse Uwiteka yihuta gutabara kubera ko ari abantu bamenyereye kumwambaza, bamuba imbere, baba baramutonnyeho. Bena abo kubahagurukira, nta wabatsinda kubera ko ari abantu bafite agaciro ku Mnana. Bafite ubutoni ku Mana, ni abantu baba hafi y’Imana, abo bazamwambaza yitabe.

Hari abantu batazi no kumva ijwi ry’Imana, akubwira ati” Harya Imana ivuga ite?”. Kubera iki?, nta muyoboro bagira ubagezaho amakuru, ntiyamenyereye gusabana n’Imana, ntiyubatse ubumwe hamwe n’Imana. Umuntu wabaye inshuti y’Imana, akaba inkoramutima yayo iyo yambaje Imana itabara vuba, Imana irahurura.

“Nzabana nawe mu makuba no mu byago”

Nagira ngo nkwibutse ko Imana ibababarana natwe. “Ubwo yababajwe no kugeragezwa ubwe, abasha no gutabara abageragezwa bose”, kuko azi intimba icyo ari cyo. Erega ntiyatekereje ko kubana n’Imana ari ikintu cyo kugundirwa, yaramanutse yambara ishusho y’umuntu. Umuntu ukena, umuntu usonza, umuntu urwara, umuntu bavuga, umuntu useba, umuntu upfa.

Byari ukugira ngo nitumubwira ibyo twahuye na byo mu mubiri azajye abyumva vuba.

“Nzabana nawe mu makuba”. Ntiyadutererana, ntiyadusiga, ntiyaduhana. Ari kumwe natwe niyo byakomeye, azabana natwe. Mu rwandiko rw’Abahebulayo havuga ko’ Yesu yageragejwe na byose, ariko ntiyegeze akora icyaha’, niho atandukaniye natwe abana b’ababantu.

“Ubwo yababajwe no kugeragezwa ubwe, abasha no gutabara abageragezwa bose”.

Birashoboka ko watereranywe n’abantu, Yesu yakumva kuko bamwimye aho avukira, avukira mu kiraro cy’inka. Wavukiye mu bukene ariko ntiwagejeje ahe, abahunze n’ababurabujwe n’abanzwe n’abantu yabumva kuko yahunze ari uruhinja. Yesu yarazutse kandi imbaraga zamuzuye zazana impinduka mu buzima bwawe.

“Nzamukiza muhe icyubahiro”

Ibi ntabwo biri mu mwuka gusa, no mubuzima busanzwe. Niba hari umuntu wubashywe ni umuntu utiyandarika. Umuntu udasambana, ntanywe ibiyobyabwenge, ntiyiyandagaze ni iki mwapfa?. Uwo muntu mu ijuru baramwubaha kandi no mu isi baramwubaha.

Hari ubushakashatsi bwigeze gukorwa muri Amerika ku miryango 2: Abubaha Imana n’abatayubaha. Basanze umuryango udakijijwe harimo abantu bagoye leta, banyweye ibiyobyabwenge, leta yatanzeho amafaranga menshi.

Ariko igisekuru cy’abantu bakijijwe ni abantu Imana yagiriye neza, ntibigeze bagorana mu kubana n’abandi kandi havuyemo n’abantu bakomeye. Kubera ko kubaha Imana bigira inyungu ntibisoza nabi, bisoza umuntu ahawe umugisha.

“Nzamuhaza uburame”

Kurama ni ingororano Imana itanga. Erega ibyaha birakenyura, birica, niba usambana uzarwara Sida upfe, niba unywa inzoga ubuzima bwawe buzagenda nabi. Kurama ntabwo bikwiye kureberwa kukuramba imyaka myinshi nubwo nabyo Imana ibitanga yego, ariko no kugira uruhererekane rw’ibisekuru byubaha Imana nabyo ni ukurama. Izina ryawe ntabwo rizibagirana abazagukomokaho bazarikomeza, bazavuga ngo’ Wa muryango w’abantu bubaha Imana’.

Imwe mu ngororano Imana itanga, harimo kurama. Ntabwo uzapfa ukenyutse, Satani ntabwo azagushobora Imana izaguhaza uburame kuko uyubaha. Iri ni isezerano ry’abakiranutsi, abantu benshi bagiye bubaha Imana yabahagije uburame.

“Nzamwereka agakiza kanjye”

Agakiza, twarakijijwe mu gihe cyatambutse dukizwa ibyaha ariko nan’ubu turakizwa mu buryo bwo kwezwa. Nanone tuzongera gukizwa igihe tuzamburwa umubiri, igihe tuzaba twiyambuye ubushwambagara dusanganiye Yesu ku bicu. Ibyo bizaba nabyo ari agakiza.

Imana izatwereka agakiza kayo tuvuye mu isi, ubwo tuzaba turi mu gitaramo cy’imihigo Imana ivuga ngo’ Nuko bana banjye, nimuze mwicare mu byicaro mwateguriwe’. Yesu azatuvuga ibigwi!.

Reba hano iyi nyigisho yose

Source: Agakiza Tv

[email protected]

Ibitekerezo (0)

Tanga igitekerezo

Amategeko n'amabwiriza arakurikizwa

Haba hari icyemezo ufashe nyuma y'ubu butumwa ?